لاس اینجلس: امریکی ریاست کیلیفورنیا کے شہر لاس اینجلس کے مضافاتی علاقے میں منگل کی رات ایک نیوز ہیلی کاپٹر تجارتی علاقے میں گر کر تباہ ہوگیا، جس کے نتیجے میں کم از کم 3 افراد ہلاک اور متعدد زخمی ہوگئے۔ حکام کے مطابق حادثے کی تحقیقات نیشنل ٹرانسپورٹیشن سیفٹی بورڈ (NTSB) کی قیادت میں کی جائیں گی۔

سی این این کے مطابق این بی سی 4 اور ٹیلی منڈو 52 کے لیے کام کرنے والا ہیلی کاپٹر مقامی وقت کے مطابق شام تقریباً 7 بجے لاس اینجلس کے مرکز سے تقریباً 25 میل شمال مغرب میں واقع علاقے چیٹس ورتھ میں گر کر تباہ ہوا۔ ہیلی کاپٹر اس وقت علاقے میں ہونے والے ایک خبر رساں آپریشن کے تحت فضائی کوریج کر رہا تھا۔

این بی سی 4 کی ویب سائٹ کے مطابق نیوز چاپر 4 (NewsChopper4) کے نام سے شناخت ہونے والا یہ ہیلی کاپٹر اینجل سٹی ایئر کے زیرِ انتظام تھا اور علاقے میں پیش آنے والے ایک مہلک میٹرو بس حادثے کی فضائی کوریج کر رہا تھا۔ اسٹیشن کی اینکر کولین ولیمز نے براہِ راست نشریات کے دوران تصدیق کی کہ حادثے میں اس کی ہیلی کاپٹر ٹیم بھی شامل تھی۔ اس سے قبل اسٹیشن نے عملے سے رابطہ منقطع ہونے کی اطلاع دی تھی۔

جائے حادثہ پر 3 افراد ہلاک

دونوں ٹی وی اسٹیشنوں نے مشترکہ بیان میں کہا، ’’ہمیں انتہائی افسوس کے ساتھ اطلاع دینا پڑ رہی ہے کہ این بی سی 4 اور ٹیلی منڈو 52 کے لیے فضائی کوریج فراہم کرنے والا ہیلی کاپٹر منگل کی شام لاس اینجلس میں ایک مہلک حادثے کا شکار ہوگیا۔ ہم جان سے جانے والے افراد کے اہل خانہ، دوستوں اور ساتھیوں سے دلی تعزیت کا اظہار کرتے ہیں۔‘‘

سی این این کے مطابق جائے حادثہ پر 3 افراد کو مردہ قرار دیا گیا، جبکہ کم از کم 2 زخمیوں کو اسپتال منتقل کیا گیا۔ ہلاک ہونے والوں کی شناخت فوری طور پر جاری نہیں کی گئی۔

لاس اینجلس فائر ڈپارٹمنٹ کے کیپٹن برینڈن سلورمین نے صحافیوں کو بتایا کہ ہلاک ہونے والوں میں ایک شخص ایسا راہ گیر تھا جو پارکنگ لاٹ میں موجود تھا۔ ان کے مطابق لاس اینجلس پولیس ڈیپارٹمنٹ کے اہلکاروں نے اس شخص کو آگ کے قریب سے نکالا۔

سلورمین نے بتایا کہ ہیلی کاپٹر ’’بری طرح تباہ‘‘ ہوگیا ہے اور ملبے کی تلاش کے بعد ہی متاثرین اور ہیلی کاپٹر کی شناخت سے متعلق مزید معلومات سامنے آسکیں گی۔

حادثے کے بعد آگ بھڑک اٹھی

سی این این کے مطابق ہیلی کاپٹر کئی گاڑیوں اور دو بڑے کارگو کنٹینرز کے قریب گرا، جس کے بعد آگ بھڑک اٹھی۔ بعد میں آگ پر قابو پالیا گیا، تاہم 4 گاڑیوں اور 2 اسٹوریج کنٹینرز کو نقصان پہنچا۔

