نئی دہلی: دہلی ہائی کورٹ نے بھارتی یوتھ کانگریس کی اس عرضی پر جمعہ کو سماعت کرنے پر رضامندی ظاہر کی ہے، جس میں مبینہ بے ضابطگیوں کے خلاف چیف الیکشن کمشنر گیانیش کمار کے خلاف جنتر منتر پر احتجاج کرنے کی اجازت مانگی گئی ہے۔ عرضی کو فوری طور پر سماعت کے لیے فہرست میں شامل کرنے کی درخواست جمعرات کو قائم مقام چیف جسٹس نیتن واسودیو سامبرے اور جسٹس سنجے شرما کی بنچ کے سامنے پیش کی گئی۔

عدالت نے کہا کہ عرضی کو جمعہ کو سماعت کے لیے فہرست میں شامل کیا جائے گا۔ اگر ایسا نہیں ہوتا تو درخواست گزار دوبارہ عدالت کے سامنے معاملہ پیش کر سکتا ہے۔ بھارتی یوتھ کانگریس نے جنتر منتر پر احتجاج کی اجازت دینے سے دہلی پولیس کے انکار کے حکم کو چیلنج کرتے ہوئے ہائی کورٹ سے رجوع کیا ہے۔ تنظیم انتخابی فہرستوں کی خصوصی گہری نظرثانی (ایس آئی آر) میں مبینہ بے ضابطگیوں کو لے کر چیف الیکشن کمشنر گیانیش کمار کے استعفے کا مطالبہ کر رہی ہے۔