نئی دہلی: ہندوستانی بحریہ کے جنگی جہاز آئی این ایس سہادری اور آئی این ایس کُلیش اتوار کو فلپائن کے سبِک بے پہنچ گئے۔ یہ دونوں جہاز ہندوستانی بحریہ کی آپریشنل تعیناتی کے تحت آسیان وزرائے دفاع کی میٹنگ (اے ڈی ایم ایم) پلس کی مشترکہ تعاون سرگرمی (جے سی اے) میں حصہ لیں گے۔ یہ اطلاع وزارت دفاع کی جانب سے جاری ایک سرکاری بیان میں دی گئی۔
بیان کے مطابق اے ڈی ایم ایم پلس جے سی اے میں آسیان کے رکن ممالک اور آٹھ ’پلس‘ ممالک کی بحری افواج حصہ لے رہی ہیں۔ اس سرگرمی کا مقصد پیشہ ورانہ اور عملی سطح پر ایک دوسرے کے ساتھ کام کرتے ہوئے بحری افواج کے درمیان باہمی تعاون کی صلاحیت بڑھانا، ایک دوسرے کو بہتر طور پر سمجھنا اور بحری شعبے میں تعاون کو مضبوط کرنا ہے۔ ہندوستانی بحری جہازوں کی اس سرگرمی میں شرکت حکومت ہند کی ’ایکٹ ایسٹ پالیسی‘ اور ’مہاساگر‘ کے وژن کے مطابق ہے۔ اس کے ذریعے ہندوستان نے کثیر ملکی بحری تعاون اور خطے کے شراکت دار ممالک کے ساتھ تعمیری روابط کے تئیں اپنے عزم کا اظہار کیا ہے۔
اس تعیناتی کے دوران ہندوستانی بحریہ کو مختلف ممالک کی بحری افواج کے ساتھ پیشہ ورانہ اور عملی سرگرمیوں میں حصہ لینے کا موقع ملے گا، جس سے مشترکہ بحری چیلنجز کو سمجھنے اور ان سے نمٹنے کے سلسلے میں باہمی تعاون کو فروغ ملنے کی توقع ہے۔ سبِک بے میں ہندوستانی بحری جہازوں کا قیام ہندوستان اور فلپائن کے درمیان بڑھتے ہوئے بحری روابط کی بھی عکاسی کرتا ہے۔
اگست 2025 میں دونوں ممالک کے درمیان ’اسٹریٹجک پارٹنرشپ‘ قائم ہونے اور حالیہ دو طرفہ رابطوں کے بعد یہ تعیناتی دونوں ملکوں کے درمیان پیشہ ورانہ روابط اور بحری تعاون کو مزید مضبوط بنانے کا موقع فراہم کرے گی۔ اس سے قبل 15 ستمبر کو ہندوستانی کونسل آف ورلڈ افیئرز (آئی سی ڈبلیو اے) کی 25ویں سالگرہ کے موقع پر ہندوستان میں فلپائن کے سفیر جوزل ایف اگناسیو نے کہا تھا کہ گزشتہ ایک دہائی کے دوران ہندوستان اور فلپائن کے تعلقات میں نمایاں تیزی آئی ہے اور گزشتہ سال دونوں ملکوں نے اپنے تعلقات کو اسٹریٹجک پارٹنرشپ میں تبدیل کیا۔
آئی سی ڈبلیو اے کی سلور جوبلی تقریب کے اختتامی اجلاس سے خطاب کرتے ہوئے اگناسیو نے کہا، ’’ہمارے سفارتی تعلقات باضابطہ طور پر 77 سال پرانے ہیں، لیکن تقریباً 10 سال پہلے تعلقات میں واضح تیزی آئی۔ گزشتہ سال میرے صدر کے سرکاری دورے کے دوران وزیر اعظم مودی اور میرے صدر نے تعلقات کو اسٹریٹجک پارٹنرشپ میں تبدیل کر دیا۔‘
‘ انہوں نے کہا کہ بدلتے ہوئے خارجہ پالیسی اور سلامتی کے چیلنجز کے درمیان فلپائن اب ہندوستان کو ’’باہمی اور اسٹریٹجک اعتماد کا اہم شراکت دار‘‘ سمجھتا ہے۔ اگناسیو نے کہا، ’’سخت خارجہ پالیسی سے متعلق مسائل اور سوالات بھی اس تعاون کی ایک وجہ ہیں۔ فلپائن کے لیے ہندوستان اب باہمی اور اسٹریٹجک اعتماد کا ایک اہم شراکت دار ہے۔
بحری شعبے میں ہمارے مفادات میں واضح ہم آہنگی ہے۔ ہم ہندوستان کو ایک ذمہ دار ملک، ترجیحی سکیورٹی پارٹنر اور ضرورت کے وقت فوری مدد فراہم کرنے والے ملک کے طور پر دیکھتے ہیں۔‘‘ فلپائن کے بحری کارکنوں کے لیے ہندوستان کی مدد کا ذکر کرتے ہوئے انہوں نے کہا، ’’ہم نے گزشتہ دو برسوں کی غیر یقینی صورت حال کے دوران بحر ہند کے وسیع علاقے میں ہندوستان کو فلپائن کے بحری کارکنوں کی مدد کے لیے آگے آتے ہوئے خود دیکھا ہے۔
