نئی دہلی: امورِ داخلہ سے متعلق پارلیمانی قائمہ کمیٹی کا آئندہ اجلاس 23 ستمبر کو پارلیمنٹ ہاؤس کمپلیکس میں ہوگا۔ اجلاس میں بچوں کے خلاف جرائم اور شمال مشرقی ریاستوں میں مرکزی حکومت کی مالی اعانت والی اسکیموں کے نفاذ سمیت مختلف امور پر تبادلۂ خیال کیا جائے گا۔ اجلاس دو الگ نشستوں میں ہوگا۔ پہلی نشست صبح 11 بجے شروع ہوگی، جس میں کمیٹی وزارت قانون و انصاف کے حکام سے ’’بچوں کے خلاف جرائم‘‘ کے موضوع پر ان کا موقف سنے گی۔
دوسری نشست دوپہر 2 بجے شروع ہوگی اور اس میں ’’شمال مشرقی ریاستوں میں مرکزی حکومت کی مالی اعانت والی اسکیموں کے نفاذ‘‘ پر غور کیا جائے گا۔ اس سلسلے میں کمیٹی وزارت برائے ترقیِ شمال مشرقی خطہ (ڈونر) کے حکام کا موقف سنے گی۔ وزارت قانون و انصاف اور ڈونر کے متعلقہ افسران اپنے اپنے اجلاس میں شرکت کریں گے اور کمیٹی کو زیرِ غور موضوعات کے بارے میں تفصیلی معلومات فراہم کریں گے۔
اجلاس کا ایجنڈا ارکان کے درمیان پہلے ہی تقسیم کیا جا چکا ہے، جبکہ راجیہ سبھا سکریٹریٹ نے کمیٹی کے تمام ارکان سے اجلاس میں شرکت کی درخواست کی ہے۔ 31 رکنی اس پارلیمانی کمیٹی کے چیئرمین بی جے پی کے راجیہ سبھا رکن رادھا موہن داس اگروال ہیں۔ کمیٹی میں لوک سبھا کے 21 اور راجیہ سبھا کے 10 ارکان شامل ہیں۔ راجیہ سبھا کے ارکان میں انڈین یونین مسلم لیگ کے رکن حارث بیرن، بی جے پی کے رکن سامک بھٹاچاریہ، نیرج شیکھر اور ترون چُگ، کانگریس کے اجے ماکن، ترنمول کانگریس کے ڈیرک اوبرائن، شیوسینا (یو بی ٹی) کے سنجے راؤت، عام آدمی پارٹی کے سنجے سنگھ اور آر جے ڈی کے سنجے یادو شامل ہیں۔
لوک سبھا کے ارکان میں مغربی بنگال کے باراسات سے رکن پارلیمنٹ کاکولی گھوش دستیدار، شیوسینا (یو بی ٹی) کے انیل یشونت دیسائی، بی جے پی کے آشیش دوبے، ستیش کمار گوتم، نوین جندل، سومتر خان، جیوتیرمے سنگھ مہاتو، بی وائی راگھویندر، وشنو دیال رام اور دلکر کلبین موہن بھائی شامل ہیں۔ کمیٹی میں کانگریس کے جے پرکاش، محمد حمداللہ سعید، پرینکا گاندھی وادرا اور امریندر سنگھ راجا وارنگ، ٹی ڈی پی کے کِسینینی شیواناتھ اور کرشنا پرساد ٹینیٹی، این سی پی (ایس پی) کی سپریا سولے اور ڈی ایم کے کے تھِرو دیانِدھی مارن سمیت دیگر ارکان بھی شامل ہیں۔ دونوں ایوانوں کی محکمہ جاتی پارلیمانی قائمہ کمیٹیوں کی مجموعی تعداد 24 ہے۔ ان میں امورِ داخلہ کی کمیٹی سمیت آٹھ کمیٹیاں راجیہ سبھا کے چیئرمین کی نگرانی اور ہدایات کے تحت کام کرتی ہیں، جبکہ باقی 16 کمیٹیاں لوک سبھا اسپیکر کی نگرانی اور ہدایات کے تحت کام کرتی ہیں۔
