یروشلم،: مقبوضہ مغربی کنارے کے جنوب مغربی علاقے الخلیل میں فائرنگ کے ایک واقعے میں 5 افراد زخمی ہوگئے، جن میں سے 2 کی حالت نازک بتائی گئی ہے۔ اسرائیلی پولیس کے مطابق، حملے میں ملوث 2 فلسطینی مسلح افراد کو گولی مار کر ہلاک کردیا گیا۔ اسرائیلی فوج کے سربراہ لیفٹننٹ جنرل ایال زامیر نے اخبار ٹائمز آف اسرائیل سے گفتگو کرتے ہوئے کہا کہ جنوبی مغربی کنارے میں دونوں فلسطینی مسلح افراد کو ہلاک کرنے والے فوجیوں نے ایک بڑے حملے کو ناکام بنا دیا۔ انہوں نے کہا، ’’یہ ایک سنگین حملہ تھا۔ فوجیوں کی فوری کارروائی نے اس سے بھی زیادہ سنگین حملے اور عام شہریوں اور سکیورٹی اہلکاروں کو مزید نقصان پہنچنے سے روک دیا۔

‘‘ زامیر کے مطابق، حملہ آور جس گاڑی میں سوار ہوکر جائے وقوعہ پر پہنچے تھے، اس میں بڑی مقدار میں گولہ بارود بھی ملا ہے۔ ان کے بقول، یہ گولہ بارود بڑے پیمانے پر حملہ کرنے کے لیے استعمال کیا جانا تھا۔ اسرائیلی فوج کے مطابق، حملہ آوروں کے پاس ایم 16 رائفل اور ایک پستول تھا۔ انہیں ہوم فرنٹ کمانڈ کی اری بٹالین کے نائب کمانڈر اور ایک کمپنی کمانڈر نے گولی مار کر ہلاک کیا۔ دونوں فوجی فائرنگ کی اطلاع ملنے کے بعد فوری طور پر جائے وقوعہ پر پہنچے تھے۔

اسرائیل کے وزیر اعظم بنجامن نیتن یاہو نے حملے کی مذمت کرتے ہوئے کہا کہ اسرائیلی فوج حماس کے ارکان کا تعاقب جاری رکھے گی اور انہیں کہیں بھی محفوظ پناہ گاہ نہیں ملے گی۔ نیتن یاہو نے کہا کہ انہوں نے وزیر دفاع، فوج کے سربراہ، داخلی سلامتی کی ایجنسی شِن بیت کے سربراہ، قومی سلامتی کونسل کے سربراہ اور سینٹرل کمانڈ کے کمانڈر کے ساتھ صورت حال کا جائزہ لیا ہے۔ انہوں نے حملے کو ناکام بنانے والے فوجیوں کی بہادری کی تعریف کی اور زخمیوں کی جلد صحت یابی کی خواہش ظاہر کی۔

انہوں نے مزید کہا کہ انہوں نے اسرائیلی فوج اور سکیورٹی اداروں کو فوری طور پر الخلیل شہر کی ناکہ بندی کرنے اور آج سے پورے یہودیہ اور سامریہ، یعنی مقبوضہ مغربی کنارے، میں مکمل پابندیاں نافذ کرنے کی تیاری کرنے کی ہدایت دی ہے۔ نیتن یاہو کے مطابق، اسرائیلی فورسز دہشت گردی کو روکنے کے لیے مزید طاقت کے ساتھ کارروائیاں کررہی ہیں اور بڑے پیمانے پر گرفتاریاں بھی کی جارہی ہیں۔

انہوں نے کہا کہ حماس کے ارکان اور ان کے بھیجنے والوں کا ہر جگہ اور ہر وقت تعاقب کیا جائے گا۔ اسرائیل کے وزیر قومی سلامتی ایتامار بن گویر نے اس واقعے کے بعد فلسطینی اتھارٹی کو ختم کرنے کا مطالبہ کیا۔ ایک بیان میں انہوں نے کہا، ’’بہت دیر ہونے سے پہلے ہمیں کارروائی کرنی ہوگی۔ فلسطینی اتھارٹی کو ختم اور غیر مسلح کیا جانا چاہیے اور اس کے دہشت گردانہ ڈھانچے کو مکمل طور پر تباہ کردیا جانا چاہیے۔‘‘ یہ حملہ اسرائیل میں ہونے والے انتخابات سے 5 دن پہلے ہوا ہے۔ اس دوران وزیر اعظم نیتن یاہو نے اپنی جماعت لیکوڈ کی جانب سے جمعہ کی صبح کے لیے طے شدہ تمام سیاسی تقریبات منسوخ کرنے کی ہدایت بھی دی ہے۔