نئی دہلی: مرکزی وزیر کرن رجیجو نے دہلی یونیورسٹی طلبہ یونین (ڈوسو) انتخابات میں اکھل بھارتیہ ودیارتھی پریشد (اے بی وی پی) کی کامیابی پر تنظیم کو مبارکباد دی اور کہا کہ انتخابی نتائج نوجوانوں کی آواز کی عکاسی کرتے ہیں۔ ڈوسو انتخابات کے نتائج پر ردعمل ظاہر کرتے ہوئے رجیجو نے کہا کہ یہ انتخاب ’’بہت اہم اور علامتی‘‘ تھا اور اے بی وی پی نے بڑی کامیابی حاصل کرکے ایک بار پھر اپنی مضبوط موجودگی درج کرائی ہے۔
انہوں نے کہا، ’’دہلی یونیورسٹی طلبہ یونین کا انتخاب بہت اہم اور علامتی ہے۔ اے بی وی پی نے ایک بار پھر بڑی کامیابی حاصل کرکے اپنی مضبوط موجودگی درج کرائی ہے۔ کانگریس ایک بھی نشست نہیں جیت سکی۔ اس لیے کانگریس نے ایک بار پھر ڈوسو انتخابات میں بڑا صفر حاصل کیا ہے۔ میں اے بی وی پی کے تمام امیدواروں کو دلی مبارکباد دینا چاہتا ہوں، جنہوں نے ڈوسو انتخابات میں کامیابی کی روایت قائم کی ہے۔‘‘
کانگریس کے رکن پارلیمنٹ راہل گاندھی کے ’’چھاترون کی گونج‘‘ پروگرام پر طنز کرتے ہوئے رجیجو نے کہا کہ ’’جھوٹ کی گونج‘‘ ختم ہو گئی ہے۔ انہوں نے کہا، ’’اس ’جھوٹ کی گونج‘ کو ختم کر دیا گیا ہے اور طلبہ نے اپنی بات پوری وضاحت کے ساتھ کہہ دی ہے۔ دہلی یونیورسٹی طلبہ یونین کا انتخاب ایک طرح سے ریفرنڈم ہے اور اس نے نوجوانوں کی آواز سامنے رکھ دی ہے۔‘‘
ہفتہ کو ووٹوں کی گنتی مکمل ہونے کے بعد اے بی وی پی کے امیدوار یش ڈباس ڈوسو کے صدر منتخب ہوئے، جبکہ آزاد امیدوار دیپانشو شوقین نے نائب صدر کا عہدہ جیتا۔ اے بی وی پی نے ڈوسو کے چار اہم عہدوں میں سے تین پر کامیابی حاصل کی۔ یش ڈباس نے صدر، ریا چھابڑی نے سکریٹری اور لکشیا راج سنگھ نے جوائنٹ سکریٹری کا عہدہ جیتا۔
این ایس یو آئی کے سابق رکن دیپانشو شوقین آزاد امیدوار کی حیثیت سے نائب صدر منتخب ہوئے۔ 20 مرحلوں کی گنتی کے بعد جاری حتمی نتائج کے مطابق یش ڈباس نے 24,576 ووٹ حاصل کرکے این ایس یو آئی کے امیدوار وجے مینا کو شکست دی، جنہیں 22,523 ووٹ ملے۔ نائب صدر کے انتخاب میں دیپانشو شوقین نے 30,615 ووٹ حاصل کیے۔ اے بی وی پی کے ایشو موریہ کو 16,910 جبکہ این ایس یو آئی کے ویر چترتھ کو 4,313 ووٹ ملے۔
سکریٹری کے عہدے پر اے بی وی پی کی ریا چھابڑی نے 21,650 ووٹ حاصل کرکے این ایس یو آئی کی نمریتا چودھری کو شکست دی، جنہیں 14,869 ووٹ ملے۔ جوائنٹ سکریٹری کے عہدے پر اے بی وی پی کے لکشیا راج سنگھ نے 16,641 ووٹ حاصل کرکے کامیابی حاصل کی۔ آزاد امیدوار ویشیش یادو کو 15,778 اور این ایس یو آئی کے گوپال چودھری کو 15,106 ووٹ ملے۔
