جامعہ ملیہ اسلامیہ عالمی بین علومی سائنس رینکنگ 2027 میں 69ویں مقام پر

Story by  ATV | Posted by  [email protected] | Date 20-11-2026
جامعہ ملیہ اسلامیہ عالمی بین علومی سائنس رینکنگ 2027 میں 69ویں مقام پر
جامعہ ملیہ اسلامیہ عالمی بین علومی سائنس رینکنگ 2027 میں 69ویں مقام پر

 



نئی دہلی : جامعہ ملیہ اسلامیہ نئی دہلی نے ٹائمز ہائر ایجوکیشن  کی بین علومی سائنس رینکنگ 2027 میں عالمی سطح پر 69واں مقام حاصل کیا ہے۔ یہ کامیابی جامعہ کے بڑھتے ہوئے عالمی تعلیمی وقار اور تحقیق کے میدان میں اس کی مضبوط ہوتی شناخت کا ثبوت ہے۔ ٹائمز ہائر ایجوکیشن کی جانب سے جاری کردہ عالمی یونیورسٹی رینکنگز کی تازہ فہرست میں جامعہ کو دنیا کی ممتاز جامعات میں شامل کیا گیا ہے۔ یہ درجہ بندی تدریس اور تحقیق کے ساتھ علم کی تخلیق اور اختراعات کے شعبوں میں یونیورسٹیوں کی کارکردگی کا جائزہ لیتی ہے۔ اس میں بالخصوص بین علومی تحقیق کے ذریعے پیچیدہ عالمی مسائل کے حل میں جامعات کے کردار کو جانچا جاتا ہے۔ اس مقصد کے لیے تحقیقی وسائل اور سہولیات (ان پٹ) تحقیقی عمل (پروسیس) اور تحقیقی نتائج (آؤٹ پٹ) جیسے اہم معیارات کو بنیاد بنایا جاتا ہے۔

عالمی سطح پر 69واں مقام حاصل کرنا جامعہ کے مضبوط تعلیمی اور تحقیقی نظام کا مظہر ہے۔ اس کامیابی میں اساتذہ اور محققین کے ساتھ طلبہ اور یونیورسٹی کے افسران و ملازمین کی اجتماعی کوششوں کا اہم کردار ہے۔ یہ کامیابی معیاری تعلیم اور مؤثر تحقیق کے فروغ کے لیے جامعہ کے عزم کی بھی عکاسی کرتی ہے۔جامعہ ملیہ اسلامیہ کے شیخ الجامعہ پروفیسر مظہر آصف نے اس کامیابی پر یونیورسٹی کے اساتذہ اور محققین سمیت طلبہ اور تمام متعلقہ عملے کو مبارک باد پیش کی۔ انہوں نے بین الاقوامی درجہ بندی میں جامعہ کی نمایاں کارکردگی میں ان کی اجتماعی کوششوں کو سراہتے ہوئے تعلیمی معیار اور تحقیقی عمدگی کو مزید بہتر بنانے کے عزم کا اعادہ کیا۔ انہوں نے اختراعات اور بین علومی تحقیق کے فروغ کے ساتھ عالمی تعلیمی اداروں سے روابط مضبوط بنانے کی اہمیت پر بھی زور دیا۔

جامعہ کے مسجل پروفیسر محمد مہتاب عالم رضوی نے بھی اس کامیابی پر پوری یونیورسٹی برادری کو مبارک باد دی۔ انہوں نے کہا کہ یہ رینکنگ جامعہ کے محققین کی جانب سے سائنس اور بین علومی سائنسی تحقیق کے شعبوں میں کی جانے والی پیش رفت اور جدید تحقیق کا اعتراف ہے۔ یہ جامعہ کے اساتذہ کی تدریسی اور تحقیقی صلاحیتوں کا بھی ثبوت ہے جنہوں نے وقت کے ساتھ اپنے معیار کو مزید بہتر بنایا ہے۔ اسی کا نتیجہ ہے کہ جامعہ کو قومی اور بین الاقوامی سطح پر وسیع پذیرائی اور شناخت حاصل ہو رہی ہے۔

داخلی معیار کی یقین دہانی سیل (IQAC) کی اعزازی ڈائریکٹر پروفیسر رفعت پروین نے بھی جامعہ کی اس کامیابی پر پوری برادری کو مبارک باد دی۔ انہوں نے قومی اور بین الاقوامی درجہ بندی کے لیے درکار ادارہ جاتی اعداد و شمار اور معلومات جمع کرنے اور مرتب کرنے کے ساتھ ان کی تصدیق اور بروقت فراہمی میں آئی کیو اے سی ٹیم کی کوششوں کو سراہا۔

جامعہ نے آئی کیو اے سی ٹیم کے علاوہ مختلف فیکلٹیز اور شعبہ جات کے ساتھ مراکز اور انتظامی اکائیوں کے عملے کی خدمات کا بھی اعتراف کیا ہے۔ ان تمام اداروں کی مشترکہ کوششوں نے جامعہ کی ساکھ مستحکم کرنے اور عالمی درجہ بندی کے مختلف مراحل میں اس کی کارکردگی بہتر بنانے میں اہم کردار ادا کیا ہے۔جامعہ ملیہ اسلامیہ نے اپنے تعلیمی اور تحقیقی نظام کو مزید مستحکم بنانے اور معیار کی یقین دہانی کے طریقہ کار کو بہتر بنانے کے عزم کا اظہار کیا ہے۔ یونیورسٹی قومی اور بین الاقوامی درجہ بندی میں اپنی پوزیشن مزید بہتر بنانے کے لیے بھی مسلسل کوششیں جاری رکھے گی۔