تائی پے (تائیوان): تائیوان کی وزارتِ دفاع نے جمعرات کو بتایا کہ اس نے اپنے اطراف چینی فوج کے 22 جنگی طیاروں کی پروازوں کا سراغ لگایا ہے۔ وزارت کے مطابق ان میں سے 20 طیاروں نے آبنائے تائیوان کی درمیانی لکیر عبور کرتے ہوئے تائیوان کے شمالی، وسطی اور جنوب مغربی ایئر ڈیفنس آئیڈینٹیفکیشن زون (ADIZ) میں داخل ہو کر مغربی بحرالکاہل کی جانب مشترکہ فضائی و بحری مشقوں اور طویل فاصلے کی پروازوں میں حصہ لیا۔

وزارتِ دفاع نے سوشل میڈیا پلیٹ فارم ایکس پر جاری بیان میں کہا کہ ان پروازوں میں جے-16، ایچ-6 اور کے جے-500 سمیت مختلف اقسام کے چینی فوجی طیارے شامل تھے۔ تائیوان کی مسلح افواج نے صورتحال پر مسلسل نظر رکھی اور مناسب ردِعمل دیا۔ اس سے قبل جمعرات کی صبح بھی وزارتِ دفاع نے اپنے سمندری حدود کے قریب پانچ چینی فوجی طیاروں، چھ بحری جنگی جہازوں اور پانچ سرکاری جہازوں کی موجودگی کی اطلاع دی تھی۔

وزارت کے مطابق ان پانچ طیاروں میں سے دو نے درمیانی لکیر عبور کر کے تائیوان کے جنوب مغربی فضائی دفاعی زون میں داخل ہونے کی کوشش کی، جس پر تائیوان کی مسلح افواج نے صورتحال کی نگرانی کرتے ہوئے ضروری اقدامات کیے۔ دوسری جانب فوکس تائیوان کے مطابق، جون میں تائیوان کی مقامی طور پر تیار کی گئی پہلی آبدوز کاؤشیونگ بندرگاہ سے اپنے تازہ سمندری آزمائشی مرحلے کے لیے روانہ ہوئی، جس میں غوطہ لگانے کے تجربات بھی شامل تھے۔

رپورٹ کے مطابق یہ آبدوز کی مجموعی طور پر 15ویں سمندری آزمائش اور نویں زیرِ آب نیویگیشن ٹیسٹ تھا۔ یہ پیش رفت ایسے وقت میں سامنے آئی ہے جب چین تائیوان کے گرد اپنی فوجی سرگرمیوں میں مسلسل اضافہ کر رہا ہے۔ چین تائیوان کو اپنا اٹوٹ حصہ قرار دیتا ہے، جبکہ تائیوان خود کو ایک خودمختار جمہوری نظام کے طور پر چلاتا ہے۔ دونوں کے درمیان یہ تنازع تاریخی، سیاسی اور قانونی بنیادوں پر طویل عرصے سے جاری ہے۔