ممبئی: معروف بالی وڈ اداکار راج پال یادو نے گلوکار دلیر مہندی کی حمایت کرتے ہوئے اتراکھنڈ کے کابینی وزیر سبودھ انیال کے رویے اور ان کے تبصروں پر سخت اعتراض کیا ہے۔ انہوں نے کہا کہ اعلیٰ عہدوں پر فائز افراد کو فنکاروں کے ساتھ گفتگو کرتے وقت اپنے الفاظ اور لہجے کا خاص خیال رکھنا چاہیے۔
یہ تنازع اتوار کے روز اتراکھنڈ کے نئی ٹہری میں منعقدہ سدھ پیٹھ ماں کنجاپوری سیاحت و ترقیاتی میلے کے دوران پیش آنے والے ایک واقعے کے بعد شروع ہوا۔ تقریب میں دلیر مہندی کی گلوکاری کے دوران وزیر سبودھ انیال نے مداخلت کرتے ہوئے ان کی کارکردگی پر سوال اٹھائے تھے۔
واقعے کی ویڈیو سماجی رابطوں کی ویب سائٹس پر تیزی سے پھیل گئی جس کے بعد مختلف حلقوں سے ردعمل سامنے آنے لگا۔راج پال یادو نے اپنے انسٹاگرام پر ایک ویڈیو جاری کرتے ہوئے وزیر کے تبصروں کو نامناسب قرار دیا اور کہا کہ فن اور فنکاروں کا احترام کرنا ہر شخص کی ذمہ داری ہے۔انہوں نے کہا کہ فن کے ایک طالب علم کی حیثیت سے وہ یہ کہنا چاہتے ہیں کہ ایک ایسے عظیم گلوکار کے خلاف جس کی آواز نے کئی نسلوں کو متاثر کیا ہے کسی معزز وزیر کی جانب سے توہین آمیز الفاظ اور نامناسب زبان کا استعمال ان کے بلند منصب کے شایان شان نہیں ہے۔راج پال یادو نے مزید کہا کہ وزیر کے رویے سے ایسا محسوس ہوا جیسے وہ سمجھتے ہیں کہ پیسے دے کر فن کو خریدا جا سکتا ہے۔ حالانکہ فن کوئی خریدنے کی چیز نہیں ہے۔ فن زندگی ہے اور زندگی احترام کی مستحق ہے۔
دلیر مہندی شراب نہیں پیتے۔ راج پال یادو
اداکار نے تقریب کے دوران دلیر مہندی کے مبینہ طور پر شراب کے نشے میں ہونے سے متعلق الزامات کو بھی مسترد کیا۔انہوں نے کہا کہ دلیر مہندی شراب نوشی نہیں کرتے اور وہ انہیں ذاتی طور پر جانتے ہیں۔راج پال یادو کے مطابق انہوں نے دلیر مہندی کے ساتھ فلم ’ویلکم ٹو دی جنگل‘ میں کام کیا ہے اور وہ ان کی صحت سے متعلق مسائل سے بھی واقف ہیں۔انہوں نے بتایا کہ دلیر مہندی ان دنوں صحت کے مسائل سے دوچار ہیں اور ان کی صحت یابی کے لیے ہر ممکن کوشش کی جا رہی ہے۔اداکار نے کہا کہ اقتدار اور عہدے ہمیشہ برقرار نہیں رہتے لیکن فن کی اہمیت ہمیشہ قائم رہتی ہے۔ اس لیے فن اور فنکار دونوں احترام کے مستحق ہیں۔
وزیر نے دلیر مہندی کی گلوکاری پر کیوں اعتراض کیا؟
تنازع اس وقت شروع ہوا جب کابینی وزیر سبودھ انیال نے تقریب کے دوران دلیر مہندی کی گلوکاری روک کر ان کی کارکردگی پر سوال اٹھائے۔سوشل میڈیا پر سامنے آنے والی ویڈیو میں وزیر کو گلوکار سے یہ کہتے ہوئے سنا جا سکتا ہے کہ انہیں حاضرین کی تفریح کے لیے بلایا گیا تھا۔ انہوں نے دلیر مہندی سے یہ بھی کہا کہ انہیں ایک معروف فنکار کی حیثیت سے اپنی ساکھ کا خیال رکھنا چاہیے۔اس واقعے کے بعد سوشل میڈیا پر بعض افراد نے دعویٰ کیا کہ دلیر مہندی نشے کی حالت میں تھے اور انہیں گانے میں دشواری پیش آ رہی تھی۔ تاہم ان الزامات کی آزادانہ طور پر تصدیق نہیں ہو سکی ہے۔بعد میں خبر رساں ادارے اے این آئی سے گفتگو کرتے ہوئے سبودھ انیال نے کہا کہ انہوں ن
