جامعہ ملیہ اسلامیہ: ذہنی صحت کے لیے نئی پہل: 40 طلبہ رضاکاروں پر مشتمل پیئر سپورٹ پروگرام اور ویلنس کنیکٹ ہیلپ لائن شروع

Story by  ATV | Posted by  [email protected] | Date 19-11-2026
جامعہ ملیہ اسلامیہ میں ذہنی صحت کے لیے نئی پہل: 40 طلبہ رضاکاروں پر مشتمل پیئر سپورٹ پروگرام اور ویلنس کنیکٹ ہیلپ لائن شروع
جامعہ ملیہ اسلامیہ میں ذہنی صحت کے لیے نئی پہل: 40 طلبہ رضاکاروں پر مشتمل پیئر سپورٹ پروگرام اور ویلنس کنیکٹ ہیلپ لائن شروع

 



نئی دہلی،   جامعہ ملیہ اسلامیہ نے طلبہ کی ذہنی صحت اور جذباتی بہبود کو فروغ دینے کے لیے ایک اہم قدم اٹھاتے ہوئے پیئر سپورٹ والنٹیر پروگرام اور جامعہ ویلنس کنیکٹ ہیلپ لائن کا آغاز کیا ہے۔ یونیورسٹی کے مینٹل ہیلتھ اینڈ ویلنس سیل نے سوسائٹی فار دی پروموشن آف یوتھ اینڈ ماسز (SPYM) کے اشتراک سے یہ پہل شروع کی ہے۔ اس کا مقصد طلبہ کو ذہنی دباؤ اور جذباتی مسائل سے نمٹنے کے لیے بروقت۔ قابل رسائی اور رازداری پر مبنی مدد فراہم کرنا ہے۔

اس اقدام کے ساتھ جامعہ ملیہ اسلامیہ ملک کی ان اولین یونیورسٹیوں میں شامل ہوگئی ہے جہاں طلبہ کی ذہنی صحت کے لیے ایک جامع معاونتی نظام قائم کیا گیا ہے۔ یہ نظام سپریم کورٹ آف انڈیا۔ وزارت تعلیم۔ وزارت سماجی انصاف و تفویض اختیارات اور یونیورسٹی گرانٹس کمیشن (UGC) کی متعلقہ ہدایات سے ہم آہنگ ہے۔

پروگرام اور ہیلپ لائن کا افتتاح جامعہ کے شیخ الجامعہ پروفیسر مظہر آصف اور رجسٹرار پروفیسر محمد مہتاب عالم رضوی نے کیا۔ اس موقع پر SPYM کے نیشنل مینٹور کے نارائن۔ نیشنل ٹیکنیکل ایڈوائزر گیری ریڈ اور مینٹل ہیلتھ اینڈ ویلنس سیل کے چیئرمین و ڈین فیکلٹی آف سوشل سائنسز پروفیسر زبیر مینائی بھی موجود تھے۔ اس پروگرام کا تصور پیش کرنے اور اسے عملی شکل دینے میں پروفیسر زبیر مینائی نے اہم کردار ادا کیا ہے۔

40 طلبہ رضاکاروں کا انتخاب اور خصوصی تربیت

اس پروگرام کا بنیادی حصہ 40 تربیت یافتہ طلبہ رضاکاروں پر مشتمل ہے۔ ان کا انتخاب جامعہ کے مختلف شعبوں اور مراکز سے کیا گیا ہے۔ یہ رضاکار اپنے ساتھی طلبہ کو ابتدائی جذباتی اور نفسیاتی مدد فراہم کریں گے۔ انہیں متعلقہ اساتذہ کی سرپرستی حاصل ہوگی جبکہ SPYM کے تربیت یافتہ مشیروں اور جامعہ کے شعبہ نفسیات نے بھی ان کی خصوصی تربیت کی ہے۔

رضاکاروں کا انتخاب ایک سخت اور مسابقتی عمل کے ذریعے کیا گیا۔ اگست 2026 میں 140 طلبہ نے رضاکارانہ خدمات انجام دینے کے لیے اپنی آمادگی ظاہر کی تھی۔ درخواستوں کی جانچ اور انٹرویو کے بعد ان میں سے صرف 40 امیدواروں کو منتخب کیا گیا۔ بعد ازاں انہیں ضروری مہارتوں۔ نفسیاتی آگاہی۔ ہمدردی اور حساسیت کے حوالے سے تفصیلی تربیت دی گئی تاکہ وہ اپنے ساتھیوں کے مسائل کو سمجھنے اور مناسب رہنمائی فراہم کرنے کے قابل ہوسکیں۔

یہ پروگرام ہم عمر طلبہ کے درمیان تعاون کے ایک ایسے مربوط ماڈل پر مبنی ہے جس میں رضاکاروں کی خدمات کو پیشہ ورانہ مشاورت اور اساتذہ کی نگرانی سے جوڑا گیا ہے۔

