ممبئی پولیس کے مطابق فائرنگ کا واقعہ اتوار کی شام تقریباً 7 بجے پیش آیا، جب ٹائیگر شراف جوہو میں واقع ایک فٹ بال کلب سے نکل رہے تھے۔ الزام ہے کہ ملزمان نے اداکار کی گاڑی پر فائرنگ کی۔ ٹائیگر شراف گولی لگنے سے محفوظ رہے، تاہم ان کا ڈرائیور زخمی ہوگیا۔واقعے کے بعد مہاراشٹر کے نائب وزیر اعلیٰ ایکناتھ شندے اتوار کی رات ٹائیگر شراف کی رہائش گاہ پہنچے۔ انہوں نے بتایا کہ بارود اور شیشے کے ٹکڑے لگنے سے اداکار کے بائیں ہاتھ پر چوٹ آئی ہے۔ شندے کے مطابق ٹائیگر شراف اور ان کی والدہ عائشہ شراف اس واقعے سے خوف زدہ ہیں۔ انہوں نے ریاستی حکومت کی جانب سے ہر ممکن مدد کی یقین دہانی بھی کرائی۔

Another video #TigerShroff https://t.co/6dh9f94lSx

— Girish Kamble (@GirishKamble22) October 18, 2026

ایکناتھ شندے نے کہا کہ اس معاملے میں سخت کارروائی کی جائے گی اور معروف شخصیات کو دھمکیاں دینے کے واقعات برداشت نہیں کیے جائیں گے۔ممبئی پولیس کی کرائم برانچ کے ذرائع کے مطابق مبینہ حملہ آوروں نے فائرنگ سے پہلے ٹائیگر شراف کی نقل و حرکت کی نگرانی کی تھی۔ ذرائع کا کہنا ہے کہ انہیں معلوم تھا کہ اداکار ہر اتوار کو جوہو کے فٹ بال گراؤنڈ جاتے ہیں اور انہوں نے واردات سے پہلے ان کی سرگرمیوں پر نظر رکھی تھی۔

فائرنگ کے بعد ملزمان مبینہ طور پر ایس وی روڈ کے راستے ولے پارلے اور اندھیری کی طرف فرار ہوئے۔ بتایا جاتا ہے کہ انہوں نے اندھیری ویسٹ ریلوے اسٹیشن کے قریب اپنی موٹر سائیکل چھوڑ دی اور پھر بوریولی جانے والی ٹرین میں سوار ہوگئے۔ ابتدائی معلومات کے مطابق بعد میں انہوں نے مہاراشٹر کی سرحد بھی پار کرلی تھی۔ادھر واقعے کے بعد ممبئی کے باندرہ علاقے میں واقع گلیکسی اپارٹمنٹس میں اداکار سلمان خان کی رہائش گاہ کے باہر سکیورٹی بڑھا دی گئی ہے۔ ان کی رہائش گاہ کے باہر بلٹ پروف جیکٹ پہنے پولیس اہلکار اور پولیس کی گاڑیاں تعینات دیکھی گئیں۔اس معاملے میں بھارتیہ نیائے سنہتا (بی این ایس) کی دفعات 109(1) اور 3(5) کے علاوہ آرمز ایکٹ کی دفعات 3 اور 25 کے تحت مقدمہ درج کیا گیا ہے۔ پولیس مزید تفتیش کر رہی ہے۔