ہریدوار: اتراکھنڈ کے وزیر اعلیٰ پشکر سنگھ دھامی نے جمعرات کو اپوزیشن پر گؤ رکشا اور گاؤ سیوا کی مخالفت کرنے کا الزام لگایا اور کہا کہ یہی جماعتیں ماضی میں بھگوان شری رام کے وجود پر سوال اٹھاتی رہی ہیں اور رام مندر کی تعمیر کی راہ میں رکاوٹیں پیدا کرتی رہی ہیں۔ دھامی ہریدوار میں کام دھینو لوک بھون میں کام دھینو لوک کے افتتاحی پروگرام میں شرکت کر رہے تھے۔ اس موقع پر انہوں نے کہا کہ اپوزیشن گاؤ سیوا کو پسماندہ ذہنیت کی علامت قرار دیتی ہے، جبکہ ان کی حکومت گائے کے تحفظ کو مذہبی عقیدے کے ساتھ ساتھ دیہی معیشت کے لیے بھی بنیادی اہمیت کا حامل سمجھتی ہے۔

انہوں نے کہا، ’’اپوزیشن کا کہنا ہے کہ گاؤ سیوا ہماری پسماندہ ذہنیت کی علامت ہے۔ ان لوگوں کو نہ گاؤ ماتا پسند ہیں اور نہ ہی ان کے عقیدت مند۔ یہی وہ لوگ ہیں جنہوں نے برسوں تک بھگوان شری رام کے وجود سے انکار کرنے کا گناہ کیا۔‘‘ رام مندر کی تعمیر کا حوالہ دیتے ہوئے وزیر اعلیٰ نے الزام لگایا کہ اپوزیشن جماعتوں نے قانونی مداخلت کے ذریعے اس عمل میں رکاوٹیں پیدا کرنے کی کوشش کی تھی۔ انہوں نے کہا، ’’جب رام مندر کی تعمیر کا عمل شروع ہوا تو انہوں نے سپریم کورٹ میں بڑے بڑے وکیلوں کی پوری فوج اتار دی اور ہر قدم پر رکاوٹیں پیدا کیں۔‘‘ دھامی نے کہا کہ ریاستی حکومت گؤ رکشا کے بنیادی ڈھانچے کو مضبوط بنانے اور مویشیوں کی دیکھ بھال اور خوراک کی سہولتیں بہتر بنانے کے لیے کام کر رہی ہے۔ انہوں نے کہا، ’’ہماری حکومت کا پختہ یقین ہے کہ گاؤ ماتا صرف ہمارے عقیدے کا مرکز ہی نہیں بلکہ ہماری دیہی معیشت کی بنیاد بھی ہے۔‘‘

انہوں نے مزید کہا کہ اسی سوچ کے تحت حکومت نے ریاست میں گؤ شالاؤں کو جدید بنانے کے ساتھ ساتھ گاؤ ماتا کی دیکھ بھال اور خوراک، خصوصاً چارے کی روزانہ فراہمی پر بھی توجہ مرکوز کی ہے۔ اس سے قبل بدھ کو دھامی نے سونیا گاندھی کی یادداشتوں پر مبنی کتاب کے حوالے سے کہا تھا کہ وہ اسے پڑھنے کے بعد اپنا ردعمل دیں گے۔ تاہم انہوں نے الزام لگایا تھا کہ کانگریس کی سیاست ہمیشہ خوشامد اور ووٹ بینک کی سیاست کے گرد گھومتی رہی ہے۔ دھامی نے صحافیوں سے کہا تھا، ’’میں نے ابھی یہ کتاب دیکھی بھی نہیں ہے، صرف اس کے بارے میں سنا ہے۔ پہلے میں اسے پڑھوں گا اور اس کے مندرجات کو سمجھوں گا، اس کے بعد جواب دوں گا۔

پورا ملک جانتا ہے کہ جس نظریے کو انہوں نے اپنایا، وہ ہمیشہ خوشامد پر مبنی رہا ہے۔ کانگریس نے 60 سال تک ملک پر حکومت کی اور اس نے صرف ووٹ بینک کی سیاست کی۔‘‘ انہوں نے الزام لگایا کہ کانگریس کی حکومتوں نے قومی سلامتی کو نظر انداز کیا اور ملک کی سرحدوں کی حفاظت کرنے والے فوجیوں کے حوصلے بلند کرنے کے لیے بھی خاطر خواہ اقدامات نہیں کیے۔ دھامی نے کہا، ’’کانگریس نے ملک کی سلامتی کے لیے کام نہیں کیا اور نہ ہی سرحدوں کی حفاظت کرنے والے ہمارے فوجیوں کے حوصلے بلند کرنے کی کوشش کی۔ کانگریس کی حکومتوں اور اس کی حمایت یافتہ حکومتوں کے دور میں فوجیوں کو سرحد پار سے دہشت گردوں، علیحدگی پسندوں اور جہادی عناصر کے حملوں کا سامنا کرنا پڑا، لیکن انہیں جوابی فائرنگ تک کے احکامات نہیں دیے گئے۔ مودی جی کے اقتدار میں آنے کے بعد ملک کی سرحدیں زیادہ محفوظ ہوئی ہیں۔‘‘