وڈودرا: صدر دروپدی مرمو نے بدھ کو طلبہ پر زور دیا کہ وہ اپنے عملی میدان میں ملک اور سماج کے مفاد کو ہمیشہ ترجیح دیں۔ انہوں نے کہا کہ اگر وہ ایسا کریں گے تو ملک اور سماج کے ساتھ خود بھی ترقی کریں گے۔ مراٹھا حکمران مہاراجہ سیاجی راؤ گائیکواڑ کے نام سے قائم مہاراجہ سیاجی راؤ یونیورسٹی آف بڑودہ کی 75ویں کانووکیشن تقریب سے خطاب کرتے ہوئے صدر مرمو نے کہا کہ تعلیم اسی وقت حقیقی معنوں میں بامقصد ہوگی جب اس سے ملک اور سماج کو فائدہ پہنچے۔

انہوں نے طلبہ سے کہا کہ وہ اپنی تعلیم کو صرف اپنے اور اپنے خاندان کے فائدے تک محدود رکھنے کے بجائے یہ بھی سوچیں کہ وہ بڑے سماجی مفاد کے لیے کیا کردار ادا کر سکتے ہیں۔ صدر مرمو نے کہا، ’’اگر طلبہ اپنے عملی میدان میں ملک اور سماج کے مفاد کو سب سے زیادہ اہمیت دیں گے تو ملک اور سماج کے ساتھ ساتھ وہ خود بھی ترقی کریں گے۔‘‘ انہوں نے کہا کہ ایسی ترقی طلبہ کو بہت اطمینان دے گی اور انہیں اپنی تعلیم کی حقیقی اہمیت کا احساس بھی ہوگا۔

صدر نے مثال دیتے ہوئے کہا، ’’اگر آپ انجینئر بن رہے ہیں تو ایسی تکنیک تیار کریں جو لوگوں کی زندگی بہتر بنائے۔ اگر آپ ڈاکٹر بن رہے ہیں تو طب کو صرف ایک پیشہ نہ سمجھیں بلکہ اسے خدمت سمجھیں۔‘‘ انہوں نے کہا کہ خدمت میں انسانیت اور امن پوشیدہ ہے اور دوسروں کی خدمت انسان کو حقیقی اطمینان فراہم کرتی ہے۔ صدر کے مطابق زندگی گزارنے کے لیے وسائل ضروری ہیں، لیکن دولت ہی سب کچھ نہیں ہے، اصل اطمینان دوسروں کی خدمت سے حاصل ہوتا ہے۔ صدر مرمو نے کہا کہ سائنس دانوں کو انسانیت کے مفاد میں مسائل کے حل تلاش کرنے کے لیے کام کرنا چاہیے، جبکہ فن کاروں اور مصنفین کو اپنی تخلیقات اور فن کے ذریعے سماج میں حساسیت اور احساس کو فروغ دینا چاہیے۔