ویلنگٹن: نیوزی لینڈ کی پارلیمنٹ نے بدھ کو ہندوستان اور نیوزی لینڈ کے درمیان آزاد تجارتی معاہدے (ایف ٹی اے) کی منظوری دے دی۔ ارکان پارلیمنٹ نے قانون کے حق میں 93 اور مخالفت میں 29 ووٹ دیے، جس کے بعد دونوں ملکوں کے درمیان تجارتی معاہدہ نافذ ہونے کے مزید قریب پہنچ گیا ہے۔

نیوزی لینڈ کے وزیر اعظم کرسٹوفر لکسن نے ’ایکس‘ پر ایک پوسٹ میں پارلیمانی منظوری کا خیرمقدم کرتے ہوئے کہا کہ یہ معاہدہ ہندوستان کی بڑی صارف مارکیٹ تک زیادہ رسائی فراہم کرے گا اور نیوزی لینڈ کی اقتصادی ترقی میں مدد دے گا۔ لکسن نے کہا، ’’لوگوں نے مجھ سے کہا تھا کہ ہندوستان کے ساتھ آزاد تجارتی معاہدہ ممکن نہیں ہے۔ لیکن آج اس معاہدے نے پارلیمنٹ میں آخری ووٹنگ بھی پاس کر لی ہے۔ یہ اب حقیقت بن رہا ہے۔ نیشنل پارٹی نے کہا تھا کہ ہم اپنی پہلی مدت میں ہندوستان کے ساتھ آزاد تجارتی معاہدہ کریں گے اور ہم نے اپنا وعدہ پورا کر دیا ہے۔

یہ تاریخی معاہدہ کیویز کے لیے زیادہ روزگار اور زیادہ آمدنی کا باعث بنے گا۔ اس کا مطلب ہے کہ ہندوستان کے 1.4 ارب صارفین کے لیے دروازہ کھول کر نیوزی لینڈ کی مزید مصنوعات وہاں فروخت کی جا سکیں گی۔‘‘ اس بل کو حکمراں نیشنل پارٹی کے ساتھ اہم اپوزیشن لیبر پارٹی کی بھی حمایت حاصل ہوئی، جس کے نتیجے میں پارلیمنٹ میں اسے واضح اکثریت مل گئی۔ ہندوستان اور نیوزی لینڈ نے اس آزاد تجارتی معاہدے پر 27 اپریل کو دستخط کیے تھے۔ ہندوستان اب اسے ’’جلد از جلد‘‘ نافذ کرنے کی کوشش کر رہا ہے۔ کامرس سکریٹری راجیش اگروال نے گزشتہ ہفتے کہا تھا کہ یہ معاہدہ ممکنہ طور پر اکتوبر میں نافذ ہو سکتا ہے۔

معاہدے کے تحت نیوزی لینڈ ہندوستان کی 100 فیصد برآمدات کو اپنی مارکیٹ میں ڈیوٹی فری رسائی دے گا۔ اس میں تمام ٹیرف لائنز شامل ہیں۔ معاہدے کا مقصد ہندوستان کے محنت پر مبنی شعبوں، جیسے ٹیکسٹائل اور ملبوسات، چمڑا اور جوتے، جواہرات و زیورات، انجینئرنگ مصنوعات اور تیار شدہ غذائی اشیا کی مسابقت اور روزگار کے مواقع کو بہتر بنانا بھی ہے۔

معاہدے کے تحت نیوزی لینڈ نے ہندوستان میں اگلے 15 برسوں کے دوران 20 ارب امریکی ڈالر کی سرمایہ کاری کا عزم ظاہر کیا ہے، جس کا مقصد دونوں ملکوں کے درمیان طویل مدتی اقتصادی تعاون کو مضبوط بنانا ہے۔ ہندوستان کو نیوزی لینڈ کی برآمدات کے معاملے میں 70.03 فیصد ٹیرف لائنز پر مارکیٹ تک رسائی دی گئی ہے، جو دونوں ملکوں کی باہمی تجارت کے 95 فیصد حصے کا احاطہ کرتی ہے۔ ہندوستان نے 29.97 فیصد ٹیرف لائنز کو مستثنیٰ رکھا ہے، جن میں دودھ اور ڈیری مصنوعات، کئی زرعی مصنوعات، چینی، بعض دھاتیں اور دیگر حساس اشیا شامل ہیں۔