واٹس ایپ کے ذریعے 24 گھنٹے ذہنی صحت کی مدد

اس اقدام کی ایک اہم خصوصیت جامعہ ویلنس کنیکٹ ڈیجیٹل ہیلپ لائن ہے۔ طلبہ واٹس ایپ نمبر 9911266684 کے ذریعے اس سہولت سے رابطہ کرسکتے ہیں۔ یہ ہیلپ لائن انگریزی۔ ہندی اور اردو تین زبانوں میں دستیاب ہے اور اس کے ذریعے طلبہ تین مراحل میں مدد حاصل کرسکتے ہیں۔

طلبہ اپنی شناخت ظاہر کیے بغیر کسی بھی فرضی نام یا عرفی نام سے رابطہ کرسکتے ہیں۔ انہیں یہ اختیار بھی حاصل ہوگا کہ وہ اپنی پسند کے مطابق کسی مرد یا خاتون کونسلر سے بات کریں۔ اس نظام میں طلبہ کی رازداری۔ سہولت اور ذاتی وقار کو خاص اہمیت دی گئی ہے۔

ہیلپ لائن کے ذریعے طلبہ اپنے مسائل تربیت یافتہ پیئر سپورٹ رضاکاروں کے ساتھ شیئر کرسکیں گے۔ رضاکار ابتدائی رہنمائی فراہم کریں گے اور ضرورت پڑنے پر متعلقہ فیکلٹی مینٹرز سے مدد لیں گے۔ ایسے معاملات جن میں پیشہ ورانہ طبی یا نفسیاتی علاج کی ضرورت ہوگی انہیں مناسب اسپتال یا طبی مرکز منتقل کیا جائے گا۔

ہیلپ لائن میں پولیس ایمرجنسی نمبر 112 تک رسائی کی سہولت بھی شامل کی گئی ہے تاکہ ہنگامی حالات میں طلبہ فوری مدد حاصل کرسکیں۔ اس کا بنیادی مقصد ایسا محفوظ اور قابل اعتماد ماحول فراہم کرنا ہے جہاں طلبہ سماجی بدنامی یا اپنی شناخت ظاہر ہونے کے خوف کے بغیر اپنے مسائل بیان کرسکیں۔

پروفیسر مظہر آصف: نوجوانوں کی ذہنی صحت کا تحفظ ہماری اہم ذمہ داری

پروگرام کے آغاز پر شیخ الجامعہ پروفیسر مظہر آصف نے طلبہ رضاکاروں۔ مینٹل ہیلتھ اینڈ ویلنس سیل۔ SPYM اور متعلقہ شعبوں کو مبارکباد پیش کی۔ انہوں نے کہا کہ آج کے نوجوانوں کو مالی۔ نفسیاتی اور جذباتی سطح پر پہلے سے کہیں زیادہ دباؤ کا سامنا ہے۔ ایسے حالات میں انہیں بامعنی تعاون فراہم کرنا۔ ذہنی صحت کو فروغ دینا اور ان کی مجموعی فلاح و بہبود کو یقینی بنانا ہماری اہم ذمہ داری ہے۔

انہوں نے کہا کہ جامعہ نے یہ پروگرام اس مقصد سے شروع کیا ہے کہ طلبہ کو سال بھر معیاری ذہنی صحت کی خدمات دستیاب رہیں اور یونیورسٹی کے محفوظ اور پرسکون ماحول میں انہیں 24 گھنٹے مدد مل سکے۔

پروفیسر آصف نے امید ظاہر کی کہ یہ اقدام نہ صرف جامعہ کے طلبہ بلکہ ملک کے نوجوانوں اور مجموعی طور پر قوم کے لیے بھی ایک دیرپا مثال ثابت ہوگا۔ انہوں نے کہا کہ ادارہ جاتی عزم۔ پیشہ ورانہ رہنمائی اور طلبہ کی فعال شرکت کے ذریعے اس پروگرام کو مزید وسعت دی جاسکتی ہے۔

پروفیسر مہتاب عالم رضوی: جامعہ کے 22 ہزار سے زائد طلبہ کے لیے اہم اقدام

رجسٹرار پروفیسر محمد مہتاب عالم رضوی نے مینٹل ہیلتھ اینڈ ویلنس سیل۔ SPYM اور طلبہ رضاکاروں کی کوششوں کو سراہتے ہوئے کہا کہ انہوں نے ایک تصور کو مختصر مدت میں عملی شکل دیتے ہوئے ایک مؤثر ڈیجیٹل معاونتی نظام قائم کیا ہے۔

انہوں نے کہا کہ یہ اقدام جامعہ ملیہ اسلامیہ کے اس دیرینہ مشن کی عکاسی کرتا ہے جس کا مقصد طلبہ کو نفسیاتی اور جذباتی سہارا فراہم کرنا ہے۔ تقریباً 140 طلبہ کا اس رضاکارانہ خدمت کے لیے آگے آنا قابل ستائش ہے اور ان کا جذبہ دوسروں کے لیے مثال ہے۔

