نیویارک: اقوام متحدہ کے سیکریٹری جنرل انتونیو گوتریس نے مصنوعی ذہانت (اے آئی) کی محفوظ اور ذمہ دارانہ ترقی کو یقینی بنانے کے لیے بین الاقوامی تعاون مضبوط کرنے کی اپیل کی ہے۔ انہوں نے کہا کہ دنیا تیزی سے طاقتور ہوتی اے آئی ٹیکنالوجی تیار کر رہی ہے، لیکن اس سے پیدا ہونے والے خطرات کے بارے میں ہماری سمجھ اس رفتار سے آگے نہیں بڑھ رہی۔ گوتریس نے ایکس پر جاری اپنی پوسٹ میں کہا کہ اے آئی میں بے پناہ صلاحیت موجود ہے، لیکن اسے تیار کرنے والے لوگوں کی بڑھتی تعداد خود خبردار کر رہی ہے کہ ٹیکنالوجی کی ترقی، اس کے ممکنہ خطرات کو سمجھنے کی ہماری صلاحیت سے کہیں زیادہ تیز ہے۔

انہوں نے کہا کہ ان خدشات کو نظر انداز نہیں کیا جا سکتا اور اے آئی کو محفوظ، شفاف اور جواب دہ بنانے کے لیے حقیقی بین الاقوامی تعاون اور مربوط عالمی کوشش کی ضرورت ہے، جس میں انسانی وقار کو مرکز میں رکھا جائے۔ اقوام متحدہ کے جنرل اسمبلی کے 81ویں اجلاس کے آغاز پر بدھ کو ایک پریس کانفرنس سے خطاب کرتے ہوئے گوتریس نے کہا کہ اے آئی پائیدار ترقی کو تیز کرنے، تعلیم کو بہتر بنانے، صحت کی سہولتوں کو مضبوط کرنے اور موسمیاتی تبدیلیوں سے نمٹنے کی صلاحیت بڑھانے میں اہم کردار ادا کر سکتی ہے۔ تاہم، انہوں نے کہا کہ اس ٹیکنالوجی پر کام کرنے والے افراد کی جانب سے اٹھائے گئے خدشات کو سنجیدگی سے لینا ضروری ہے۔

انہوں نے کہا کہ کچھ لوگ اے آئی کی ترقی میں وقفے کا مطالبہ کر رہے ہیں، جبکہ بہت سے لوگ اس کے لیے حفاظتی ضوابط اور حدود مقرر کرنے کی بات کر رہے ہیں۔ گوتریس کے مطابق، خاص طور پر وہ خدشات نظر انداز نہیں کیے جانے چاہئیں جو اے آئی کی ترقی کے محاذ پر براہِ راست کام کرنے والے افراد نے ظاہر کیے ہیں۔ اقوام متحدہ کے سربراہ نے کہا کہ حکومتوں کی ذمہ داری ہے کہ وہ اپنے شہریوں کو اے آئی سے پیدا ہونے والے نئے خطرات سے محفوظ رکھیں۔ ان کے مطابق قومی سطح پر اقدامات ضروری ہیں، لیکن صرف قومی اقدامات کافی نہیں ہوں گے۔ اے آئی کی سرحدوں سے بالاتر نوعیت کے پیش نظر عالمی سطح پر تعاون بھی ناگزیر ہے۔

گوتریس نے خبردار کیا کہ الگ الگ اور غیر یکساں رضاکارانہ اقدامات اے آئی سے متعلق چیلنجز سے نمٹنے کے لیے کافی نہیں ہوں گے۔ ان کا کہنا تھا کہ عالمی برادری کو ایسے طریقہ کار کی ضرورت ہے جن کے ذریعے اے آئی سے متعلق پالیسیاں سائنسی شواہد کی بنیاد پر مرتب کی جا سکیں۔ انہوں نے بتایا کہ اقوام متحدہ نے آزاد بین الاقوامی سائنسی پینل برائے اے آئی کے ذریعے دنیا بھر کے سائنسی ماہرین کو یکجا کیا ہے، تاکہ پالیسی سازی میں سائنسی شواہد کو بنیادی حیثیت حاصل ہو

اے آئی کی تیز رفتار ترقی اور اس کے ممکنہ خطرات کے حوالے سے ٹیکنالوجی کی صنعت میں بھی بحث جاری ہے۔ بعض نمایاں ماہرین اور کمپنیوں کے سربراہوں نے اے آئی کی ترقی کی رفتار کم کرنے اور مزید مضبوط حفاظتی اقدامات کا مطالبہ کیا ہے۔ یہ بحث اس وقت مزید نمایاں ہوئی جب اینتھروپک کے چیف ایگزیکٹو داریو امودی نے اے آئی کی ترقی کی رفتار کم کرنے کی بات کہی۔ اس کے بعد اوپن اے آئی کے چیف ایگزیکٹو سیم آلٹمین، مائیکروسافٹ کے چیف ایگزیکٹو ستیہ نڈیلا اور گوگل کے ڈیپ مائنڈ کے سربراہ ڈیماس ہاسابیس سمیت دیگر شخصیات بھی اس بحث میں شامل ہوئیں۔

گوتریس نے کہا کہ بین الاقوامی برادری کو اے آئی کی ترقی کے لیے ایک مشترکہ فریم ورک تیار کرنے کی ضرورت ہے، جس میں یہ طے کیا جا سکے کہ کب زیادہ طاقتور اے آئی نظاموں کے لیے اضافی حفاظتی اقدامات ضروری ہو جاتے ہیں۔ انہوں نے کہا کہ دنیا کو اس بات پر مشترکہ سمجھ پیدا کرنے کی ضرورت ہے کہ اے آئی کو محفوظ، قابلِ اعتماد اور ذمہ دارانہ انداز میں کس طرح آگے بڑھایا جائے اور کب زیادہ طاقتور نظاموں سے پیدا ہونے والے ممکنہ خطرات سے نمٹنے کے لیے مزید سخت حفاظتی اقدامات کیے جائیں۔ گوتریس نے اے آئی کے معاملے کو دنیا کو درپیش دیگر بڑے چیلنجز سے جوڑتے ہوئے کہا کہ موجودہ دور میں بین الاقوامی تعاون پہلے سے زیادہ ضروری ہو گیا ہے۔ ان کے مطابق دنیا کو بے قابو مصنوعی ذہانت، موسمیاتی بحران اور بڑھتی ہوئی عدم مساوات جیسے بڑے خطرات کا سامنا ہے، اس لیے عالمی تعاون کی ضرورت پہلے سے کہیں زیادہ ہے۔