نئی دہلی: سپریم کورٹ نے جمعرات کو پنجاب حکومت کو ہدایت دی کہ وہ ان علاقوں میں معاوضہ جنگلات لگانے کے لیے مناسب زمین فراہم کرنے کی تجویز پیش کرے، جہاں سڑکوں کی تعمیر کے لیے ہندوستانی قومی شاہراہ اتھارٹی (این ایچ اے آئی) کو زمین درکار ہے۔ چیف جسٹس سوریہ کانت، جسٹس جوی مالیا باگچی اور جسٹس وی موہن کی بنچ نے پنجاب میں جنگلات کے رقبے میں کمی اور شجرکاری کے منصوبوں پر مناسب عمل نہ ہونے پر تشویش کا اظہار کیا۔

این ایچ اے آئی کی جانب سے پیش ہوئے سالیسٹر جنرل تشار مہتا نے کہا کہ ہائی کورٹ کی جانب سے مسلسل ایسے احکامات جاری کیے جا رہے ہیں جن کے تحت پنجاب میں درختوں کی کٹائی پر پابندی ہے، جس کی وجہ سے عوامی سڑکوں کی تعمیر میں مشکلات پیش آ رہی ہیں۔ مہتا نے کہا، ’’یہ حکم مستقل طور پر جاری نہیں رہ سکتا۔ ہم معاوضہ جنگلات کی قانونی ضرورت کے پابند ہیں۔ درختوں کی کٹائی کے بدلے معاوضہ جنگلات لگانا لازمی ہے۔

پنجاب ایک سرحدی ریاست ہے اور تزویراتی مقاصد کے لیے کچھ سڑکوں کی تعمیر ضروری ہے۔‘‘ بنچ نے پوچھا کہ کیا جن علاقوں میں درخت کاٹے جانے ہیں، وہاں سے پانچ کلومیٹر کے دائرے میں معاوضہ جنگلات لگانے کے لیے زمین مختص کی جاتی ہے۔ اس پر مہتا نے کہا کہ بعض اوقات زمین مختص کی جاتی ہے اور بعض اوقات نہیں کی جاتی۔ کچھ معاملات میں پانچ کلومیٹر کے دائرے میں زمین مختص کرنا ممکن نہیں ہوتا، تاہم درخت لگائے جا رہے ہیں۔ انہوں نے کہا کہ ہائی کورٹ کے احکامات کی وجہ سے عوامی منصوبے رک رہے ہیں۔

اس کے بعد سپریم کورٹ نے پنجاب حکومت کو ہدایت دی کہ وہ ان علاقوں میں معاوضہ جنگلات کے لیے مناسب زمین فراہم کرنے کی تجویز پیش کرے جہاں سڑکوں کی تعمیر کے لیے زمین درکار ہے۔ سپریم کورٹ نے این ایچ اے آئی کو اپنی درخواست کی ایک نقل پنجاب حکومت کو فراہم کرنے کی ہدایت دی اور ریاستی حکومت سے اس معاملے میں جواب طلب کیا۔

دراصل 24 دسمبر 2025 کو پنجاب اور ہریانہ ہائی کورٹ نے پنجاب میں جنگلات کے رقبے میں مسلسل کمی پر تشویش ظاہر کرتے ہوئے منصوبوں اور دیگر سرگرمیوں کے لیے درختوں کی کٹائی پر پابندی عائد کردی تھی۔ اس حکم میں وقتاً فوقتاً ترمیم بھی کی گئی۔ ہائی کورٹ نے این ایچ اے آئی کی زیر تعمیر زیرکپور بائی پاس منصوبے کے لیے تقریباً 5 ہزار درخت کاٹنے کے خلاف دائر مفاد عامہ کی عرضی پر سماعت کرتے ہوئے یہ حکم جاری کیا تھا۔ یہ منصوبہ پنجاب کے زیرکپور کو ہریانہ میں چندی گڑھ-شملہ شاہراہ پر واقع ایک ٹول پلازہ سے جوڑتا ہے۔