وارانسی: وزیر اعظم نریندر مودی کی 76ویں سالگرہ کے موقع پر وارانسی میں جمعرات کو کئی خصوصی پروگرام منعقد کیے جا رہے ہیں۔ اس موقع پر 76 نوجوان پجاریوں نے دریائے گنگا کے کنارے خصوصی پوجا کی اور مودی کی اچھی صحت اور لمبی عمر کی دعا کرتے ہوئے گنگا کا دودھ سے ابھیشیک کیا۔ مقامی بی جے پی رکن اسمبلی اور اترپردیش کے سابق وزیر نیل کنٹھ تیواری کی قیادت میں منعقدہ مذہبی پروگرام میں 76 ’بٹکوں‘ نے ویدک منتروں کے درمیان گنگا کے کنارے مذہبی رسومات ادا کیں۔ پجاریوں نے روایتی طریقے سے پوجا کی اور وزیر اعظم کی صحت، لمبی عمر اور فلاح و بہبود کے لیے دعا کی۔

پروگرام میں شریک کئی افراد کے ہاتھوں میں مودی کی تصاویر بھی نظر آئیں۔ مودی وارانسی سے لوک سبھا کے رکن ہیں۔ نیل کنٹھ تیواری نے کہا کہ مودی کی سالگرہ کو خدمت، روحانی عقیدت اور عوامی فلاح کے جذبے کے ساتھ منایا جا رہا ہے۔ انہوں نے کہا، ’’اسی سلسلے میں 76 بٹکوں نے ماں گنگا کا دودھ سے ابھیشیک کیا اور وزیر اعظم کی اچھی صحت اور لمبی عمر کے لیے دعا کی۔‘‘

انہوں نے کہا کہ کاشی کی مذہبی اور روحانی روایات میں گنگا کو خاص مقام حاصل ہے۔ وزیر اعظم کی سالگرہ پر گنگا کی پوجا اور ان کی لمبی اور صحت مند زندگی کے لیے دعا شہر کی عقیدت اور روایات سے جڑی ہوئی ہے۔ وارانسی میں دن بھر کئی دیگر پروگرام بھی منعقد کیے جائیں گے۔ ان میں وزیر دفاع راج ناتھ سنگھ، اترپردیش کے وزیر اعلیٰ یوگی آدتیہ ناتھ، مرکزی وزیر چراغ پاسوان، آندھرا پردیش کے وزیر اعلیٰ این چندرا بابو نائیڈو، اترپردیش بی جے پی کے صدر اور مرکزی وزیر مملکت برائے خزانہ پنکج چودھری سمیت کئی وزرا، ارکان اسمبلی اور دیگر عوامی نمائندوں کے شرکت کرنے کی توقع ہے۔ دن کے اہم پروگراموں میں ’سیوا سنکلپ‘ موٹر سائیکل سفر بھی شامل ہے، جو وارانسی سے گجرات کے وڈ نگر تک جائے گا۔ وڈ نگر وزیر اعظم مودی کی جائے پیدائش ہے۔ اس سفر کو وارانسی کے سگرا علاقے میں واقع رودراکش انٹرنیشنل کوآپریشن اینڈ کنونشن سینٹر سے روانہ کیا جائے گا۔ ’

سیوا سنکلپ ابھیان‘ کے تحت تقریباً 500 افراد 250 موٹر سائیکلوں پر یہ سفر کریں گے۔ یہ مہم مودی کی 25 سالہ عوامی خدمت کے موقع پر منعقد کی جا رہی ہے۔ سفر کو راج ناتھ سنگھ اور یوگی آدتیہ ناتھ روانہ کریں گے۔ چندرابابو نائیڈو، چراغ پاسوان، پنکج چودھری اور اترپردیش کے نائب وزرائے اعلیٰ کیشو پرساد موریہ اور برجیش پاٹھک بھی پروگرام میں شرکت کریں گے۔ موٹر سائیکل سفر شروع ہونے سے پہلے اس میں شامل 51 سیوا رضاکار للتا گھاٹ پہنچیں گے اور گنگا جل لے کر کاشی وشوناتھ مندر جائیں گے، جہاں پوجا اور جل ابھیشیک کیا جائے گا۔ پروگرام میں ویدک منتر، 11 کنڈوں پر ہون، شرکا کا تلک، ڈمرو بجانے کی پیش کش اور سنتوں سے آشیرواد بھی شامل ہوگا۔