ابوظہبی: متحدہ عرب امارات (یو اے ای) نے ایک آئل ٹینکر سے تیل خارج ہونے اور سمندری آلودگی پھیلنے کے بعد ام القوین کے تمام ساحلوں اور ساحلی علاقوں کو عارضی طور پر بند کردیا ہے۔ وزارت برائے موسمیاتی تبدیلی و ماحولیات نے یہ اطلاع دی ہے۔ وزارت نے سوشل میڈیا پلیٹ فارم ایکس پر جاری بیان میں کہا کہ ملک کے تکنیکی نگرانی اور ماحولیاتی جائزے کے نظام کے ذریعے تیل کے اخراج کا پتہ چلا، جس کے بعد مقامی اور وفاقی اداروں کے تعاون سے آلودگی کو پھیلنے سے روکنے، تیل صاف کرنے اور متاثرہ ماحول کی بحالی کے لیے کارروائیاں شروع کردی گئیں۔
وزارت نے تصدیق کی کہ تیل کے اخراج کے باعث پیدا ہونے والی بو شارجہ، عجمان اور ام القوین میں بھی محسوس کی گئی ہے۔ تاہم، اس نے لوگوں کو یقین دلایا کہ اس بو سے صحت کو کوئی خطرہ نہیں ہے۔ وزارت کے مطابق، آلودگی کا پتہ چلتے ہی متعلقہ مقامی اور وفاقی حکام کے تعاون سے اسے پھیلنے سے روکنے اور متاثرہ علاقوں کو الگ کرنے کے اقدامات شروع کردیے گئے۔ احتیاطی تدبیر کے طور پر ام القوین کے تمام ساحلوں اور ساحلی علاقوں کو عارضی طور پر بند کیا گیا ہے۔ یہ پابندی اس وقت تک برقرار رہے گی، جب تک تکنیکی ٹیمیں اپنی جانچ مکمل کرکے عوام کی حفاظت اور سمندری ماحول کے تحفظ کے لیے ضروری اقدامات کا تعین نہیں کرلیتیں۔
وزارت نے بتایا کہ ماحولیاتی نقصان کو محدود کرنے کے لیے صفائی اور بحالی کا کام جاری ہے۔ ام القوین کے ساحلی علاقوں میں آلودگی کے پھیلاؤ کا دائرہ معلوم کرنے اور سمندری ماحولیاتی نظام پر اس کے اثرات کا جائزہ لینے کے لیے ساحلی نگرانی، معائنہ اور تکنیکی جانچ بھی کی جارہی ہے۔ حکام متاثرہ ساحلی پٹی کے تحفظ کے لیے مختلف اداروں کے ساتھ مل کر کام کررہے ہیں۔
جاری جانچ کے نتائج کی بنیاد پر مزید اقدامات بھی کیے جائیں گے۔ وزارت نے ماہی گیروں اور سمندر میں سرگرم دیگر افراد سے اپیل کی ہے کہ وہ متعلقہ حکام کی ہدایات پر عمل کریں اور آلودگی سے متاثرہ علاقوں میں مچھلیاں پکڑنے سے گریز کریں۔ اس کے علاوہ عوام سے کہا گیا ہے کہ وہ اس واقعے سے متعلق معلومات کے لیے سرکاری ذرائع پر بھروسا کریں اور افواہیں پھیلانے سے بچیں۔
وزارت نے یقین دلایا کہ وہ صورت حال اور آلودگی پر قابو پانے کے لیے کیے جارہے اقدامات کے بارے میں مسلسل معلومات فراہم کرتی رہے گی۔ حکام کے مطابق، ساحلوں کی عارضی بندش اور ماحولیاتی جانچ کا مقصد تیل کے اخراج کو قابو میں رکھنا، ساحلی ماحول کو نقصان سے بچانا اور متاثرہ علاقوں میں لوگوں کی حفاظت یقینی بنانا ہے۔ تکنیکی ٹیموں کی رپورٹ اور نگرانی کے نتائج کی روشنی میں آئندہ اقدامات کیے جائیں گے۔
