انہوں نے سوشل میڈیا پلیٹ فارم ایکس پر لکھا کہ موسیقی میں مختلف دنیاؤں کو ایک دوسرے سے جوڑنے کی خوبصورت صلاحیت ہوتی ہے۔انہوں نے مزید کہا کہ رامائن کے لیے ہانس زیمر کے ساتھ کام کرنا ایک خاص تخلیقی سفر رہا ہے۔ اس دوران موسیقی کے نئے امکانات تلاش کیے گئے ہیں اور ساتھ ہی اس لازوال رزمیہ داستان کی اصل روح کو برقرار رکھنے کی کوشش کی گئی ہے۔ انہوں نے کہا کہ وہ اس سفر کا حصہ بننے پر شکر گزار ہیں اور ابھی بہت کچھ ایسا ہے جسے تلاش کرنا اور ناظرین کے ساتھ شیئر کرنا باقی ہے۔

اس اشتراک کے ذریعے مختلف موسیقی کے پس منظر سے تعلق رکھنے والے 2 نامور موسیقار ہندوستانی رزمیہ داستان رامائن کی سنیما پر مبنی پیش کش کے لیے ایک ساتھ آئے ہیں۔فلم ’رامائن‘ میں رنبیر کپور بھگوان رام کے کردار میں نظر آئیں گے جبکہ سائی پلوی سیتا کا کردار ادا کریں گی۔ راکنگ اسٹار یش راون کے کردار میں ہوں گے جبکہ سنی دیول ہنومان اور روی دوبے لکشمن کا کردار ادا کریں گے۔

نتیش تیواری کی ہدایت کاری میں بننے والی اس فلم کو نمیت ملہوترا کے پرائم فوکس اسٹوڈیوز نے پروڈیوس کیا ہے۔ اس پروجیکٹ میں 8 مرتبہ آسکر ایوارڈ جیتنے والے ویژول ایفیکٹس اور پروڈکشن اسٹوڈیو ڈی این ای جی اور یش کے مونسٹر مائنڈ کریشنز بھی شریک ہیں۔’رامائن‘ کو 2 حصوں پر مشتمل ایک بڑے سنیما پروجیکٹ کے طور پر تیار کیا جا رہا ہے۔ اس کا پہلا حصہ 5 نومبر 2026 کو دنیا بھر کے سنیما گھروں میں ریلیز ہوگا جبکہ دوسرا حصہ دیوالی 2027 کے موقع پر پیش کیا جائے گا۔

دریں اثنا اے آر رحمان کو آئیفا ویک اینڈ اینڈ ایوارڈز 2026 میں فلم ’چھاوا‘ کے لیے بہترین بیک گراؤنڈ اسکور کا ایوارڈ بھی دیا گیا ہے۔آئیفا نے ایک باضابطہ خط کے ذریعے رحمان کو مبارک باد دیتے ہوئے بتایا کہ ان کے کام کو آئیفا انڈسٹری ووٹنگ کے عمل کی تکمیل اور توثیق کے بعد اس ایوارڈ کے لیے منتخب کیا گیا ہے۔خط میں کہا گیا کہ فلمی صنعت اور ان کے ہم عصر فنکاروں نے رحمان کی موسیقی کو سال کی نمایاں تخلیقی پیش کشوں میں سے ایک تسلیم کیا ہے۔ آئیفا نے گزشتہ 25 برس سے زائد عرصے میں ہندوستانی سنیما اور اس کے فنکاروں کی صلاحیتوں کو عالمی سطح پر متعارف کرانے میں اپنے کردار کا بھی ذکر کیا۔

آئیفا نے واضح کیا کہ اس سال باقاعدہ تقریب منعقد نہیں کی جائے گی تاہم ایوارڈ کی ٹرافی اے آر رحمان کو پیش کی جائے گی تاکہ اس اعزاز کی علامت کے طور پر اسے ان کے حوالے کیا جا سکے۔یہ خط آئیفا کے نمائندوں آندرے ٹمِنز ویراف سرکاری اور سبّاس جوزف نے دستخط کے ساتھ جاری کیا۔ ادارے نے رحمان کو مبارک باد دیتے ہوئے امید ظاہر کی کہ وہ آئندہ بھی ہندوستانی سنیما کے لیے اپنی تخلیقی خدمات جاری رکھیں گے۔