نئی دہلی: صدر جمہوریہ دروپدی مرمو نے کھیلوں کے میدان میں نمایاں کارکردگی کے اعتراف میں 4 کھلاڑیوں کو ارجن ایوارڈ 2025 سے نوازا۔ ایوارڈ حاصل کرنے والوں میں کبڈی کے کھلاڑی پوجا اور سرجیت کے علاوہ ہاکی کے کھلاڑی لالریمسیا می اور راج کمار پال شامل ہیں۔ پوجا کو کبڈی کے میدان میں ان کی شاندار کارکردگی کے لیے یہ اعزاز دیا گیا۔ انہوں نے ہانگژو ایشیائی کھیلوں اور چھٹی ایشیائی کبڈی چیمپئن شپ میں تمغے جیتے تھے۔ صدر جمہوریہ کے سرکاری ایکس ہینڈل پر جاری بیان کے مطابق، صدر دروپدی مرمو نے پوجا کو کبڈی میں نمایاں کامیابیوں کے اعتراف میں ارجن ایوارڈ 2025 پیش کیا۔ پوجا نے ہانگژو ایشیائی کھیلوں اور چھٹی ایشیائی کبڈی چیمپئن شپ میں تمغے حاصل کیے تھے۔

کبڈی کے کھلاڑی سرجیت کو بھی ان کی بہترین کارکردگی کے لیے ارجن ایوارڈ سے نوازا گیا۔ انہوں نے ہانگژو ایشیائی کھیلوں اور بوسان ایشیائی کبڈی چیمپئن شپ میں تمغے جیتے تھے۔ ہاکی کے میدان میں لالریمسیا می کو ہندوستان کی جانب سے مختلف بڑے بین الاقوامی مقابلوں میں تمغے جیتنے میں اہم کردار ادا کرنے پر یہ اعزاز دیا گیا۔ ان مقابلوں میں دولت مشترکہ کھیل، ایشیائی کھیل اور ایشین چیمپئنز ٹرافی شامل ہیں۔ ہاکی کھلاڑی راج کمار پال کو بھی کھیلوں میں نمایاں کارکردگی کے لیے ارجن ایوارڈ 2025 پیش کیا گیا۔ انہوں نے پیرس اولمپکس اور ہولونبوئیر ایشین چیمپئنز ٹرافی میں تمغے جیتے تھے۔

قابل ذکر ہے کہ قومی کھیل ایوارڈ ہر سال کھیلوں کے میدان میں بہترین کارکردگی کا مظاہرہ کرنے والے کھلاڑیوں کی حوصلہ افزائی اور ان کی خدمات کے اعتراف میں دیے جاتے ہیں۔ سابق جج جسٹس (ریٹائرڈ) ارون کمار مشرا کی سربراہی میں قائم سلیکشن کمیٹی کی سفارشات کی بنیاد پر حکومت نے مختلف زمروں میں کھلاڑیوں، کوچوں اور اداروں کو ایوارڈ دینے کا فیصلہ کیا ہے۔ کھیلوں میں غیر معمولی کارکردگی کے لیے دیا جانے والا ارجن ایوارڈ ان کھلاڑیوں کو ملتا ہے جنہوں نے گزشتہ 4 برسوں کے دوران مسلسل اچھی کارکردگی کا مظاہرہ کیا ہو اور جن میں قیادت، کھیل کے جذبے اور نظم و ضبط جیسی خوبیاں پائی جاتی ہوں۔

ارجن ایوارڈ 2025 حاصل کرنے والے دیگر کھلاڑیوں میں ایتھلیٹکس سے تیجسوین شنکر، محمد اجمل وریاتھوڑی اور پرینکا گوسوامی، بیڈمنٹن سے ٹریسا جولی اور گایتری گوپی چند، باکسنگ سے نریندر، شطرنج سے ودت سنتوش گجراتی اور دیویا جتیندر دیشمکھ، ڈیف شوٹنگ سے دھنش سری کانتھ، پیرا شوٹنگ سے رودرانش کھنڈیلوال اور ایکتا بھین، روئنگ سے اروند سنگھ اور شوٹنگ سے اکھل شیوران شامل ہیں۔ اس کے علاوہ فٹ بال کے سابق ہندوستانی کھلاڑی اور کوچ ارومائنیگم کو کھیلوں میں زندگی بھر کی نمایاں خدمات کے اعتراف میں ارجن ایوارڈ (لائف ٹائم) سے نوازا گیا۔ یہ ایوارڈ ایسے کھلاڑیوں کو دیا جاتا ہے جنہوں نے اپنے کھیل کے زمانے میں نمایاں خدمات انجام دینے کے ساتھ ساتھ ریٹائرمنٹ کے بعد بھی کھیلوں کے فروغ کے لیے کام جاری رکھا ہو۔