ممبئی۔اداکار سنجے دت نے گاندھی جینتی کے موقع پر شیکھر سمن کے میزبان والے ٹاک شو ’شیکھر ٹونائٹ‘ میں شرکت کی۔ اس دوران انہوں نے ملک کی موجودہ صورتحال پر اپنی رائے کا اظہار کرتے ہوئے کہا کہ انہیں اب ملک میں پہلے جیسا ’امن‘ محسوس نہیں ہوتا۔شیکھر سمن سے گفتگو کے دوران سنجے دت نے ہندوستان کے لوگوں کی مہمان نوازی اور کشادہ دلی کی تعریف کی اور ملک میں امن کی خواہش ظاہر کی۔

سنجے دت نے کہا کہ اس ملک کے لوگ بہت اچھے اور محبت کرنے والے ہیں۔ یہاں امن ہونا چاہیے۔ وہ اب اپنے ملک میں وہ امن محسوس نہیں کر پا رہے ہیں۔ انہوں نے کہا کہ ہندوستانی کشادہ دل اور مہمان نواز لوگ ہیں۔ انہوں نے بہت کچھ دیا ہے اور انہیں ہمیشہ اسی طرح رہنا چاہیے۔ سنجے دت نے کہا کہ وہ شیو جی سے دعا کرتے ہیں کہ وہ دن جلد واپس آئیں۔شو کے دوران سنجے دت نے اپنے مقبول کردار منا بھائی کو سیاسی طنز کے انداز میں بھی پیش کیا۔ انہوں نے مزاحیہ انداز میں تصور کیا کہ اگر وہ 5 منٹ کے لیے ہندوستان کے وزیر اعظم بن جائیں تو وہ منا بھائی کے مخصوص انداز میں قوم سے خطاب کیسے کریں گے۔

اپنی فرضی تقریر میں سنجے دت نے گاندھی جی سے منسوب مشہور 3 بندروں کا بھی حوالہ دیا۔ انہوں نے کہا کہ وہ گاندھی جی کو بہت مانتے ہیں۔ گاندھی جی کے 3 بندروں کے بارے میں سب جانتے ہیں کہ برا مت دیکھو۔ برا مت سنو۔ برا مت کہو۔ لیکن آج ایک چوتھا بندر بھی ہونا چاہیے۔ اگر کوئی غلط چیز دیکھے گا تو اسے درست کون کرے گا۔شیکھر سمن نے سنجے دت کی اس تقریر کا ویڈیو کلپ اپنے انسٹاگرام اکاؤنٹ پر بھی شیئر کیا۔

’شیکھر ٹونائٹ‘ ایک ٹاک شو ہے جس میں فلموں۔ سیاست۔ موسیقی۔ کھیل۔ کاروبار اور ثقافت سے وابستہ شخصیات کے ساتھ گفتگو کی جاتی ہے۔ شو میں مزاح۔ جذبات۔ طنز اور بے ساختہ گفتگو شامل ہوتی ہے۔ اس شو کا پریمیئر 15 مئی کو ہوا تھا۔سنجے دت نے حال ہی میں سعودی عرب کی فلم انڈسٹری میں فلم ’7 ڈاگز‘ کے ذریعے ڈیبیو کیا ہے۔ اس فلم میں انہوں نے اپنے دوست اور اداکار سلمان خان کے ساتھ مختصر کردار ادا کیا ہے۔

بالی ووڈ میں سنجے دت آخری بار ’آخری سوال‘ میں نظر آئے تھے۔ ابھیجیت موہن وارانگ کی ہدایت کاری میں بننے والی اس فلم میں سنجے دت کے ساتھ نمشی چکرورتی۔ امیت سادھ اور سمیرا ریڈی نے مرکزی کردار ادا کیے ہیں۔یہ فلم رواں سال مئی میں ریلیز ہوئی تھی اور باکس آفس پر اس کی کارکردگی اوسط رہی۔