ذرائع نے الزام لگایا کہ چھاپوں کے دوران اہلکار زیورات۔ موٹر سائیکلیں۔ گھریلو سامان اور دیگر قیمتی اشیا بھی لے گئے۔ ایک دکان میں توڑ پھوڑ کرکے وہاں موجود سامان بھی لے جانے کی اطلاع ہے۔ایک دوسرے واقعے میں طالب علم طیب ناصر اور پزیر ناصر کو مبینہ طور پر 17 اکتوبر 2026 کو شام تقریباً 5 بجے تربت کے علاقے آپسر میں ان کے گھر سے اٹھا لیا گیا۔ طیب کی عمر 24 سال جبکہ پزیر کی عمر 28 سال بتائی گئی ہے۔ دونوں حاجی ناصر کے بیٹے ہیں۔ پزیر کا تعلق بلیڈہ کے علاقے گیلی سے بتایا گیا ہے۔ رپورٹ کے مطابق پزیر اس سے پہلے بھی 3 مرتبہ جبری گمشدگی کا شکار ہو چکے ہیں اور یہ ان کی چوتھی مبینہ گمشدگی ہے۔

ادھر مستونگ کے سراوان ٹاؤن سے 15 اکتوبر کو دو بھائیوں عزت اللہ بلوچ اور آصف بلوچ کو مبینہ طور پر حراست میں لیا گیا۔ عزت اللہ کی عمر 27 سال اور آصف کی عمر 25 سال بتائی گئی ہے۔ دونوں مکینک ہیں اور عبدالرازق کے بیٹے ہیں۔دریں اثنا کیچ کے علاقے سرنکن میں قادر بخش کے بیٹے مراد جان 15 اکتوبر کو اپنے گھر کے قریب مل گئے۔ ذرائع کے مطابق وہ ایک روز قبل لاپتہ ہوئے تھے۔

لاپتہ افراد کے اہل خانہ کا احتجاج جاری

دوسری جانب وائس فار بلوچ مسنگ پرسنز کی جانب سے کوئٹہ پریس کلب کے باہر قائم احتجاجی کیمپ پیر کے روز مسلسل 6393ویں دن میں داخل ہوگیا۔ دی بلوچستان پوسٹ کے مطابق لاپتہ طلبہ سہیل بلوچ۔ فصیح بلوچ اور ریاض ستکزئی کے اہل خانہ بھی مظاہرین میں شامل ہوئے اور اعلیٰ حکام سے اپنے پیاروں کی بحفاظت بازیابی کی اپیل کی۔رپورٹ کے مطابق سہیل بلوچ اور فصیح بلوچ کو 2 نومبر 2021 کو بلوچستان یونیورسٹی سے پاکستانی فورسز نے مبینہ طور پر حراست میں لیا تھا اور اس کے بعد سے ان کے بارے میں کوئی معلومات نہیں مل سکی ہیں۔ ان کے اہل خانہ تاحال ان کی گمشدگی کے بارے میں جواب اور بازیابی کے لیے مطالبہ کر رہے ہیں۔