دیوبند،  :دیوبند کے معروف سینئر صحافی ڈاکٹر فیروز خان کے فرزند دانیال خان نے ایم بی بی ایس کی تعلیم کامیابی کے ساتھ مکمل کرتے ہوئے ڈاکٹری کی ڈگری حاصل کر لی ہے۔ اس شاندار کامیابی پر علمی، تعلیمی اور سماجی حلقوں میں خوشی کی لہر دوڑ گئی ہے اور انہیں مبارکباد پیش کی جا رہی ہے۔

ڈاکٹر دانیال خان نے انٹرنیشنل میڈیکل اسکول، یونیورسٹی آف انٹرنیشنل بزنس (قازقستان) سے ایم بی بی ایس کی ڈگری امتیازی کارکردگی کے ساتھ حاصل کی۔ تعلیمی سال 2025-26 میں غیر معمولی تعلیمی کامیابی پر انہیں گولڈ میڈل سے بھی نوازا گیا، جو ان کی محنت، لگن اور علمی صلاحیتوں کا واضح اعتراف ہے۔

انہوں نے ابتدائی تعلیم اسپرنگ ڈیل پبلک اسکول، دیوبند سے حاصل کی، جبکہ دینی تعلیم کے لیے جامعہ اسلامیہ اشاعت العلوم، اکل کوا (مہاراشٹر) سے وابستہ رہے۔ اسی دوران انہوں نے قرآنِ کریم حفظ کرنے کی سعادت بھی حاصل کی، جس کے باعث وہ دینی اور عصری تعلیم کے حسین امتزاج کی ایک عمدہ مثال بن گئے ہیں۔

ڈاکٹر دانیال خان طالب علمی کے زمانے سے ہی نمایاں تعلیمی صلاحیتوں کے حامل رہے ہیں۔ جامعہ اسلامیہ اشاعت العلوم، اکل کوا میں بھی شاندار کامیابی پر انہیں گولڈ میڈلسٹ ایوارڈ سے نوازا جا چکا ہے۔

ایم بی بی ایس کی ڈگری امتیازی نمبروں سے حاصل کرکے انہوں نے نہ صرف اپنے والدین اور خاندان بلکہ پورے دیوبند کا نام روشن کیا ہے۔ ان کی یہ کامیابی مسلسل محنت، عزم، اساتذہ کی رہنمائی اور والدین کی دعاؤں کا ثمرہ قرار دی جا رہی ہے۔

اس موقع پر تعلیمی و سماجی شخصیات نے ڈاکٹر دانیال خان کو مبارکباد دیتے ہوئے ان کے روشن مستقبل، مزید کامیابیوں اور انسانیت کی خدمت کے لیے نیک خواہشات کا اظہار کیا۔

ڈاکٹر دانیال خان نے بتایا کہ وہ ایک سالہ لازمی انٹرن شپ مکمل کرنے کے بعد ایم ڈی کی تعلیم حاصل کریں گے۔ انہوں نے کہا کہ مستقبل میں وہ ایک جدید لیبارٹری اور تشخیصی مرکز قائم کرنا چاہتے ہیں، جہاں رعایتی نرخوں پر طبی جانچ کی سہولت فراہم کی جائے گی، جبکہ غریب اور مستحق افراد کے لیے مفت ٹیسٹ کی سہولت بھی دستیاب ہوگی۔

واضح رہے کہ ایم بی بی ایس طب کے شعبے کی ایک نہایت معتبر پیشہ ورانہ ڈگری ہے، جس کے لیے پانچ سالہ تعلیمی نصاب اور ایک سالہ لازمی انٹرن شپ مکمل کرنا ضروری ہوتا ہے۔ ڈاکٹر دانیال خان کی یہ کامیابی نوجوانوں کے لیے محنت، عزم اور مسلسل جدوجہد کی ایک قابلِ تقلید مثال ہے۔