ممبئی:اداکار انوپم کھیر گزشتہ تقریباً 25 دن سے ایک ڈرامے کے ساتھ امریکہ اور کینیڈا کے دورے پر ہندوستان سے باہر ہیں۔ انہوں نے کہا ہے کہ بیرون ملک مقیم ہندوستانیوں سے ملنے والی بے پناہ محبت اور احترام نے ان کے اس سفر کو خاص بنا دیا ہے۔اپنے انسٹاگرام اکاؤنٹ پر شیئر کی گئی ایک ویڈیو میں انوپم کھیر نے کہا کہ ہندوستان سے دور رہنے کے چند دن بعد ہی انہیں اپنے ملک کی بہت یاد آنے لگتی ہے۔

انہوں نے کہا کہ امریکہ اور کینیڈا میں ان کا ڈراما غیر معمولی طور پر کامیاب ہو رہا ہے اور انہیں ہر جگہ بہت محبت اور احترام مل رہا ہے۔ تاہم ملک سے دوری انہیں ہندوستان کی مزید یاد دلاتی ہے۔انوپم کھیر نے کہا کہ گھر سے دور رہنے کے دوران ہندوستان۔ اپنے خاندان۔ دوستوں اور اپنے مانوس مقامات کی یاد مزید شدت اختیار کر جاتی ہے۔ بیرون ملک مختلف شعبوں سے تعلق رکھنے والے ہندوستانیوں سے ملاقات نے انہیں یہ احساس دلایا کہ کامیاب زندگی گزارنے کے باوجود ان میں سے بہت سے لوگوں کا جذباتی رشتہ اب بھی ہندوستان سے جڑا ہوا ہے۔

انہوں نے کہا کہ ان ملاقاتوں کی گرمجوشی نے انہیں یہ سمجھنے میں مدد دی کہ وہ اپنے ملک میں کن چیزوں کو سب سے زیادہ یاد کرتے ہیں۔انوپم کھیر نے کہا کہ انہیں اپنی والدہ۔ خاندان۔ دوستوں۔ اپنے چاہنے والوں۔ گھر اور دفتر کی یاد آتی ہے۔ تاہم اس وقت وہ کسی ایک شخص یا ایک جگہ کی بات نہیں کر رہے بلکہ اس خاص چیز کو یاد کر رہے ہیں جو ہندوستان کو ہندوستان بناتی ہے۔ وہ پورے ہندوستان کو یاد کر رہے ہیں۔

انہوں نے کہا کہ ان کا ڈراما اس سفر کے دوران بہت کامیاب رہا اور اس دوران ان کی ملاقات یہاں رہنے والے بہت سے ہندوستانیوں سے ہوئی۔ ان میں ڈاکٹرز۔ کمپیوٹر کے شعبے میں کام کرنے والے افراد۔ بڑے کاروباری اور چھوٹے کاروباری بھی شامل ہیں۔انوپم کھیر نے کہا کہ ان لوگوں کو دیکھ کر محسوس ہوتا ہے کہ وہ بیرون ملک چاہے کتنی ہی اچھی زندگی کیوں نہ بنا لیں لیکن ان کے دل کا ایک حصہ اب بھی ہندوستان میں رہتا ہے۔انہوں نے کہا کہ جب یہ لوگ انہیں گلے لگاتے ہیں تو ان کے دل کی دھڑکنیں ان کی دھڑکنوں سے مل جاتی ہیں اور انہیں ان دھڑکنوں میں ہندوستان سنائی دیتا ہے۔انوپم کھیر نے مزید کہا کہ شاید یہی وجہ ہے کہ بیرون ملک مقیم ہندوستانی اپنے ملک کے کسی شخص کو دیکھ کر اتنے خوش ہوتے ہیں۔ ان کے لیے بھی یہ خوشی کا لمحہ ہوتا ہے اور اسی کے ذریعے انہیں احساس ہوتا ہے کہ وہ ہندوستان میں کیا کچھ یاد کرتے ہیں۔

انوپم کھیر نے بتایا کہ یہ ویڈیو 25 ستمبر کو اٹلانٹا میں ان کے ڈرامے ’’Known Unknown‘‘ کے شو سے قبل ریکارڈ کی گئی تھی۔ انہوں نے کہا کہ اسے آج شیئر کیا ہے۔ اس دوران چند مزید دن گزر گئے ہیں لیکن ویڈیو میں بیان کیا گیا احساس اب بھی ان کے دل میں ویسا ہی ہے۔

انوپم کھیر اپنے ڈرامے ’’Jaane Pehchaane Anjaane‘‘ کے ساتھ بین الاقوامی دورہ جاری رکھے ہوئے ہیں۔ اس ڈرامے کے ذریعے ان کے بین الاقوامی سفر میں ایک اور یادگار باب کا اضافہ ہوا ہے۔ نئی اسٹیج پروڈکشن انوپم کھیر اسٹوڈیو کی پیشکش ہے جس میں انوپم کھیر کے ساتھ اداکارہ سوروپ سمپت بھی شامل ہیں۔

اس پروڈکشن کی موسیقی انو ملک نے ترتیب دی ہے۔ یہ پہلا موقع ہے جب انو ملک نے کسی اسٹیج ڈرامے کے لیے موسیقی ترتیب دی ہے۔