یچی ناگویا۔ہندوستانی باکسر پرین ہڈا نے ایشین گیمز 2026 میں ویمنز 65 کلوگرام باکسنگ کے فائنل میں چینی تائپے کی چن نیئن چن کو شکست دے کر گولڈ میڈل جیت لیا۔ پرین نے مقابلہ 3-2 سے اسپلٹ ڈسیژن کے ذریعے اپنے نام کیا۔پرین کا یہ گولڈ میڈل دن میں ہندوستان کی باکسنگ میں دوسری کامیابی ہے۔ اس سے قبل اولمپک میڈلسٹ لَوْلینا بورگوہین نے ویمنز 75 کلوگرام میں گولڈ میڈل حاصل کیا تھا۔

ESPN کے مطابق پرین نے 2022 ایشین گیمز میں برونز میڈل جیتا تھا لیکن ڈوپنگ سے متعلق قواعد کی خلاف ورزی کے باعث ان کا میڈل واپس لے لیا گیا تھا۔ سابق عالمی چیمپئن کے خلاف گولڈ میڈل جیتنا ان کے لیے ایک اہم واپسی کے طور پر دیکھا جا رہا ہے۔

فائنل کے پہلے راؤنڈ میں پرین نے محتاط انداز اختیار کیا۔ انہوں نے اپنی حریف کے حملوں کا جواب کاؤنٹر پنچز سے دیا اور باڈی شاٹس بھی لگائے۔ پرین نے پہلا راؤنڈ 5-0 سے جیتا۔

دوسرے راؤنڈ میں پرین نے حریف سے مناسب فاصلہ برقرار رکھتے ہوئے اپنی قد اور ریچ کا فائدہ اٹھایا۔ تاہم چن نے مقابلے میں واپسی کرتے ہوئے یہ راؤنڈ اپنے نام کر لیا۔فیصلہ کن تیسرے راؤنڈ میں چن نے تیز جابس لگائے جبکہ پرین نے محتاط رہتے ہوئے فوری 1-2 پنچز سے جواب دیا۔ مقابلہ انتہائی سخت رہا لیکن پرین کے کاؤنٹر پنچز نے انہیں 3-2 سے کامیابی دلائی۔

اس گولڈ میڈل کے ساتھ ایشین گیمز 2026 میں ہندوستان کے میڈلز کی تعداد 73 ہوگئی ہے۔ ان میں 13 گولڈ۔ 25 سلور اور 35 برونز میڈل شامل ہیں۔

دریں اثنا ہندوستانی سیپک ٹاکرا ٹیم نے بھی میڈل اپنے نام کیا۔ مردوں کے کوآڈرینٹ ایونٹ میں ملیمنگنبا سنگھ سوروکھائبم۔ رام کمار شرما۔ بوبی کمار اور آکاش یومنم کی ٹیم نے برونز میڈل حاصل کیا۔ ہندوستانی ٹیم کو سیمی فائنل میں جاپان کے ہاتھوں 0-2 سے شکست ہوئی۔ جاپان نے دونوں گیمز 15-12 اور 15-13 سے جیتے۔یہ ایشین گیمز میں سیپک ٹاکرا میں ہندوستان کا تیسرا میڈل ہے۔ ہندوستان نے اس سے قبل 2018 جکارتہ ایشین گیمز میں مردوں کے ٹیم ریگو اور 2022 کے مقابلوں میں خواتین کے ٹیم ریگو میں برونز میڈل جیتا تھا۔

اس سے قبل ویمنز ریکرو آرچری میں کم کم موہود۔ انکیتا بھکت اور کیرتی شرما نے جنوبی کوریا کو 5-3 سے شکست دے کر گولڈ میڈل جیتا۔ یہ ایشین گیمز میں اس مقابلے میں ہندوستان کا پہلا میڈل ہے۔ 17 سالہ کم کم نے فائنل کے آخری مرحلے میں دو اہم 10 اسکور کرتے ہوئے ہندوستان کی تاریخی کامیابی میں اہم کردار ادا کیا۔مکسڈ ریکرو آرچری ٹیم ایونٹ میں کم کم موہود اور دھیرج بومادیورا کو سلور میڈل پر اکتفا کرنا پڑا۔ ہندوستانی جوڑی کو فائنل میں چین کی ژو جِنگ یی اور لی مینگ چی نے 5-3 سے شکست دی۔

ہندوستانی باکسر لَوْلینا بورگوہین نے اپنی 29 ویں سالگرہ کے موقع پر ویمنز 75 کلوگرام کے فائنل میں چین کی باؤ زی یی کو 5-0 سے شکست دے کر گولڈ میڈل جیتا۔سیلنگ میں نیترا کمانن نے ویمنز ڈنگی ایونٹ میں برونز میڈل حاصل کیا۔ نیترا نے فائنل کی دوسری اور آخری ریس میں شاندار واپسی کی اور ہانگ کانگ کی اسٹیفنی لوئس نورٹن کے برابر پوائنٹس حاصل کیے۔ تاہم براہ راست مقابلے کے بہتر ریکارڈ کی بنیاد پر نیترا کو برونز میڈل ملا۔ریکرو آرچری کے مردوں کے ٹیم ایونٹ میں بھی ہندوستان نے سلور میڈل جیتا۔ دھیرج بومادیورا۔ یش دیپ سنجے بھوگے اور نیرج چوہان پر مشتمل ہندوستانی ٹیم کو فائنل میں جنوبی کوریا کے ہاتھوں 1-5 سے شکست ہوئی۔