نئی دہلی: اداکارہ تبو کو اکینی ناگارجن کی 100ویں فلم ’کنگ 100‘ میں مہنتی جھانسی رانی کے کردار میں متعارف کرایا گیا ہے۔ فلم سازوں نے ان کی 55ویں سالگرہ کے موقع پر اس کردار کی پہلی جھلک جاری کی۔ اس اعلان کے ساتھ ہی تبو اور ناگارجن کی تقریباً تین دہائیوں بعد دوبارہ ایک ساتھ واپسی کی خبر بھی سامنے آئی ہے۔
تبو چھ سال کے وقفے کے بعد تیلگو سنیما میں واپسی کر رہی ہیں۔ ’کنگ 100‘ میں وہ ایک بااثر اور طاقتور سیاست داں کا کردار ادا کریں گی جو ناگارجن کے کردار کی حریف ہوگی۔ اس بار دونوں اداکاروں کے درمیان رومانوی تعلق کے بجائے سیاسی اور نظریاتی کشمکش دکھائی جائے گی۔
تبو اور ناگارجن اس سے قبل 1990 کی دہائی میں کئی یادگار فلموں میں ایک ساتھ نظر آ چکے ہیں۔ ان کی مشہور فلم ’نِنّے پیلاڈاتا‘ بھی اسی دور کی ہے۔ تاہم نئی فلم میں ان دونوں کی جوڑی کا انداز بالکل مختلف ہوگا۔فلم ساز ادارے اناپورنا اسٹوڈیوز کی جانب سے جاری کی گئی ویڈیو میں تبو کو ایک رعب دار اور بااختیار سیاست داں کے روپ میں دکھایا گیا ہے۔ شاہانہ ساڑھیوں میں ملبوس تبو اپنی پُراثر شخصیت سے توجہ حاصل کرتی ہیں۔ ویڈیو میں انہیں عہدے کا حلف اٹھاتے ہوئے بھی دیکھا جا سکتا ہے۔
تبو نے بھی اپنے انسٹاگرام کھاتے پر اس کردار کی جھلک شیئر کی اور خوشی کا اظہار کرتے ہوئے لکھا کہ انہیں ’کنگ 100‘ میں مہنتی جھانسی رانی کا کردار ادا کرنے پر بے حد خوشی ہے۔ انہوں نے ناظرین کو دسمبر میں فلم دیکھنے کی دعوت بھی دی۔را کارتک کی ہدایت کاری میں بننے والی اس فلم کی موسیقی دیوی سری پرساد ترتیب دے رہے ہیں۔ فلم 24 دسمبر 2026 کو بڑے پردے پر ریلیز کی جائے گی۔
