علی گڑھ۔: ممتاز مورخ اور علی گڑھ مسلم یونیورسٹی کے پروفیسر ایمریٹس پروفیسر عرفان حبیب نے کہا ہے کہ تقسیم ہند کے بعد علی گڑھ مسلم یونیورسٹی کو محفوظ رکھنے اور اسے دوبارہ مضبوط بنیادوں پر استوار کرنے میں مرکزی حکومت نے اہم کردار ادا کیا۔ انہوں نے کہا کہ پنڈت جواہر لعل نہرو نے اس عظیم درس گاہ کی قومی اہمیت کو بخوبی محسوس کیا تھا۔ وہ متعدد مرتبہ یونیورسٹی آئے اور اس ادارے کو دوبارہ مستحکم کرنے میں مؤثر تعاون فراہم کیا۔

پروفیسر عرفان حبیب یہ بات ڈاکٹر شمیم اختر کی تصنیف "Aligarh Muslim University: A History" کی رسم اجرا کے موقع پر منعقدہ تقریب سے خطاب کرتے ہوئے کہہ رہے تھے۔ تقریب کا انعقاد علی گڑھ مسلم یونیورسٹی کی سر سید اکیڈمی میں کیا گیا۔ اس موقع پر پرو وائس چانسلر پروفیسر محمد محسن خان سمیت متعدد ممتاز علمی شخصیات موجود تھیں جبکہ وائس چانسلر پروفیسر نائمہ خاتون نے بھی تقریب میں شرکت کرتے ہوئے مصنف کو مبارک باد پیش کی۔

پروفیسر عرفان حبیب نے علی گڑھ مسلم یونیورسٹی کے قیام سے متعلق کئی تاریخی واقعات بیان کرتے ہوئے کہا کہ اگرچہ جامعہ کی تاریخ مختلف زاویوں سے لکھی جا چکی ہے لیکن یہ کتاب اس اعتبار سے منفرد ہے کہ اس میں نہ صرف یونیورسٹی کی تاریخ بلکہ معاشرے میں جامعات کے کردار اور ان کے انتظامی و آئینی ڈھانچے کا بھی جامع جائزہ پیش کیا گیا ہے۔

انہوں نے کہا کہ علی گڑھ مسلم یونیورسٹی نے قوم کی تعمیر اور ملک کی ترقی میں بے مثال خدمات انجام دی ہیں۔ اسی کے ساتھ تقسیم کے بعد مرکزی حکومت کی جانب سے اس ادارے کے تحفظ اور استحکام کے لیے کی جانے والی کوششوں کا اعتراف بھی ضروری ہے۔ ان کے مطابق یہ کتاب صرف علی گڑھ مسلم یونیورسٹی کی تاریخ نہیں بلکہ شہر علی گڑھ اور اس ادارے کے ارتقائی سفر کی بھی مفصل داستان ہے۔

تقریب کی صدارت سابق قائم مقام وائس چانسلر پروفیسر محمد گلریز نے کی۔ انہوں نے کہا کہ علی گڑھ مسلم یونیورسٹی کے قیام اور ترقی کے لیے بے شمار لوگوں نے قربانیاں دیں جن میں سر سید احمد خان کا کردار سب سے نمایاں ہے۔ انہوں نے کہا کہ علی گڑھ تحریک کی سب سے بڑی خصوصیت یہ تھی کہ اس نے ہر میدان میں پیش قدمی کی اور ملک میں جدید تعلیم کی بنیاد مضبوط کی۔ انہوں نے یاد دلایا کہ علی گڑھ مسلم یونیورسٹی کا ویمنز کالج 1938 میں قائم ہوا تھا جو دہلی کے کئی معروف تعلیمی اداروں سے پہلے وجود میں آیا۔ ان کے مطابق علی گڑھ تحریک کی متعدد خدمات آج بھی عوامی سطح پر پوری طرح اجاگر نہیں ہو سکیں اور ڈاکٹر شمیم اختر کی یہ کتاب اس کمی کو پورا کرنے کی ایک اہم کوشش ہے۔

مہمان خصوصی اور پرو وائس چانسلر پروفیسر محمد محسن خان نے کہا کہ علی گڑھ تحریک نے ملک کی فکری اور سماجی زندگی کو نئی جہت عطا کی۔ سر سید احمد خان کی قیادت میں روشن خیال فکر کی جو روایت قائم ہوئی اس نے ہندوستانی معاشرے پر گہرے اثرات مرتب کیے۔ انہوں نے کہا کہ تاریخ مستقبل کی رہنمائی کرتی ہے اور علی گڑھ مسلم یونیورسٹی کی تاریخ کو یکجا کرکے ڈاکٹر شمیم اختر نے ایک اہم علمی خدمت انجام دی ہے۔ انہوں نے اس کتاب کی رسم اجرا کو خوش آئند اور یادگار موقع قرار دیا۔

سابق کوآرڈی نیٹر اور شعبۂ تاریخ کے سابق چیئرمین پروفیسر سید علی ندیم رضوی نے کتاب میں اٹھائے گئے مختلف موضوعات پر اظہار خیال کرتے ہوئے کہا کہ یہ تصنیف علی گڑھ مسلم یونیورسٹی کو ایک آئینی۔ انتظامی اور علمی ادارے کے طور پر منفرد انداز میں پیش کرتی ہے۔ انہوں نے چند ایسے پہلوؤں کی بھی نشاندہی کی جنہیں آئندہ ایڈیشن یا نئی کتاب میں شامل کیا جا سکتا ہے۔

سر سید اکیڈمی کے ڈائریکٹر پروفیسر شفیع کدوائی نے استقبالیہ کلمات پیش کرتے ہوئے کہا کہ "Aligarh Muslim University: A History" دراصل جامعہ کا مطالعہ اس کے نظم و نسق اور طرز حکمرانی کے تناظر میں پیش کرتی ہے۔

تقریب کے اختتام پر سر سید اکیڈمی کے ڈپٹی ڈائریکٹر ڈاکٹر محمد شاہد نے شکریہ ادا کیا جبکہ نظامت کے فرائض ڈاکٹر حسین حیدر نے انجام دیے۔