حادثے کے مقام پر 70 سے زیادہ فائر فائٹرز نے کارروائی میں حصہ لیا۔

لاس اینجلس پولیس ڈیپارٹمنٹ نے ایکس پر جاری بیان میں کہا کہ 15 ستمبر 2026 کو مقامی وقت کے مطابق شام 6 بج کر 58 منٹ پر پولیس اہلکاروں نے چیٹس ورتھ میں لورلائن ایونیو اور نارتھوف اسٹریٹ کے علاقے میں ہیلی کاپٹر حادثے کی اطلاع ملنے کے بعد کارروائی کی۔

این ٹی ایس بی کرے گا تحقیقات

لاس اینجلس پولیس نے بتایا کہ نیشنل ٹرانسپورٹیشن سیفٹی بورڈ (NTSB) حادثے کی تحقیقات کی قیادت کرے گا۔

لاس اینجلس کی میئر کیرن باس نے بھی تصدیق کی کہ تحقیقات این ٹی ایس بی کی سربراہی میں ہوں گی اور اس کا ایک تفتیش کار بدھ کی صبح جائے حادثہ پر پہنچنے کی توقع ہے۔

کیرن باس نے ایکس پر کہا، ’’یہ لاس اینجلس کے لیے ایک المناک رات ہے۔ میری ہمدردیاں بس حادثے اور ہیلی کاپٹر حادثے سے متاثر ہونے والے تمام افراد اور این بی سی 4 کے پورے خاندان کے ساتھ ہیں، جس نے اپنے فرائض انجام دیتے ہوئے اپنی ٹیم کے ارکان کو کھو دیا۔‘‘

انہوں نے امدادی کارروائیوں میں حصہ لینے والے فائر فائٹرز، طبی عملے اور پولیس اہلکاروں کا شکریہ ادا کرتے ہوئے کہا کہ ان اہلکاروں نے دونوں انتہائی مشکل مقامات پر فوری پہنچ کر جانیں بچانے اور امداد فراہم کرنے کی کوشش کی۔

حادثے کی وجہ تاحال معلوم نہیں

سی این این کے مطابق حادثے کی وجہ تاحال معلوم نہیں ہوسکی ہے اور حکام نے یہ بھی نہیں بتایا کہ حادثے کے وقت ہیلی کاپٹر میں کتنے افراد سوار تھے۔ فیڈرل ایوی ایشن ایڈمنسٹریشن (FAA) بھی تحقیقات میں شامل ہے۔

سی این این کے حوالے سے ایف اے اے کے ریکارڈ کے مطابق حادثے کا شکار ہونے والا طیارہ یورو کاپٹر AS350 B2 تھا، جو 2004 میں تیار کیا گیا تھا اور ایک انجن والا یوٹیلیٹی ہیلی کاپٹر تھا۔

کیلیفورنیا کے گورنر گیون نیوسم نے بھی فیس بک پر جاری بیان میں ہلاک ہونے والوں اور ان کے اہل خانہ سے تعزیت کا اظہار کیا۔ انہوں نے کہا کہ ان کی ہمدردیاں چیٹس ورتھ میں ہونے والے میٹرو بس اور ہیلی کاپٹر حادثات کے متاثرین اور این بی سی 4 کے پورے خاندان کے ساتھ ہیں۔

لاس اینجلس کاؤنٹی بورڈ آف سپروائزرز کی رکن لنڈسی ہورواتھ نے کہا کہ اس واقعے کے حوالے سے ’’سنگین سوالات‘‘ موجود ہیں، تاہم انہوں نے کہا کہ اس وقت ان سوالات کے جوابات کے بارے میں قیاس آرائی کرنے کے بجائے متاثرہ افراد کی مدد، امدادی کارکنوں کی حمایت اور کمیونٹی کے ساتھ کھڑے ہونے پر توجہ دینی چاہیے۔