نئی دہلی: مرکزی وزیر برائے بجلی اور ہاؤسنگ و شہری امور منوہر لال نے جمعرات کو امریکہ کے شہر ہیوسٹن میں منعقدہ جی 20 انرجی ابونڈنس وزارتی اجلاس میں ہندوستانی وفد کی قیادت کی۔ انہوں نے اجلاس میں ہندوستان کی تیزی سے جاری توانائی منتقلی کی پیش رفت پیش کرتے ہوئے بتایا کہ ملک میں بجلی پیدا کرنے کی مجموعی نصب شدہ صلاحیت 552 گیگاواٹ تک پہنچ گئی ہے، جس میں نصف سے زیادہ حصہ غیر فوسل ایندھن کے ذرائع سے حاصل ہو رہا ہے۔ وزارتِ بجلی کی جانب سے جاری پریس ریلیز کے مطابق، یہ اجلاس 14 سے 16 ستمبر تک امریکی صدارت میں منعقد ہوا۔

اجلاس میں تین اہم موضوعات پر غور کیا گیا، جن میں توانائی کا تحفظ اور سستی بنیادی بجلی کی فراہمی، اجازت ناموں اور ضابطہ جاتی نظام میں بہتری، اور اہم معدنیات و مضبوط سپلائی چین شامل تھے۔ اجلاس سے خطاب کرتے ہوئے منوہر لال نے کہا کہ محفوظ، سستی اور قابلِ اعتماد توانائی ترقی کے لیے ضروری ہے، خاص طور پر ترقی پذیر معیشتوں کے لیے۔ انہوں نے مشترکہ مفاد کے حصول کے لیے بین الاقوامی تعاون اور مختلف ممالک کی باہمی صلاحیتوں سے فائدہ اٹھانے کی ضرورت پر زور دیا۔ ساتھ ہی انہوں نے کہا کہ ہر ملک کے مختلف حالات اور ترقیاتی ترجیحات کا احترام بھی ضروری ہے۔

مرکزی وزیر نے کہا کہ ہندوستان ایک مضبوط اور مستقبل کی ضروریات کو پورا کرنے والا توانائی نظام تیار کر رہا ہے، جو تیزی سے ڈیجیٹل، غیر مرکزی اور صارف پر مرکوز ہوتا جا رہا ہے۔ انہوں نے بجلی کے شعبے میں ہندوستان کی نمایاں پیش رفت کا ذکر کرتے ہوئے کہا کہ ملک کی نصب شدہ بجلی پیدا کرنے کی صلاحیت 552 گیگاواٹ ہو چکی ہے، جس میں نصف سے زیادہ غیر فوسل ایندھن کے ذرائع سے آتی ہے۔ انہوں نے یہ بھی بتایا کہ ہندوستان نے قومی سطح پر طے شدہ شراکت داری (NDC) کے کئی اہم اہداف مقررہ وقت سے پہلے حاصل کر لیے ہیں اور ملک نے 2070 تک نیٹ زیرو اخراج حاصل کرنے کا طویل مدتی ہدف مقرر کیا ہے۔

منوہر لال نے توانائی کے شعبے میں ضابطہ جاتی کارکردگی بہتر بنانے، مسابقت کو فروغ دینے اور سرمایہ کاری و شراکت داری کے وسیع مواقع پیدا کرنے کے لیے ہندوستان کی جانب سے کیے گئے مختلف اصلاحات کا بھی ذکر کیا۔ انہوں نے نیشنل سنگل ونڈو سسٹم، پریویش (PARIVESH) اور پی ایم گتی شکتی جیسے اقدامات کی مثال دی، جن سے بنیادی ڈھانچے کی ترقی کے لیے منظوری کے عمل کو آسان بنانے اور زیادہ قابلِ پیش گوئی بنانے میں مدد ملی ہے۔ اہم معدنیات کے معاملے پر مرکزی وزیر نے محفوظ، مضبوط اور متنوع سپلائی چین کی اہمیت پر زور دیا۔

