کٹھمنڈو: نیپال کے ضلع ڈولپا میں شدید برفباری کے باعث شے پھوکسونڈو جھیل کی سیر کے لیے جانے والے 6 ہندوستانی سیاح پھنس گئے تھے، جنہیں پیر کے روز ہیلی کاپٹر کے ذریعے بحفاظت نکال لیا گیا۔ حکام نے بتایا کہ تمام سیاحوں کی طبیعت ٹھیک ہے۔ ضلع ڈولپا کی چیف ڈسٹرکٹ آفیسر جونو ہمال نے خبر رساں ایجنسی اے این آئی کو بتایا کہ ریسکیو آپریشن دو مرحلوں میں مکمل کیا گیا۔ پہلے دو خواتین کو ہیلی کاپٹر کے ذریعے ضلع ہیڈکوارٹر پہنچایا گیا، جس کے بعد باقی چار سیاحوں کو پھنسے ہوئے مقام سے نکالا گیا۔

جونو ہمال نے کہا، ’’تمام سیاحوں کو ہیلی کاپٹر کے ذریعے بچالیا گیا ہے۔ پہلے دو خواتین کو ضلع ہیڈکوارٹر پہنچایا گیا اور اس کے بعد باقی چار افراد کو پھنسے ہوئے علاقے سے نکالا گیا۔ ان سب کی صحت بھی معمول کے مطابق ہے۔‘‘ یہ 6 ہندوستانی سیاح ڈولپو بدھ دیہی میونسپلٹی کے وارڈ نمبر 4 اور 8 سے شے پھوکسونڈو جھیل کی طرف جا رہے تھے۔ آخری اطلاع کے مطابق وہ شے پھوکسونڈو دیہی میونسپلٹی کے وارڈ نمبر 4 اور 8 کے درمیان واقع نملا پاس اور باگلا پاس کے علاقوں میں لاپتہ تھے۔ ضلع انتظامیہ کے ایک افسر کے مطابق سیاحوں نے اس علاقے میں داخل ہونے کے لیے ضروری اجازت نامے حاصل نہیں کیے تھے اور مقامی لوگوں کی وارننگ کے باوجود اپنا سفر جاری رکھا تھا۔

خلیج بنگال میں تشکیل پانے والے سمندری طوفان ’’ارناب‘‘ کے اثر سے اس علاقے میں شدید برفباری ہوئی، جس کے نتیجے میں سیاح پھنس گئے۔ حکام نے بچائے گئے سیاحوں کی شناخت مومیتا ہالدار، پیالی کولے، جاجالا تریویدی کمار، آدتیہ سنگھا، ڈپلینا بسواس اور راجیش دے کے طور پر کی ہے۔ ریسکیو آپریشن ابتدائی طور پر اتوار کو شروع ہونا تھا، لیکن تکنیکی خرابیوں کے باعث بار بار اس میں تاخیر ہوئی۔ نیپالی فوج کے ہیلی کاپٹر کو امدادی کارروائی کے لیے روانہ کرنے کی کوشش کی گئی، لیکن پرواز کے وقت تکنیکی خرابی سامنے آنے کے بعد اسے روکنا پڑا۔

اس کے بعد سمریک ایئر کے ہیلی کاپٹر کے ذریعے ریسکیو کی دوسری کوشش کی گئی، لیکن تکنیکی مسائل کے باعث شام 4 بج کر 30 منٹ پر یہ کارروائی بھی روک دی گئی۔ بالآخر پیر کی صبح 6 بجے امدادی آپریشن دوبارہ شروع کیا گیا اور تمام 6 ہندوستانی سیاحوں کو کامیابی کے ساتھ محفوظ مقام پر پہنچا دیا گیا۔ شے پھوکسونڈو جھیل نیپال کے شمال مغربی حصے میں صوبہ کرنالی کے ضلع ڈولپا میں واقع ہے۔ یہ گہرے نیلگوں پانی والی خوبصورت پہاڑی جھیل ہے اور نیپال کی سب سے گہری جھیل ہونے کا اعزاز رکھتی ہے۔ گزشتہ چند برسوں میں اس علاقے میں سیاحوں کی آمد میں اضافہ ہوا ہے۔

ضلع انتظامیہ کے دفتر کے مطابق اپر ڈولپا پہنچنے والے سیاحوں کی مجموعی تعداد 244 ہے۔ ان میں 149 نیپالی شہری، سارک ممالک کے 44 سیاح اور دیگر غیر ملکی ممالک کے 51 شہری شامل ہیں۔ خراب موسمی حالات کے پیش نظر ضلع انتظامیہ نے سیاحوں کو خطرناک علاقوں میں جانے سے گریز کرنے اور محفوظ مقامات پر رہنے کی ہدایت دی تھی۔