نئی دہلی:جامعہ ملیہ اسلامیہ نے یو آئی گرین میٹرک ورلڈ یونیورسٹی رینکنگ 2026 میں نمایاں پیش رفت کرتے ہوئے عالمی سطح پر 334واں مقام حاصل کیا ہے۔ 2025 کی درجہ بندی میں جامعہ 376ویں نمبر پر تھی۔ اس طرح یونیورسٹی نے ایک سال کے دوران عالمی درجہ بندی میں 42 درجے کی بہتری درج کی ہے۔جامعہ ملیہ اسلامیہ نے ہندوستان میں 13واں اور ایشیا میں 192واں مقام حاصل کیا ہے۔ یہ کامیابی پائیداری۔ ماحولیاتی ذمہ داری اور کیمپس میں پائیدار ترقی کے لیے یونیورسٹی کی مسلسل کوششوں کی عکاسی کرتی ہے۔

یو آئی گرین میٹرک ورلڈ یونیورسٹی رینکنگ یونیورسٹیٹاس انڈونیشیا سے وابستہ ایک بین الاقوامی پائیداری درجہ بندی ہے۔ اس میں دنیا بھر کی یونیورسٹیوں کی پائیدار ترقی اور کیمپس میں پائیداری سے متعلق مختلف پہلوؤں کی بنیاد پر کارکردگی کا جائزہ لیا جاتا ہے۔ 2026 کی درجہ بندی میں دنیا بھر کی یونیورسٹیاں شامل کی گئی ہیں اور ان کی کارکردگی کا جائزہ پائیداری سے متعلق مختلف اہم اشاریوں کی بنیاد پر لیا گیا ہے۔

جامعہ ملیہ اسلامیہ کے وائس چانسلر پروفیسر مظہر آصف نے اس کامیابی پر یونیورسٹی کے تمام اساتذہ۔ طلبہ۔ محققین۔ سابق طلبہ اور عملے کو مبارک باد دی۔ انہوں نے کہا کہ یہ کامیابی جامعہ کی تعلیمی فضیلت۔ ماحولیاتی ذمہ داری۔ پائیدار ترقی اور اعلیٰ تعلیم میں معیار کے حصول کے لیے مسلسل کوششوں کا ثبوت ہے۔وائس چانسلر نے اس اعتماد کا اظہار کیا کہ جامعہ مستقبل میں پائیداری سے متعلق اپنے اقدامات کو مزید مضبوط کرے گی اور اس شعبے میں مزید اہم سنگ میل عبور کرے گی۔

جامعہ کے رجسٹرار پروفیسر محمد مہتاب عالم رضوی نے بھی اس کامیابی کو یونیورسٹی کے لیے باعث فخر قرار دیا۔ انہوں نے قومی اور بین الاقوامی سطح پر جامعہ کی تعلیمی اور ادارہ جاتی حیثیت کو مستحکم کرنے میں تمام متعلقین کی اجتماعی کوششوں کو سراہا۔یونیورسٹی نے انٹرنل کوالٹی ایشورنس سیل یعنی IQAC کی ڈائریکٹر پروفیسر رفعت پروین اور ان کی ٹیم کے کردار کو بھی سراہا۔ IQAC نے معیار کی یقین دہانی۔ ادارہ جاتی ڈیٹا مینجمنٹ۔ درجہ بندی اور ایکریڈیٹیشن کے عمل۔ پائیداری سے متعلق ڈیٹا کی تیاری اور شواہد پر مبنی نظم و نسق کے شعبوں میں مسلسل کام کیا ہے۔ اس کوشش نے مختلف قومی اور بین الاقوامی درجہ بندی کے فریم ورکس میں جامعہ کی کارکردگی کو بہتر بنانے میں اہم کردار ادا کیا ہے۔

یہ کامیابی جامعہ ملیہ اسلامیہ کی مختلف فیکلٹیز۔ شعبہ جات۔ مراکز۔ انتظامی اکائیوں۔ اساتذہ۔ طلبہ۔ محققین اور عملے کی اجتماعی کوششوں کا نتیجہ ہے۔ کیمپس میں پائیدار طریقوں کے نفاذ۔ ماحولیاتی انتظام۔ وسائل کے تحفظ۔ ماحول دوست بنیادی ڈھانچے اور ذمہ دارانہ ادارہ جاتی ترقی کے لیے کی جانے والی کوششوں نے عالمی سطح پر جامعہ کی پائیداری سے متعلق حیثیت کو مزید مضبوط کیا ہے۔

یو آئی گرین میٹرک عالمی درجہ بندی میں جامعہ کی مسلسل بہتری اس عزم کی عکاسی کرتی ہے کہ یونیورسٹی پائیداری۔ ماحولیاتی شعور اور وسائل کے ذمہ دارانہ استعمال کو اپنے تعلیمی۔ تحقیقی اور انتظامی نظام کا لازمی حصہ بنا رہی ہے۔عالمی سطح پر 334ویں۔ ہندوستان میں 13ویں اور ایشیا میں 192ویں پوزیشن حاصل کرنے کے ساتھ جامعہ ملیہ اسلامیہ نے پائیداری اور عالمی شناخت کے میدان میں اپنی پیش رفت کو مزید مضبوط کیا ہے۔