معاہدے کے تحت 30 فیصد ٹیرف لائنز پر ڈیوٹی فوری طور پر ختم کی جائے گی، جن میں لکڑی، اون، بھیڑ کا گوشت اور کچی کھالیں شامل ہیں۔ مزید 35.60 فیصد ٹیرف کو تین، پانچ، سات یا 10 برسوں میں مرحلہ وار ختم کیا جائے گا۔ کچھ مصنوعات، جن میں شراب، دواسازی، پولیمر اور ایلومینیم، لوہے اور اسٹیل کی بعض مصنوعات شامل ہیں، پر ٹیرف میں کمی کی جائے گی۔ چند مصنوعات کو ٹیرف ریٹ کوٹے کے تحت رکھا جائے گا، جن میں مانُوکا شہد، سیب، کیوی فروٹ اور البومِن شامل ہیں۔ معاہدے میں زرعی تعاون بھی شامل ہے، جس کا مقصد کیوی فروٹ، سیب اور شہد سمیت مختلف شعبوں میں پیداوار اور صلاحیت کو بہتر بنانا ہے۔

دونوں ملک پودے لگانے کے لیے مواد، تحقیق، تکنیکی معاونت، باغات کے انتظام، فصل کے بعد کے طریقہ کار، سپلائی چین اور غذائی تحفظ کے شعبوں میں تعاون کریں گے۔ سرکاری بیان کے مطابق خدمات کے شعبے میں نیوزی لینڈ نے 118 شعبوں میں عہد کیا ہے، جبکہ 139 شعبوں میں انتہائی پسندیدہ قوم (موسٹ فیورڈ نیشن) کا درجہ دینے پر اتفاق کیا گیا ہے۔ معاہدے کے تحت ہندوستانی طلبہ اور پیشہ ور افراد کے لیے نیوزی لینڈ میں کام کرنے کے نئے مواقع بھی پیدا ہوں گے۔ اس میں عارضی روزگار داخلہ ویزا کا راستہ شامل ہے، جس کے تحت ہر سال 5,000 ہنرمند ہندوستانیوں کو تین سال تک قیام کی اجازت دی جا سکے گی۔

اس میں آیوش ماہرین، یوگا انسٹرکٹرز، ہندوستانی باورچی اور موسیقی کے اساتذہ کے ساتھ آئی ٹی، انجینئرنگ، صحت، تعلیم اور تعمیرات کے شعبوں کے پیشہ ور افراد شامل ہیں۔ ورکنگ ہالی ڈے ویزا کے تحت ہر سال 1,000 نوجوان ہندوستانیوں کو 12 ماہ تک نیوزی لینڈ جانے کی اجازت ہوگی۔ معاہدے میں طلبہ کی نقل و حرکت اور تعلیم مکمل کرنے کے بعد کام سے متعلق بھی دفعات شامل ہیں۔ اس کے تحت اہل ہندوستانی طلبہ تعلیم کے دوران ہفتے میں 20 گھنٹے تک کام کر سکیں گے اور اپنی تعلیمی قابلیت کے مطابق تعلیم مکمل کرنے کے بعد توسیعی ورک ویزا حاصل کر سکیں گے۔

ایف ٹی اے میں سرمایہ کاری، تحقیق و اختراع، ٹیکنالوجی، ہنرمندی، قابل تجدید توانائی، ڈیجیٹل خدمات اور بنیادی ڈھانچے سمیت مختلف شعبوں میں تعاون کی بھی گنجائش رکھی گئی ہے۔ نیوزی لینڈ کی پارلیمنٹ کی منظوری ہندوستان-نیوزی لینڈ آزاد تجارتی معاہدے کے نفاذ کی جانب ایک اور اہم قدم ہے۔ دونوں ملکوں نے اشیا اور خدمات کی تجارت، سرمایہ کاری، زراعت، افراد کی نقل و حرکت اور کسٹمز کے طریقہ کار سمیت مختلف شعبوں میں تعاون کے اقدامات طے کیے ہیں۔