کولکاتا: مغربی بنگال کے وزیر اعلیٰ شبھندو ادھیکاری نے جمعہ کے روز کہا کہ ریاست میں سابقہ ترنمول کانگریس حکومت کے دور میں دیہی رہائش اسکیم کے تحت دھوکے سے مالی امداد حاصل کرنے والے 12,000 جعلی مستفیدین کی شناخت کرلی گئی ہے اور ان کے خلاف قانونی کارروائی کی جائے گی۔ شبھندو نے یہاں ایک پریس کانفرنس میں کہا، ’’جیسا کہ چیف سکریٹری منوج اگروال نے بتایا ہے، سابقہ حکومت کی ’بانگلار باڑی‘ اسکیم کے تحت 57,000 جعلی مستفیدین نے غیر قانونی طور پر درخواستیں دی تھیں اور انہیں فہرست سے ہٹا دیا گیا تھا۔ ہم نے ان میں سے 12,000 لوگوں کی شناخت کرلی ہے، جنہوں نے مالی امداد حاصل کی تھی اور اب ان سے رقم واپس کرنے کو کہا گیا ہے۔

ایک ہزار افراد رقم واپس کرچکے ہیں، جبکہ میں باقی لوگوں سے بھی ایسا ہی کرنے کی اپیل کرتا ہوں۔‘‘ انہوں نے کہا کہ سابقہ حکومت کے دور میں ہونے والی مبینہ ادارہ جاتی بدعنوانی کی تحقیقات کے لیے ایک ریٹائرڈ جج کی سربراہی میں خصوصی تحقیقاتی ٹیم (ایس آئی ٹی) تشکیل دی گئی ہے۔ شبھندو نے کہا، ’’جن افسران نے ان مستفیدین کو دھوکے سے مالی امداد حاصل کرنے میں مدد کی، ان کی شناخت کی جائے گی اور ان کے خلاف کارروائی ہوگی۔ ہم اس معاملے کی تحقیقات سی آئی ڈی (کرائم انویسٹی گیشن ڈپارٹمنٹ) سے کرائیں گے۔‘‘

وزیر اعلیٰ نے سابقہ ترنمول حکومت پر غریبوں کے لیے شروع کی گئی دیہی رہائش اسکیم کو سیاسی رنگ دینے کا الزام لگاتے ہوئے کہا کہ ترنمول حکومت نے جھوٹا دعویٰ کیا تھا کہ اگر بھارتیہ جنتا پارٹی (بی جے پی) اقتدار میں آتی ہے تو ’بانگلار باڑی‘ اسکیم کے تحت آنے والے 18 سے 19 لاکھ لوگوں کو مالی امداد نہیں ملے گی۔ انہوں نے کہا، ’’لیکن ہم نے اس دعوے کو غلط ثابت کردیا، کیونکہ ہم سیاسی وابستگی، ذات یا برادری کی بنیاد پر امتیاز کرنے پر یقین نہیں رکھتے۔ ہم نے پہلے مرحلے میں رقم بھی تقسیم کردی۔‘‘

شبھندو نے کہا کہ نظرثانی شدہ وزیر اعلیٰ رہائش اسکیم کے دوسرے مرحلے میں مزید 7,171 دیہی مستفیدین کو مالی امداد دی جائے گی، جس کے بعد اس اسکیم پر حکومت کا مجموعی خرچ بڑھ کر 4,200 کروڑ روپے ہوجائے گا۔ انہوں نے گھروں کی چھتوں پر شمسی پینل لگانے کی حوصلہ افزائی کرنے والی ’پی ایم سوریہ یوجنا‘ کا ذکر کرتے ہوئے کہا کہ ریاست کو 1.1 لاکھ شمسی یونٹ حاصل ہوئے ہیں۔ شبھندو نے دیہی خاندانوں سے اپیل کی کہ وہ بجلی کے بڑھتے اخراجات سے بچنے کے لیے اپنے گھروں پر شمسی پینل لگوائیں۔ انہوں نے کہا کہ کابینہ کی منظوری ملنے کے بعد پنچایت محکمہ میں تقریباً 8,000 ملازمین کی بھرتی کی جائے گی۔

وزیر اعلیٰ نے کہا کہ ’انّ پورنا یوجنا‘ سے 1.65 کروڑ خواتین کو فائدہ پہنچا ہے اور دیگر پسماندہ طبقات (او بی سی) کے مستفیدین کی تصدیق کا عمل یکم دسمبر تک مکمل کرلیا جائے گا۔ ایک سرکاری بیان میں کہا گیا ہے کہ ریاستی حکومت نے دیہی رہائش اسکیم کے تحت منظور شدہ مکانات کی تعمیر مکمل کرنے کے لیے جمعہ کے روز تقریباً 7 لاکھ مستفیدین کو مالی امداد کی دوسری قسط کے طور پر 4,201 کروڑ روپے جاری کیے۔ بیان کے مطابق، ’’شبھندو نے نابنّا آڈیٹوریم میں منعقدہ پروگرام میں دوسری قسط کی تقسیم کا اعلان کیا، جہاں مستفیدین میں چیک تقسیم کیے گئے۔

ریاست کے مختلف بلاکس اور اضلاع میں بھی اسی طرح کے پروگرام منعقد کیے گئے، جن میں مقامی وزرا، ارکان پارلیمنٹ، ارکان اسمبلی اور دیگر عوامی نمائندوں نے ویڈیو کانفرنس کے ذریعے شرکت کی۔‘‘ بیان میں کہا گیا ہے کہ تازہ ادائیگی کے بعد ریاستی حکومت نے موجودہ مرحلے میں تقریباً 17.21 لاکھ اہل مستفیدین کو دی جانے والی مالی امداد کی دوسری قسط کے طور پر مجموعی طور پر 10,323 کروڑ روپے جاری کردیے ہیں۔ دیہی رہائش اسکیم کے تحت منظور شدہ مکانات کی تعمیر مکمل کرنے کے لیے ہر مستفید فرد دوسری قسط کے طور پر 60,000 روپے حاصل کرنے کا اہل ہے۔