نِسّن۔ ہندوستانی خواتین کرکٹ ٹیم نے جمعہ کو ایشین گیمز 2026 کے خواتین کرکٹ کوارٹر فائنل میں جاپان کو 8 وکٹ سے شکست دے کر سیمی فائنل میں جگہ بنالی۔پہلے گیند بازی کرنے کا فیصلہ کرتے ہوئے ہندوستانی بولرز نے شاندار کارکردگی کا مظاہرہ کیا اور جاپان کی پوری ٹیم کو 19.5 اوورز میں 57 رنز پر آؤٹ کردیا۔جاپان کی جانب سے آیاکا کاٹو اسٹافورڈ نے 47 گیندوں پر 25 رنز بنا کر سب سے زیادہ اسکور کیا۔ تاہم دیگر بلے باز ہندوستانی بولنگ کے سامنے مشکلات کا شکار رہے۔ جاپان نے وقفے وقفے سے وکٹیں گنوائیں اور پوری ٹیم معمولی اسکور پر پویلین لوٹ گئی۔

ہندوستان کی سری چارانی سب سے کامیاب بولر رہیں جنہوں نے 4 وکٹیں حاصل کیں۔ شفالی ورما نے 2 وکٹیں حاصل کیں جبکہ شری یانکا پاٹل اور دیپتی شرما نے ایک ایک وکٹ حاصل کی۔58 رنز کے ہدف کے تعاقب میں ہندوستان نے صرف 5 اوورز میں 2 وکٹ کے نقصان پر 59 رنز بنا کر میچ جیت لیا۔شفالی ورما نے جارحانہ بلے بازی کرتے ہوئے صرف 15 گیندوں پر ناقابل شکست 40 رنز بنائے۔ ان کی اننگز میں 4 چوکے شامل تھے اور انہوں نے ہندوستان کو تیزی سے ہدف تک پہنچایا۔

ہندوستان نے گونالان کمالنی کو صفر اور بھارتی فلمالی کو 6 رنز پر کھو دیا۔ تاہم جاپانی ٹیم ان کامیابیوں کا فائدہ نہیں اٹھا سکی۔ رچا گھوش نے شفالی ورما کا ساتھ دیا اور 6 گیندوں پر ناقابل شکست 12 رنز بنائے۔ہندوستان کو جیت کے لیے صرف 1 رن درکار تھا جب شفالی ورما نے شِماکو کاٹو کی گیند پر لانگ آن کے اوپر سے شاندار چھکا لگا کر میچ ختم کردیا۔ اس طرح ہندوستان نے 90 گیندیں باقی رہتے ہوئے کوارٹر فائنل جیت لیا اور خواتین کرکٹ مقابلے کے سیمی فائنل میں پہنچ گیا۔سیمی فائنل کی لائن اپ بھی طے ہوگئی ہے۔ پاکستان کا مقابلہ سری لنکا سے ہوگا جبکہ ہندوستان کا سامنا بنگلہ دیش سے ہوگا۔ دونوں سیمی فائنل اتوار کو کھیلے جائیں گے۔