نئی دہلی: بالی ووڈ اداکارہ سارہ علی خان کی ایک ویڈیو سوشل میڈیا پر وائرل ہو رہی ہے، جس میں وہ اپنے ساتھی اداکار آیوشمان کھرانہ کے ساتھ امرتسر کے گولڈن ٹیمپل میں ماتھا ٹیکتے ہوئے جذباتی ہو جاتی ہیں اور ان کی آنکھوں سے آنسو بہنے لگتے ہیں۔ سارہ علی خان اور آیوشمان کھرانہ جلد ہی اپنی آنے والی فلم ’اڑتا تیر‘ میں ایک ساتھ نظر آئیں گے۔ یہ فلم 23 اکتوبر کو سنیما گھروں میں ریلیز ہونے والی ہے۔ منگل، 20 اکتوبر کو دسہرہ کے موقع پر دونوں اداکار امرتسر کے گولڈن ٹیمپل پہنچے۔

فلم کی ریلیز سے پہلے انہوں نے مقدس مقام پر ماتھا ٹیکا، دعائیں مانگیں اور اپنی فلم کی کامیابی کے لیے بھی دعا کی۔ اس موقع کی تصاویر اور ویڈیوز سوشل میڈیا پر تیزی سے وائرل ہو رہی ہیں۔ گولڈن ٹیمپل میں حاضری کے دوران سارہ علی خان سفید پنجابی لباس میں نظر آئیں، جبکہ آیوشمان کھرانہ نے سفید کرتا پہن رکھا تھا۔ تاہم سارہ کی ایک ویڈیو نے خاص طور پر لوگوں کی توجہ حاصل کی ہے۔

وائرل ویڈیو میں سارہ علی خان گردوارے میں حاضری دیتے ہوئے جذباتی ہوتی دکھائی دیتی ہیں۔ ان کی آنکھوں سے آنسو بہہ رہے ہیں اور وہ زار و قطار روتی نظر آتی ہیں۔ ان کی اس جذباتی کیفیت پر سوشل میڈیا صارفین مختلف ردعمل ظاہر کر رہے ہیں۔ کچھ صارفین نے سارہ کے آنسوؤں کو جذباتی ڈراما قرار دیا، جبکہ بعض لوگوں کا کہنا ہے کہ وہ یہاں بھی ضرورت سے زیادہ اداکاری کر رہی ہیں۔ دوسری جانب کئی صارفین نے ان کے جذبات کو عقیدت اور ایمان کی طاقت قرار دیا ہے۔

کچھ لوگوں نے یہ بھی کہا کہ گردوارے میں حاضری کے دوران بہت سے افراد جذباتی ہو جاتے ہیں اور ان کی آنکھوں سے آنسو بہنے لگتے ہیں۔ بعض صارفین نے اس حوالے سے اپنے ذاتی تجربات بھی بیان کیے ہیں۔ سارہ علی خان کی یہ ویڈیو اس وقت سوشل میڈیا پر خاصی توجہ حاصل کر رہی ہے اور ان کے جذباتی انداز پر بحث جاری ہے۔ سارہ علی خان اس سے پہلے بھی سوشل میڈیا پر اپنی پوسٹوں کے ذریعے عقیدت اور فطرت سے اپنی محبت کا اظہار کرتی رہی ہیں۔