کٹھمنڈو: ہندوستان کے خارجہ سکریٹری وکرم مصری نے بدھ کے روز نیپال کے وزیر خارجہ ششیر کھنال سے ملاقات کی۔ اس دوران دونوں ملکوں کے درمیان کثیرالجہتی شراکت داری کو مزید وسعت دینے اور دیرینہ دوستانہ تعلقات کو مضبوط بنانے کے طریقوں پر تبادلہ خیال کیا گیا۔ نیپال کی وزارت خارجہ نے یہ اطلاع دی۔ وکرم مصری بدھ کی صبح کٹھمنڈو پہنچے، جہاں انہوں نے وزارت خارجہ میں نیپال کے وزیر خارجہ ششیر کھنال سے خیرسگالی ملاقات کی۔

نیپال کی وزارت خارجہ کے ایک بیان کے مطابق، اس موقع پر کھنال نے کہا کہ نیپال اور ہندوستان کے درمیان قریبی تعلقات ایک نئی بلندی تک پہنچیں گے۔ بیان میں کہا گیا کہ دونوں ملکوں کے درمیان دوطرفہ تعاون کے مختلف پہلوؤں، جن میں توانائی، تجارت، کھیل اور تعلیم شامل ہیں، پر بات چیت ہوئی۔ اس کا مقصد دونوں ملکوں کے کثیرالجہتی تعلقات کو مزید مستحکم کرنا اور تاریخی دوستی کو نئی گہرائی دینا ہے۔

ہندوستانی خارجہ سکریٹری کا یہ 2 روزہ سرکاری دورہ نیپال کے وزیر اعظم بالیندر شاہ کے مجوزہ دورۂ نئی دہلی کی تیاریوں کے سلسلے میں اہم سمجھا جا رہا ہے۔ نیپال کی وزارت خارجہ کے جوائنٹ سکریٹری گیہندر راج بھنڈاری اور نیپال میں ہندوستان کے نئے مقرر کردہ سفیر سدھاکر دلیلا نے بدھ کے روز تریبھون بین الاقوامی ہوائی اڈے پر وکرم مصری کا استقبال کیا۔

مصری نیپال کے خارجہ سکریٹری امرت بہادر رائے کی دعوت پر وہاں پہنچے ہیں۔ ان کے دورے کا بنیادی مقصد نیپالی وزیر اعظم بالیندر شاہ کے مجوزہ دورۂ ہندوستان اور دونوں ملکوں کے باہمی تعلقات سے متعلق امور پر تبادلہ خیال کرنا ہے۔ وزارت خارجہ کے ذرائع کے مطابق، وکرم مصری کی نیپال کے وزیر اعظم بالیندر شاہ سے بھی ملاقات متوقع ہے۔ شاہ نومبر کے آخری ہفتے میں ہندوستان کے سرکاری دورے پر آ سکتے ہیں۔ ہندوستان کے خارجہ سکریٹری کا جولائی 2024 میں عہدہ سنبھالنے کے بعد یہ کٹھمنڈو کا دوسرا دورہ ہے۔