احمد آباد : ھارت کے کپتان سوریہ کمار یادو نے آئی سی سی مینز ٹی ٹوئنٹی ورلڈ کپ 2026 میں فتح کے بعد ٹیم کے سفر کو ایک شاندار اور یادگار مہم قرار دیا ہے۔ انہوں نے کہا کہ احمد آباد میں اپنے شائقین کے سامنے یہ کامیابی حاصل کرنا پوری ٹیم کی مشترکہ محنت کا نتیجہ ہے۔

فائنل کے بعد پریس کانفرنس سے گفتگو کرتے ہوئے سوریہ کمار یادو نے کہا کہ ٹورنامنٹ کے آغاز میں ٹیم کو کچھ مشکلات کا سامنا رہا لیکن آہستہ آہستہ ٹیم نے اپنی رفتار حاصل کر لی اور پورے ٹورنامنٹ میں مضبوط کارکردگی دکھائی۔

ہندوستان کو اس کا تیسرا ٹی ٹوئنٹی عالمی ٹائٹل دلانے کے بعد سوریہ کمار یادو نے کہا کہ اب ان کا اگلا ہدف 2028 کے اولمپکس میں طلائی تمغہ جیتنا ہے۔

انہوں نے کہا کہ گزشتہ ایک ماہ کا سفر واقعی شاندار رہا۔ ابتدا ہماری توقع کے مطابق نہیں تھی لیکن کھیل میں ایسا ہوتا رہتا ہے۔ پوری مہم ہمارے لیے بہت خاص رہی اور بطور ٹیم جو کچھ ہم نے حاصل کیا وہ سب کے سامنے ہے۔ ہم اس کامیابی پر بہت خوش ہیں اور یقیناً اب اگلا ہدف اولمپکس ہے جبکہ اسی سال ٹی ٹوئنٹی ورلڈ کپ بھی ہوگا۔

ہندوستانی کپتان نے اس بات پر بھی زور دیا کہ آئی سی سی مینز ٹی ٹوئنٹی ورلڈ کپ 2024 جیتنے کے بعد ٹیم کے کھیلنے کے انداز میں بڑی تبدیلی آئی اور اس کے بعد ہندوستان نے زیادہ جارحانہ اور جدید طرز کا کرکٹ کھیلنا شروع کیا جس کے مثبت نتائج بڑے ٹورنامنٹس میں سامنے آئے۔

انہوں نے کہا کہ 2024 کے بعد بہت کچھ بدل گیا۔ ہم نے مختلف انداز کا کرکٹ کھیلنا شروع کیا اور وہیں سے ہمیں سمجھ آیا کہ اس ٹیم کو آگے کس طرح کھیلنا اور آگے بڑھنا ہے۔ اس کے بعد سے یہ سفر واقعی شاندار رہا ہے۔

سوریہ کمار یادو نے کہا کہ ٹیم کی ترقی کا آغاز آئی سی سی چیمپئنز ٹرافی 2025 جیتنے سے ہوا اور اس کے بعد گھریلو میدانوں پر آئی سی سی مینز ٹی ٹوئنٹی ورلڈ کپ 2026 میں ٹیم نے شاندار کارکردگی دکھائی۔

میچ کی بات کریں تو نیوزی لینڈ نے ٹاس جیت کر ہندوستان کو پہلے بیٹنگ کی دعوت دی۔ ہندوستان کی جانب سے سنجو سیمسن نے 46 گیندوں پر 89 رنز بنائے جبکہ ابھشیک شرما نے 21 گیندوں پر 52 رنز اسکور کیے۔ ایشان کشن نے 25 گیندوں پر 54 رنز بنائے اور شیوم دوبے نے صرف 8 گیندوں پر ناقابل شکست 26 رنز کی جارحانہ اننگز کھیلی۔ اس طرح ہندوستان نے 20 اوورز میں 5 وکٹوں کے نقصان پر 255 رنز بنائے۔

جواب میں نیوزی لینڈ کی جانب سے ٹم سیفرٹ نے 52 رنز بنائے لیکن ہندوستانی بولرز کے سامنے ٹیم زیادہ دیر نہ ٹھہر سکی۔ اکشر پٹیل نے 3 وکٹیں حاصل کیں جبکہ جسپریت بمراہ نے 4 وکٹیں لے کر شاندار بولنگ کی۔

اس طرح ہندوستان نے اپنا تیسرا ٹی ٹوئنٹی عالمی کپ جیت لیا اور تاریخ میں پہلی ٹیم بن گئی جس نے اس ٹائٹل کا کامیابی سے دفاع کیا۔ ساتھ ہی یہ پہلا موقع بھی ہے کہ کسی میزبان ملک نے یہ ٹرافی اپنے نام کی ہے۔