آئیچی ناگویا: ہندوستانی پیرا شوٹر مونا اگروال نے ایشیائی پیرا گیمز 2026 میں جمعہ کو خواتین کے 50 میٹر رائفل تھری پوزیشنز ایس ایچ 1 مقابلے کے فائنل میں عالمی ریکارڈ قائم کرتے ہوئے اپنا دوسرا طلائی تمغہ جیت لیا۔ مونا نے 357.5 پوائنٹس حاصل کرکے ریکارڈ بنایا اور چین کی ژانگ کوئپنگ کو 3.8 پوائنٹس سے پیچھے چھوڑ دیا۔ ژانگ نے چاندی کا تمغہ حاصل کیا۔ مونا اس سے قبل کھیلوں کے افتتاحی دن خواتین کے 10 میٹر ایئر رائفل اسٹینڈنگ ایس ایچ 1 مقابلے میں بھی طلائی تمغہ جیت چکی ہیں۔

فائنل میں حصہ لینے والی ہندوستان کی دوسری کھلاڑی اونی لیکھرا معمولی فرق سے تمغہ جیتنے سے محروم رہیں اور چوتھے مقام پر رہیں۔ وہ لیٹ کر نشانہ لگانے کے مرحلے کے بعد ابتدائی 2 کھلاڑیوں میں شامل تھیں، لیکن کھڑے ہوکر نشانہ لگانے کے مرحلے میں پیچھے رہ گئیں۔ مونا کی اس کامیابی سے آئیچی ناگویا میں جاری ان کھیلوں میں ہندوستان کے تمغوں کی تعداد میں مزید اضافہ ہوا ہے۔ ہندوستانی کھلاڑی ایشیائی پیرا گیمز میں اپنی اب تک کی بہترین کارکردگی کو پیچھے چھوڑنے کی کوشش کر رہے ہیں۔ کھیلوں کے افتتاحی دن بھی مونا اگروال اور اونی لیکھرا نے خواتین کے 10 میٹر ایئر رائفل اسٹینڈنگ ایس ایچ 1 مقابلے میں پہلی اور دوسری پوزیشن حاصل کرکے ہندوستان کو دونوں تمغے دلائے تھے۔

مونا نے ساتویں سیریز کے بعد 250 پوائنٹس کے ساتھ طلائی تمغہ جیتا تھا۔ اس کے ساتھ ہی انہوں نے ایشیائی پیرا گیمز کا نیا ریکارڈ قائم کیا اور 2023 میں ہانگژو میں اونی لیکھرا کے قائم کردہ 249.6 پوائنٹس کے سابقہ ریکارڈ کو توڑ دیا تھا۔ ایشیائی پیرا گیمز کے پانچویں دن ہندوستانی پیرا کھلاڑیوں اور نشانہ بازوں نے شاندار کارکردگی کا مظاہرہ کرتے ہوئے مختلف کھیلوں میں کئی تمغے حاصل کیے۔

پیرا بیڈمنٹن میں نتیش کمار نے مردوں کے سنگلز ایس ایل 3 فائنل میں طلائی تمغہ جیتا، جبکہ پرمود بھگت کو چاندی کے تمغے پر اکتفا کرنا پڑا۔ نوین شیوا کمار نے بھی مردوں کے سنگلز ایس ایل 4 مقابلے میں طلائی تمغہ حاصل کیا۔ انہوں نے فائنل میں انڈونیشیا کے فریڈی ستیوان کو شکست دی۔ پیرا تیر اندازی میں ہرویندر سنگھ اور وجے سندھی نے مردوں کے ریکرو ڈبلز مقابلے میں طلائی تمغہ جیتا۔ سندیپ نے مردوں کے 400 میٹر ٹی 64 فائنل میں طلائی تمغہ حاصل کیا، جبکہ اجے کمار نے کانسے کا تمغہ جیتا۔ ہینی نے مردوں کے جیولین تھرو ایف 37/38 مقابلے میں طلائی تمغہ اپنے نام کیا۔

ہندوستان کو خواتین کے سنگلز ایس یو 5 میں تھولاسیمتی مروگیشن، خواتین کے سنگلز ایس ایچ 6 میں نتھیا سری سماتھی سیون، خواتین کے ریکرو ڈبلز میں پوجا جاتیاں اور بھاونا چودھری، مردوں کے 1500 میٹر ٹی 46 میں پرمود بجارنیا اور خواتین کی لانگ جمپ ٹی 47 میں نمیشا سریش نے چاندی کے تمغے دلائے۔ پیرا ٹیبل ٹینس کے مردوں کے ڈبلز ایم ڈی 4 مقابلے میں جہان مدن اور شبھم ودھوا نے کانسے کا تمغہ جیتا۔ تازہ ترین دستیاب اعداد و شمار کے مطابق ہندوستان نے مجموعی طور پر 103 تمغے حاصل کیے تھے، جن میں 27 طلائی، 33 چاندی اور 43 کانسے کے تمغے شامل تھے۔ تمغوں کی فہرست میں ہندوستان چوتھے مقام پر تھا، جبکہ چین 354 تمغوں کے ساتھ سرفہرست تھا۔