ممبئی: اداکارہ پریانکا چوپڑا نے اپنے پروڈکشن ہاؤس ’پرپل پیبل پکچرز‘ کے بینر تلے فلم ’وینٹی لیٹر 2‘ بنانے کا اعلان کیا ہے۔ اس فلم کے لیے وہ ایک بار پھر فلم ساز راجیش ماپسکر کے ساتھ کام کریں گی، جو اس کے مصنف اور ہدایت کار کی حیثیت سے واپس آئیں گے۔ 2016 میں ریلیز ہونے والی قومی فلم ایوارڈ یافتہ مراٹھی فلم ’وینٹی لیٹر‘ کا یہ سیکوئل 2027 میں ریلیز ہوگا۔ پریانکا چوپڑا اپنے پروڈکشن کیریئر کے اہم ترین منصوبوں میں سے ایک کو دوبارہ شروع کر رہی ہیں۔ انہوں نے انسٹاگرام پر اس فلم کا اعلان کرتے ہوئے پہلی فلم کے پس منظر اور بامعنی کہانیاں پیش کرنے کے اپنے عزم کا ذکر کیا۔

پریانکا نے لکھا، ’’10 سال پہلے، پرپل پیبل پکچرز کے ساتھ میں نے فیصلہ کیا تھا کہ ایسی کہانیاں پیش کروں گی جن کا کوئی مقصد اور معنی ہو۔ ہماری کمپنی کے لیے ’وینٹی لیٹر‘ ایسی ہی ایک اہم کہانی تھی۔ ایک دہائی بعد ہم اس فلم کے ساتھ مزید بہت کچھ لے کر واپس آ رہے ہیں۔‘‘ ’وینٹی لیٹر 2‘ کو پریانکا چوپڑا، ڈاکٹر مدھو چوپڑا اور راجیش ماپسکر مشترکہ طور پر ’پرپل پیبل پکچرز‘ اور ’ماجیز پکچرز‘ کے بینر تلے پروڈیوس کریں گے۔ فلم 2027 میں ریلیز ہوگی۔ تاہم اس کی کہانی اور اداکاروں کے بارے میں فی الحال کوئی تفصیلات سامنے نہیں آئی ہیں۔

یہ سیکوئل اس فلمی منصوبے کی واپسی ہے جس نے بطور پروڈیوسر پریانکا چوپڑا کی شناخت بنانے میں اہم کردار ادا کیا تھا۔ پریانکا چوپڑا کے قائم کردہ پروڈکشن ہاؤس ’پرپل پیبل پکچرز‘ کا مقصد نئے فنکاروں اور صلاحیتوں کو سامنے لانا اور ناظرین تک منفرد کہانیاں پہنچانا ہے۔ اس پروڈکشن ہاؤس کی اہم فلموں میں ’وینٹی لیٹر‘، ’پاہونا: دی لٹل وزیٹرز‘، ’فائر برانڈ‘، ’پانی‘، ’دی اسکائی از پنک‘، ’دی وائٹ ٹائیگر‘، ’ٹو کِل اے ٹائیگر‘ اور ’انوجا‘ شامل ہیں۔ اس پروڈکشن ہاؤس کی فلموں کو قومی اور بین الاقوامی سطح پر بھی شناخت ملی ہے۔

’وینٹی لیٹر‘ نے 3 قومی فلم ایوارڈ حاصل کیے تھے، جب کہ ’پانی‘ کو ماحولیات کے تحفظ کے موضوع پر بہترین فلم کا قومی فلم ایوارڈ ملا تھا۔ اس کے علاوہ بین الاقوامی فلمیں ’دی وائٹ ٹائیگر‘، ’ٹو کِل اے ٹائیگر‘ اور ’انوجا‘ کو آسکر ایوارڈ کے لیے نامزدگیاں بھی حاصل ہوئی تھیں۔ 2016 میں ریلیز ہونے والی اصل فلم ’وینٹی لیٹر‘ کی ہدایت کاری راجیش ماپسکر نے کی تھی۔ اس کی کہانی کامیرکر خاندان کے گرد گھومتی ہے، جس کے افراد گنیش چترتھی سے ٹھیک پہلے خاندان کے ایک بزرگ رکن کی حالت نازک ہونے اور انہیں وینٹی لیٹر پر رکھے جانے کے بعد اسپتال میں جمع ہوتے ہیں۔ مزاح اور جذبات سے بھرپور اس مراٹھی فلم میں خاندانی رشتوں، نسلوں کے درمیان اختلافات، پرانی کشیدگی اور باہمی مفاہمت کو خوبصورتی سے پیش کیا گیا تھا۔ اس فلم کو بہترین ہدایت کاری، بہترین تدوین اور بہترین ساؤنڈ مکسنگ کے لیے 3 قومی فلم ایوارڈ ملے تھے۔