نئی دہلی: حکومت نے ہندوستان میں فارمولا ون اور موٹر اسپورٹس کے وسیع ماحولیاتی نظام کو دوبارہ فعال کرنے اور اس کی ترقی کے امکانات کا جائزہ لینے کے لیے نیتی آیوگ کے تحت ایک ٹاسک فورس تشکیل دی ہے۔ اس کا مقصد شعبے کو درپیش چیلنجز کی نشاندہی کرنا اور اس کی ترقی کے لیے مربوط روڈ میپ تیار کرنا ہے۔ ٹاسک فورس ہندوستان میں موٹر اسپورٹس کی ترقی میں رکاوٹ بننے والے ٹیکس سے متعلق مسائل اور دیگر چیلنجز کا جامع جائزہ لے گی۔

اس کے علاوہ موٹر اسپورٹس مقابلوں کے انعقاد سے حاصل ہونے والے بین الاقوامی، اقتصادی، سیاحتی اور سرمایہ کاری کے ممکنہ فوائد کا بھی جائزہ لیا جائے گا۔ ٹاسک فورس شعبے کی پائیدار ترقی کے لیے اہم ترجیحات، بنیادی ڈھانچے کی ضروریات اور انتظامی تقاضوں کی نشاندہی کرے گی۔ ٹاسک فورس جامع پالیسی فریم ورک کی ضرورت کا بھی جائزہ لے گی اور موٹر اسپورٹس کی ترقی کے لیے موزوں پبلک پرائیویٹ پارٹنرشپ (پی پی پی) ماڈل تجویز کرے گی۔

فارمولا ون گراں پری کے امکانات کا جائزہ لینے والی ٹاسک فورس کی سربراہی نیتی آیوگ کے پی ڈی (وائی اے ایس) یوگل کشور جوشی کر رہے ہیں۔ اس کے ارکان میں محکمہ کھیل کے جوائنٹ سکریٹری کنال، محکمہ تجارت کے جوائنٹ سکریٹری، وزارت سیاحت کے جوائنٹ سکریٹری، محکمہ محصولات کے تحت سی بی آئی سی اور سی بی ڈی ٹی کے نمائندے، اتر پردیش اور مہاراشٹر حکومتوں کے نمائندے، بدھ انٹرنیشنل سرکٹ (بی آئی سی) اور مدراس انٹرنیشنل سرکٹ (ایم آئی سی) کے نمائندے، فیڈریشن آف موٹر اسپورٹس کلبس آف انڈیا (ایف ایم ایس سی آئی) کے صدر یا سکریٹری جنرل، ایف ایم ایس سی آئی کی جانب سے نامزد تکنیکی ماہر اور ضرورت کے مطابق چیئرمین کی جانب سے شامل کیے جانے والے دیگر ارکان شامل ہیں۔

حکومت تقریباً 13 برس بعد گریٹر نوئیڈا کے بدھ انٹرنیشنل سرکٹ میں فارمولا ون کی واپسی کے امکانات پر غور کر رہی ہے۔ مرکزی وزیر کھیل منسکھ مانڈویہ نے بھی رواں سال کے شروع میں بدھ انٹرنیشنل سرکٹ کا دورہ کیا تھا، جس سے ہندوستانی گراں پری کو دوبارہ شروع کرنے کے ممکنہ منصوبوں کے اشارے ملے تھے۔ ہندوستانی گراں پری اس سے قبل 2011 سے 2013 تک بدھ انٹرنیشنل سرکٹ میں منعقد ہوئی تھی۔

ریڈ بل ریسنگ کے لیے جرمنی کے سیبسٹین ویٹل نے تینوں مقابلے جیتے تھے۔ پہلی ہندوستانی گراں پری 30 اکتوبر 2011 کو فارمولا ون سیزن 2011 کی 17ویں ریس کے طور پر منعقد ہوئی تھی، جس میں بھی ویٹل نے کامیابی حاصل کی تھی۔ 2013 کے بعد سے گراں پری فارمولا ون کے کیلنڈر میں واپس نہیں آئی ہے۔ فارمولا ون کے علاوہ ہندوستان نے ستمبر 2023 میں بدھ انٹرنیشنل سرکٹ پر موٹو جی پی ریس کی میزبانی بھی کی تھی، تاہم اس کے بعد یہ مقابلے بھی دوبارہ منعقد نہیں ہوئے۔