انہوں نے ترقی پذیر ممالک میں معدنیات کی دوبارہ گردش اور ان سے متعلق مزید ویلیو ایڈیشن کی ضرورت اجاگر کی۔ انہوں نے ہندوستان کے نیشنل کریٹیکل منرل مشن کا بھی ذکر کیا، جو معدنیات کی تلاش سے لے کر ری سائیکلنگ تک پوری ویلیو چین کا احاطہ کرتا ہے۔ انہوں نے ری سائیکلنگ، معدنیات کی بازیابی اور سپلائی ذرائع میں تنوع کے لیے جی 20 ممالک کے درمیان تعاون کی اپیل کی۔ وزارتی اجلاس میں تینوں اہم شعبوں میں متعدد اہم فیصلے اور اقدامات سامنے آئے۔ صاف ستھری کھانا پکانے کی سہولت کے سلسلے میں جی 20 کے ’’ایڈوانسنگ کلین کوکنگ ایکسس‘‘ بیان میں ہر شخص تک صاف ستھرے کھانا پکانے کے ذرائع کی رسائی یقینی بنانے پر زور دیا گیا۔ اس کے لیے ٹیکنالوجی سے غیر جانب دار اور ہر ملک کے حالات کے مطابق طریقہ اختیار کرنے کی حمایت کی گئی، کیونکہ مختلف ممالک کی ضروریات الگ الگ ہیں اور کسی ایک حل سے سب کی ضروریات پوری نہیں ہو سکتیں۔

بیان میں ایل پی جی کو خاص طور پر ترقی پذیر ممالک کے لیے صاف ستھری کھانا پکانے کی جانب ایک اہم ذریعہ قرار دیا گیا اور ایل پی جی سمیت تمام صاف ستھرے کھانا پکانے کے منصوبوں کے لیے مالی وسائل تک مساوی رسائی کی ضرورت پر زور دیا گیا۔ جی 20 نے ’’پرمٹنگ اینڈ ریگولیٹری ایفیشنسی سمپوزیم‘‘ کی بھی حمایت کی۔ اس میں توانائی کے بنیادی ڈھانچے کی ترقی کے لیے اجازت ناموں اور ضابطہ جاتی عمل کو مؤثر اور آسان بنانے کی اہمیت کو تسلیم کیا گیا۔ اس مقصد کے لیے رضاکارانہ طور پر معلومات کے تبادلے، صلاحیت سازی اور ڈیجیٹل و مصنوعی ذہانت پر مبنی ذرائع کے استعمال کے ذریعے تعاون کی حوصلہ افزائی کی گئی۔ جی 20 واٹر ری یوز انیشی ایٹو کو بھی آگے بڑھایا گیا۔

یہ ایک رضاکارانہ فریم ورک ہے، جس کا مقصد قومی پالیسیوں کے مطابق سائنسی شواہد کی بنیاد پر پانی کے دوبارہ استعمال کو فروغ دینا ہے۔ اس میں لاگت کے لحاظ سے مؤثر اور ضرورت کے مطابق پانی کے دوبارہ استعمال پر زور دیا گیا۔ پانی کے تحفظ اور ماحولیاتی مضبوطی کو بہتر بنانے کے لیے ممالک کے درمیان تعاون اور بہترین طریقہ کار کے تبادلے کی حوصلہ افزائی کی گئی، جبکہ یہ بھی تسلیم کیا گیا کہ پانی کے دوبارہ استعمال کے لیے کوئی ایک طریقہ تمام ممالک کے لیے موزوں نہیں ہو سکتا۔ اہم معدنیات کے شعبے میں جی 20 کے ’’کریٹیکل منرلز میٹنگ کمیونیکے‘‘ میں توانائی کے تحفظ، ڈیجیٹل بنیادی ڈھانچے، نئی ٹیکنالوجی اور اقتصادی ترقی کے لیے اہم معدنیات کی اہمیت کو تسلیم کیا گیا۔

اس میں قومی خودمختاری اور مختلف ملکی ترجیحات کا احترام کرتے ہوئے مشترکہ اور رضاکارانہ تعاون پر زور دیا گیا۔ ساتھ ہی معدنیات کے شعبے میں جدت، دوبارہ استعمال، سرمایہ کاری اور بین الاقوامی تعاون کے ذریعے سپلائی ذرائع میں تنوع، ویلیو ایڈیشن اور مضبوط سپلائی چین کو فروغ دینے کی حمایت کی گئی۔

وزارتی اجلاس کے موقع پر منوہر لال نے امریکہ کے محکمہ توانائی کے سکریٹری کرس رائٹ، امریکہ کے محکمہ داخلہ کے سکریٹری ڈگ برگم اور کینیڈا کے وزیر توانائی و قدرتی وسائل کے پارلیمانی سکریٹری کوری ہوگن سے بھی الگ الگ دو طرفہ ملاقاتیں کیں۔ ان ملاقاتوں میں باہمی دلچسپی کے متعدد امور پر تبادلہ خیال ہوا، جن میں مضبوط توانائی بنیادی ڈھانچہ اور سپلائی چین، بجلی کے شعبے میں تبدیلی اور ہندوستان کی ڈیجیٹل معیشت کی بڑھتی ہوئی توانائی کی ضروریات کو پورا کرنے کے منصوبے شامل تھے۔