ممبئی: جب دو خاندانوں کے درمیان ذاتی تعلق کئی دہائیوں پر محیط ہو اور یہ رشتہ اس وقت قائم ہوا ہو جب دونوں خاندانوں کے نام فلمی دنیا میں معروف بھی نہ ہوئے ہوں تو اس تعلق کی اپنی ایک الگ کہانی ہوتی ہے۔ اداکار شہزاد خان کے لیے ایسی ہی کہانی ان کے والد اور معروف اداکار اجیت خان اور فلمی مصنف سلیم خان کے درمیان گہری دوستی میں چھپی ہے۔اے این آئی سے گفتگو کرتے ہوئے شہزاد خان نے یاد کیا کہ جب سلیم خان فلموں میں قسمت آزمانے کے لیے پہلی مرتبہ بمبئی آئے تو ان کے والد نے کس طرح ان کی مدد کی۔ انہوں نے بتایا کہ اجیت خان نہ صرف سلیم خان کو بمبئی لائے بلکہ انہیں اپنے گھر میں جگہ دی اور چھوٹے بھائی کی طرح رکھا۔

شہزاد خان نے کہا کہ میرے والد ہی وہ شخص تھے جو چچا سلیم کو بمبئی لائے تھے۔ ہاں میرے والد ہی انہیں بمبئی لائے تھے اور اپنے گھر میں چھوٹے بھائی کی طرح رکھا تھا۔اپنے والد کے انتقال سے قبل کہے گئے الفاظ کو یاد کرتے ہوئے شہزاد خان نے بتایا کہ اجیت خان نے خاص طور پر انہیں نصیحت کی تھی کہ اگر زندگی میں کبھی کوئی مشکل پیش آئے تو وہ سلیم خان سے مدد لیں۔

انہوں نے اپنے والد کی نصیحت یاد کرتے ہوئے کہا کہ اگر زندگی میں کبھی کوئی مسئلہ ہو تو کسی اور کے پاس مت جانا بلکہ سلیم کے پاس جانا۔شہزاد خان نے یہ بھی بتایا کہ سلیم خان نے بھی ان کے والد کا برسوں بھرپور ساتھ دیا۔ انہوں نے کہا کہ سلیم چچا نے بھی ان کا بہت ساتھ دیا۔اجیت خان کا اصل نام حامد علی خان تھا اور وہ فلموں میں اپنے یادگار منفی کرداروں کے لیے جانے جاتے تھے۔ دوسری جانب سلیم خان ہندی فلمی دنیا کے معروف ترین فلمی مصنفین میں شمار ہوئے اور کئی مقبول فلموں کی کہانیاں اور مکالمے لکھے۔

شہزاد خان نے اپنے فلمی سفر کے ابتدائی دنوں کو بھی یاد کیا اور بتایا کہ ’’قیامت سے قیامت تک‘‘ اور ’’انداز اپنا اپنا‘‘ جیسی فلموں میں انہیں دیکھنے کے بعد ان کے والد کا ردعمل کیسا تھا۔شہزاد خان نے 1988 میں ’’قیامت سے قیامت تک‘‘ سے ہندی فلمی دنیا میں قدم رکھا تھا۔ انہوں نے بتایا کہ ’’انداز اپنا اپنا‘‘ میں ان کے مزاحیہ کردار کو دیکھ کر ان کے والد کا ردعمل ان کی توقعات کے بالکل برعکس تھا۔

شہزاد کے مطابق اجیت خان کو لگا کہ انہوں نے برسوں میں بنائی گئی اپنے والد کی ’’سنجیدہ شبیہ‘‘ کو ’’مزاحیہ کردار‘‘ میں بدل دیا ہے۔

انہوں نے اپنے والد کی بات یاد کرتے ہوئے کہا کہ میرے والد نے مجھ سے کہا کہ تم نے جو کچھ کیا ہے دوبارہ مت کرنا۔ ’’انداز اپنا اپنا‘‘ میں۔ انہوں نے کہا کہ میں نے اتنے برسوں میں بہت محنت کرکے اپنی ایک سنجیدہ شبیہ بنائی ہے اور تم نے اسے مکمل طور پر مزاحیہ بنا دیا۔

اس کے بعد شہزاد خان نے ہندی فلموں میں متعدد مزاحیہ اور منفی کردار ادا کیے اور 1994 کی مقبول مزاحیہ فلم ’’انداز اپنا اپنا‘‘ میں بھلا کے کردار سے خاص شہرت حاصل کی۔

ٹیلی ویژن ناظرین میں بھی انہیں بچوں کے مقبول سلسلے ’’شکا لکا بوم بوم‘‘ میں ٹائیگر کا کردار ادا کرنے کے بعد بڑی پہچان ملی۔

ان کی دیگر فلموں میں ’’برسات‘‘۔ ’’دی لیجنڈ آف بھگت سنگھ‘‘ اور ’’بڑے میاں چھوٹے میاں‘‘ شامل ہیں۔