نئی دہلی :وزارت قبائلی امور نے بتایا کہ نیشنل شیڈیولڈ ٹرائبس فنانس اینڈ ڈیولپمنٹ کارپوریشن (NSTFDC) اور ہندوستان پیٹرولیم کارپوریشن لمیٹڈ (HPCL) نے راجستھان کے 11 اضلاع میں قائم 29 فعال ایکلویہ ماڈل رہائشی اسکولوں (EMRS) میں کمپیوٹر لیب اور اسمارٹ کلاس روم کی مربوط سہولیات قائم کرنے کے لیے مفاہمت کی ایک یادداشت (MoU) پر دستخط کیے ہیں۔ وزارت کے مطابق ٹیکنالوجی سے لیس ان تعلیمی سہولیات سے ہر سال 10 ہزار سے زیادہ درج فہرست قبائل کے طلبہ مستفید ہوں گے، جن میں لڑکیوں کی بھی مساوی نمائندگی ہوگی۔
مفاہمت کی یادداشت پر وزارت قبائلی امور کی سکریٹری رنجنا چوپڑا، وزارت کے جوائنٹ سکریٹری اور NSTFDC کے چیئرمین و منیجنگ ڈائریکٹر ٹی روموان پائیٹے، وزارت کے ڈپٹی سکریٹری گنیش ناگراجن اور دیگر اعلیٰ افسران کی موجودگی میں دستخط کیے گئے۔ HPCL کے وفد میں ڈائریکٹر (ہیومن ریسورس) کے ایس شیٹی، چیف جنرل منیجر ڈی سی او پون کمار سہگل، چیف جنرل منیجر سی ایس آر و پی آر سی سی انوپم تیواری، سی ایس آر مینیجر بھارگَو چوہان اور سی ایس آر افسر ساکشی دویدی شامل تھیں۔ NSTFDC کے وفد میں اے جی ایم، پروجیکٹس و سی ایس آر بس متا داس، چیف مینیجر ہمانشو وشوکرما اور مینیجر، پروجیکٹس و سی ایس آر وکاس رنجن شامل تھے۔
وزارت نے بتایا کہ HPCL بورڈ کی جانب سے منظور کیے گئے اس منصوبے کے لیے کل 16.01 کروڑ روپے کا بجٹ مقرر کیا گیا ہے اور مفاہمت کی یادداشت پر دستخط کی تاریخ سے چھ ماہ کے اندر اسے مکمل کرنے کا منصوبہ ہے۔ منصوبے کے تحت ہر اسکول میں چار اسمارٹ کلاس روم قائم کیے جائیں گے، جن میں 86 انچ کے انٹرایکٹو فلیٹ پینل، پہلے سے نصب لائسنس یافتہ سافٹ ویئر، منتخب تعلیمی مواد اور اسپیکر و ویب کیم سمیت آڈیو ویژول آلات موجود ہوں گے۔
ہر اسکول میں مکمل نیٹ ورک سے منسلک کمپیوٹر لیب بھی قائم کی جائے گی، جس میں ڈیسک ٹاپ کمپیوٹر، یو پی ایس بیک اَپ، منظم LAN، ملٹی فنکشن پرنٹر، فرنیچر، ایئر کنڈیشننگ، بجلی کے نظام کی مرمت و بہتری اور حفاظتی انتظامات شامل ہوں گے۔ اس کے علاوہ ہر اسکول میں مسابقتی امتحانات کی تیاری کے مواد سے لیس 10 ٹیبلٹس فراہم کیے جائیں گے۔
انٹرنیٹ کنکشن کے لیے وائرنگ، تنصیب اور ایک سال کی سبسکرپشن بھی فراہم کی جائے گی۔ منصوبے میں شامل 29 ایکلویہ ماڈل رہائشی اسکول الور، بانسواڑہ، باراں، ڈونگرپور، جے پور، کرولی، پرتاپ گڑھ، سوائی مادھوپور، سروہی، ٹونک اور اودے پور اضلاع میں واقع ہیں۔ مکمل منظور شدہ گنجائش کے مطابق ان اسکولوں میں جماعت ششم سے بارہویں تک کے 13,920 طلبہ تعلیم حاصل کر سکتے ہیں، جن میں زیادہ تر پہلی نسل کے ڈیجیٹل لرنرز ہیں۔ وزارت نے کہا کہ یہ پہل قومی تعلیمی پالیسی 2020 کے مطابق ہے، جس میں تدریس و تعلیم میں ٹیکنالوجی کے استعمال، سب کے لیے ڈیجیٹل خواندگی اور مڈل اسٹیج سے کمپیوٹیشنل تھنکنگ اور کوڈنگ کو فروغ دینے پر زور دیا گیا ہے۔
اس کے تحت سماجی و اقتصادی طور پر پسماندہ طبقات، بشمول قبائلی بچوں، کے لیے خصوصی تعاون بھی شامل ہے۔ یہ منصوبہ محکمہ پبلک انٹرپرائزز کی جانب سے 2026-27 اور 2027-28 کے دوران سرکاری شعبے کی کمپنیوں (CPSEs) کی کارپوریٹ سماجی ذمہ داری (CSR) سرگرمیوں کے لیے مقرر کردہ مشترکہ موضوع ’’اختراعی ذریعۂ معاش میں بہتری‘‘ سے بھی مطابقت رکھتا ہے۔ تقریب سے خطاب کرتے ہوئے وزارت قبائلی امور کی سکریٹری نے کئی نسلوں کی ترقی کو ممکن بنانے میں تعلیم کے اہم کردار پر زور دیا۔ انہوں نے کہا کہ ایکلویہ ماڈل رہائشی اسکول قبائلی طلبہ کے لیے اعلیٰ تعلیم اور مختلف شعبوں میں کیریئر کے راستے کھول رہے ہیں۔
انہوں نے امید ظاہر کی کہ HPCL کے تعاون سے شروع ہونے والا یہ منصوبہ ٹیکنالوجی اور اعلیٰ تعلیم کے مواقع تک رسائی کو مزید مضبوط کرے گا۔ منصوبے پر عمل درآمد میں وزارت قبائلی امور کے ادارہ جاتی نظام کا استعمال کیا جائے گا۔ NSTFDC عمل درآمد اور خریداری کی ذمہ داری سنبھالے گا، جبکہ NESTS تعلیمی توثیق اور کام کی تکرار روکنے کا کام کرے گا۔ ریاستی EMRS سوسائٹی اور اسکولوں کے پرنسپل جگہ کی تیاری اور روزمرہ استعمال کی ذمہ داری سنبھالیں گے۔ سکریٹری نے اس منصوبے کی حمایت کے لیے HPCL اور وزارت پٹرولیم و قدرتی گیس کا شکریہ ادا کیا اور اسے قبائلی برادریوں کی ترقی کے لیے حکومت کے مختلف اداروں کے مل کر کام کرنے کی ایک مثال قرار دیا۔
