اندور: دہلی میں 10 اکتوبر کو کاکروچ جنتا پارٹی (سی جے پی) کے مجوزہ احتجاج سے پہلے اندور اور دہلی کے درمیان چلنے والی کئی ٹرینیں منسوخ کر دی گئی ہیں، جبکہ راجدھانی ایکسپریس اور آگست کرانتی ایکسپریس ہفتے کو پانچ گھنٹے کی تاخیر سے چلیں گی۔ رتنا لام ڈویژن کے تعلقات عامہ کے افسر مکیش کمار نے جمعہ کو یہ اطلاع دی۔ انہوں نے ٹرینوں کی منسوخی اور اوقات میں تبدیلی کی وجہ انتظامی امور سے متعلق بتایا ہے۔

مکیش کمار نے خبر رساں ایجنسی اے این آئی سے بات کرتے ہوئے کہا کہ رتنا لام ڈویژن میں اندور اور ڈاکٹر امبیڈکر نگر سے روانہ ہونے والی بعض ٹرینوں کے علاوہ ڈویژن کے دیگر اسٹیشنوں سے گزرنے والی ٹرینیں بھی 9 اکتوبر کے لیے منسوخ یا ان کے اوقات میں تبدیلی کی گئی ہے۔ انہوں نے بتایا کہ اندور سے متعلق تین ٹرینیں منسوخ کی گئی ہیں۔ ان میں ٹرین نمبر 20155، ڈاکٹر امبیڈکر نگر سے اندور؛ ٹرین نمبر 09309، اندور سے نئی دہلی اسپیشل؛ اور ٹرین نمبر 12415، اندور سے نئی دہلی ایکسپریس شامل ہیں۔ دہلی جانے والی یووا ایکسپریس بھی منسوخ کر دی گئی ہے۔

مکیش کمار کے مطابق، ممبئی سینٹرل سے 9 اکتوبر کو روانہ ہونے والی راجدھانی ایکسپریس (12951) اور آگست کرانتی ایکسپریس (12953) کے اوقات میں بھی تبدیلی کی گئی ہے۔ اب یہ دونوں ٹرینیں مقررہ وقت سے پانچ گھنٹے تاخیر سے چلیں گی۔ انہوں نے کہا کہ یہ تبدیلی انتظامی وجوہات کی بنا پر کی گئی ہے اور منسوخ ہونے والی ٹرینوں میں تصدیق شدہ ریزرویشن رکھنے والے مسافروں کو مکمل رقم واپس ملے گی۔ ادھر، ذرائع کے مطابق، ہندوستانی ریلوے نے 10 اکتوبر کو صبح 4 بجے سے دوپہر 2 بجے کے درمیان نئی دہلی اور حضرت نظام الدین ریلوے اسٹیشنوں پر پہنچنے والی میل اور ایکسپریس ٹرینوں کو بھی منسوخ کرنے کا فیصلہ کیا ہے۔

یہ فیصلہ ان ٹرینوں پر لاگو ہوگا جو اپنے ابتدائی اسٹیشنوں سے 9 اکتوبر کو دوپہر 2 بجے کے بعد روانہ ہونے والی تھیں اور مقررہ مدت کے دوران نئی دہلی یا حضرت نظام الدین پہنچنے والی تھیں۔ ذرائع کے مطابق، یہ قدم خفیہ اطلاعات اور ٹریفک سے متعلق مشوروں کے بعد اٹھایا گیا ہے۔ ان اطلاعات میں مجوزہ احتجاج کے دوران دونوں ریلوے اسٹیشنوں کے اطراف سڑکوں پر شدید ٹریفک جام ہونے کا خدشہ ظاہر کیا گیا تھا۔

اس کے علاوہ، ویسٹ سینٹرل ریلوے کے بھوپال ڈویژن نے بھی انتظامی وجوہات کی بنا پر 9 اکتوبر کو ممبئی سے حضرت نظام الدین جانے والی راجدھانی ایکسپریس منسوخ کرنے کا اعلان کیا ہے۔ کاکروچ جنتا پارٹی نے چیف الیکشن کمشنر گیانیش کمار کی جواب دہی اور مبینہ ووٹ چوری کے معاملے پر 10 اکتوبر کو جنتر منتر پر احتجاج کا اعلان کیا ہے۔ دہلی پولیس نے مختصر نوٹس، ماضی میں ہدایات پر عمل نہ کرنے اور عوامی تحفظ، امن و قانون اور ٹریفک کے انتظام سے متعلق خدشات کا حوالہ دیتے ہوئے احتجاج کی اجازت دینے سے انکار کر دیا ہے۔ مجوزہ احتجاج کے پیش نظر دہلی کی کئی سرحدوں پر بھی سکیورٹی بڑھا دی گئی ہے۔