پروفیسر رضوی نے کہا کہ یہ پروگرام جامعہ کی 22 ہزار سے زائد طلبہ پر مشتمل کمیونٹی کی ذہنی صحت اور بہبود کے تئیں ادارے کے عزم کا اظہار ہے۔ ساتھ ہی یہ سپریم کورٹ آف انڈیا۔ وزارت تعلیم۔ وزارت سماجی انصاف و تفویض اختیارات۔ وزارت صحت و خاندانی بہبود اور یونیورسٹی گرانٹس کمیشن کی ذہنی صحت سے متعلق ہدایات اور وسیع تر پالیسی ترجیحات سے بھی ہم آہنگ ہے۔

SPYM نے جامعہ کو مثالی ادارہ قرار دیا

SPYM کے نیشنل مینٹور کے نارائن نے کہا کہ ان کی تنظیم کو یقین ہے کہ جامعہ ملیہ اسلامیہ اس نوعیت کے پروگرام کو کامیابی سے نافذ کرنے اور آگے بڑھانے کی بہترین صلاحیت رکھتی ہے۔

ان کے مطابق جامعہ کی تعلیمی قوت۔ فکری گہرائی۔ فلسفیانہ ورثہ اور طلبہ پر مرکوز طرز عمل اسے ایک ایسا مثالی ادارہ بناتے ہیں جو قومی سطح پر نئی مثال قائم کرسکتا ہے۔ انہوں نے امید ظاہر کی کہ یہ پروگرام ملک کی دیگر یونیورسٹیوں کے لیے بھی ایک قابل تقلید نمونہ ثابت ہوگا۔

SPYM کے نیشنل ٹیکنیکل ایڈوائزر گیری ریڈ نے بھی اس اقدام کو سراہتے ہوئے کہا کہ نوجوانوں کی زندگیوں میں مثبت تبدیلی لانے اور معاشرے کی خدمت کا جذبہ اس پروگرام کو ایک منفرد پہچان دیتا ہے۔

انہوں نے کہا کہ یہ پہل جامعہ کو طلبہ کی ذہنی صحت اور فلاح و بہبود کے شعبے میں ایک معیاری ادارے کے طور پر قائم کرنے کی صلاحیت رکھتی ہے۔ اس کا اثر صرف ہندوستان اور جنوبی ایشیا تک محدود نہیں رہے گا بلکہ عالمی سطح پر بھی اس کی مثال پیش کی جاسکتی ہے۔

گیری ریڈ نے خاص طور پر ان طلبہ رضاکاروں کے جذبے کی تعریف کی جو اپنے ساتھیوں کی مشکلات میں ان کا ساتھ دینے کے لیے اپنا وقت وقف کررہے ہیں۔ انہوں نے کہا کہ یونیورسٹی کو اس پروگرام کی ذمہ داری سنجیدگی سے نبھاتے ہوئے صبر اور مستقل مزاجی کے ساتھ اس کی صلاحیتوں کو فروغ دینا چاہیے۔

پروفیسر زبیر مینائی: پیشہ ورانہ رہنمائی اور طلبہ کی شرکت سے مربوط نظام تشکیل دیا گیا

مینٹل ہیلتھ اینڈ ویلنس سیل کے چیئرمین اور ڈین فیکلٹی آف سوشل سائنسز پروفیسر زبیر مینائی نے منتخب 40 طلبہ رضاکاروں کو مبارکباد پیش کی اور انہیں دی جانے والی خصوصی تربیت پر اطمینان کا اظہار کیا۔

انہوں نے کہا کہ انہیں امید ہے کہ وقت کے ساتھ اس پروگرام کو مزید وسعت دی جائے گی اور یہ طلبہ کی ذہنی صحت کے لیے ایک مثالی معاونتی ماڈل بن کر سامنے آئے گا۔

پروفیسر مینائی نے شیخ الجامعہ پروفیسر مظہر آصف اور رجسٹرار پروفیسر مہتاب عالم رضوی کی ذاتی دلچسپی اور مسلسل تعاون کا شکریہ ادا کیا۔ انہوں نے پروگرام اور ہیلپ لائن کی تشکیل اور نفاذ میں SPYM کے تکنیکی۔ انتظامی اور فکری تعاون کو بھی سراہا۔

ان کے مطابق تربیت یافتہ طلبہ رضاکاروں۔ پیشہ ورانہ مشیروں۔ اساتذہ کی سرپرستی۔ ڈیجیٹل رسائی اور ادارہ جاتی تعاون کو یکجا کرکے جامعہ نے طلبہ کی ذہنی صحت کی ضروریات کے لیے ایک مربوط اور ذمہ دار نظام قائم کیا ہے۔

انہوں نے کہا کہ پیئر سپورٹ والنٹیر پروگرام اور جامعہ ویلنس کنیکٹ ہیلپ لائن کا آغاز جامعہ ملیہ اسلامیہ کی اس کوشش میں ایک اہم سنگ میل ہے جس کا مقصد طلبہ کی صحت۔ ذہنی سکون اور مجموعی فلاح و بہبود کو یونیورسٹی کی زندگی کا بنیادی حصہ بنانا ہے۔