نئی دہلی: صدر جمہوریہ دروپدی مرمو نے جمعرات کو کہا کہ ہمارے ملک میں صلاحیتوں اور ہنر کی کوئی کمی نہیں ہے، ضرورت صرف اس بات کی ہے کہ طلبہ کو مناسب مواقع، سازگار ماحول اور صحیح رہنمائی فراہم کی جائے۔ صدر جمہوریہ نے راشٹرپتی بھون میں ایکلویہ ماڈل رہائشی اسکولوں کے ہونہار طلبہ کے ایک گروپ سے ملاقات کے دوران ان پر زور دیا کہ وہ بلند عزائم رکھیں اور لگن، نظم و ضبط اور خود اعتمادی کے ساتھ اپنے خوابوں کو حقیقت میں بدلنے کی کوشش کریں۔

انہوں نے کہا کہ تعلیم کا مقصد صرف اپنے لیے روزگار حاصل کرنا نہیں ہونا چاہیے بلکہ طلبہ کو اپنے علم کے ذریعے دوسروں کے لیے بھی روزگار کے مواقع پیدا کرنے کا ہدف رکھنا چاہیے۔ انہوں نے اس بات پر زور دیا کہ جب ملک کے نوجوان خود روزگار پیدا کرنے والے بنیں گے تو ملک کی ہمہ گیر ترقی کو مزید رفتار ملے گی۔ صدر جمہوریہ کے دفتر کی جانب سے جاری ایک بیان کے مطابق، ایکلویہ ماڈل رہائشی اسکول نہ صرف قبائلی طلبہ کو معیاری تعلیم فراہم کر رہے ہیں بلکہ انہیں اپنی مختلف صلاحیتوں کو نکھارنے کے مواقع بھی دے رہے ہیں۔ صدر مرمو نے کہا کہ ملک میں صلاحیتوں کی کوئی کمی نہیں ہے۔ طلبہ کو صرف مناسب مواقع، سازگار ماحول اور صحیح رہنمائی کی ضرورت ہے۔ انہوں نے اس بات پر خوشی کا اظہار کیا کہ ایکلویہ ماڈل رہائشی اسکولوں میں لڑکوں اور لڑکیوں کی تعداد برابر ہے۔

ان کے مطابق یہ ملک میں ہمہ گیر ترقی کی جانب پیش رفت کا ایک اہم ثبوت ہے۔ طلبہ سے خطاب کرتے ہوئے صدر جمہوریہ نے کہا کہ ملک 2047 تک ترقی یافتہ ہندوستان بننے کے ہدف کی طرف آگے بڑھ رہا ہے۔ اس مقصد کے حصول کے لیے ضروری ہے کہ ملک کے ہر خطے اور معاشرے کے ہر طبقے کی ترقی ہو۔ انہوں نے طلبہ کو مشورہ دیا کہ وہ حالات حاضرہ اور ملک و دنیا میں ہونے والی تبدیلیوں سے باخبر رہیں۔ اس سے ان میں منطقی انداز میں سوچنے اور چیزوں کا تجزیہ کرنے کی صلاحیت پیدا ہوگی۔

صدر جمہوریہ نے طلبہ سے یہ بھی کہا کہ جب کبھی وہ اپنے گاؤں جائیں تو اپنے اہل خانہ، رشتہ داروں اور پڑوسیوں کو حالات حاضرہ کے بارے میں بتائیں اور حکومت کی جانب سے چلائی جانے والی عوامی فلاح و بہبود کی اسکیموں کی معلومات ان تک پہنچائیں۔ انہوں نے کہا کہ طلبہ کی یہ کوششیں ان کے خاندان اور معاشرے دونوں کے لیے فائدہ مند ثابت ہوں گی اور ان کی تعلیم کو مزید بامقصد بھی بنائیں گی۔ ایکلویہ ماڈل رہائشی اسکولوں کے ہونہار طلبہ کے ساتھ اس ملاقات کا اہتمام قبائلی امور کی وزارت نے جن جاتیہ گورو پکھواڑا کے تحت کیا تھا۔ یہ پروگرام ہر سال قبائلی حقوق کے علمبردار اور مجاہد آزادی بھگوان برسا منڈا کی یوم پیدائش کی یاد میں منایا جاتا ہے۔