نئی دہلی: وزیراعظم نریندر مودی نے جمعرات کے روز ’آشیرواد کا دیا‘ گیت کے ساتھ تیار کی گئی ایک ویڈیو کے لیے اس کے بنانے والوں کا شکریہ ادا کیا۔ اس ویڈیو میں مختلف اوقات میں شہریوں کے ساتھ مودی کی ملاقاتوں اور ان سے جڑے کئی لمحات دکھائے گئے ہیں۔ ویڈیو میں ان شہریوں کے تاثرات بھی شامل ہیں، جنہیں مودی حکومت کی مختلف فلاحی اسکیموں سے فائدہ ملا ہے۔ ان میں مفت گھر، صحت کی سہولت، بجلی اور کھانا پکانے کی گیس جیسی سہولتیں شامل ہیں۔

ویڈیو کے ایک منظر میں ایک خاتون روایتی دیا جلاتی نظر آتی ہیں۔ بیٹی کے پوچھنے پر کہ وہ دیا کیوں جلا رہی ہیں، خاتون کہتی ہیں کہ وہ اس شخص کے لیے آشیرواد کا دیا جلا رہی ہیں، جس نے ان کی زندگی سے اندھیرا دور کرکے روشنی لانے کا کام کیا۔ ویڈیو میں مودی حکومت کی جانب سے بنیادی ڈھانچے، زراعت، صنعت، صحت اور تعلیم سمیت مختلف شعبوں میں کیے گئے ترقیاتی کاموں کو بھی دکھایا گیا ہے۔

وزیراعظم مودی نے ویڈیو پر ردعمل ظاہر کرتے ہوئے کہا کہ کچھ جذبات ہمیشہ خاص ہوتے ہیں اور ’آشیرواد کا دیا‘ بھی محبت کے اظہار کی ایسی ہی ایک مثال ہے، جس نے انہیں دل کی گہرائیوں سے متاثر کیا ہے۔ انہوں نے سوشل میڈیا پلیٹ فارم ’ایکس‘ پر لکھا، "ہر آشیرواد مجھے اپنے پیارے ہندوستان کی اور بھی زیادہ لگن کے ساتھ خدمت کرنے کے عزم کو مضبوط کرتا ہے۔"

’آشیرواد کا دیا‘ گیت کو سنیہا شنکر نے اپنی آواز دی ہے، جبکہ اس کی دھن امان پنت نے تیار کی ہے۔ امان پنت نے ’ایکس‘ پر لکھا، "ہم نریندر مودی جی کو قوم کی مسلسل خدمت کرتے ہوئے دیکھ کر بڑے ہوئے ہیں۔ آج ہم ان کی 25 سالہ خدمت کے موقع پر ’آشیرواد کا دیا‘ پیش کرتے ہیں۔

وزیراعظم صاحب کو سالگرہ کی مبارک باد۔ 17 ستمبر کو ہم آپ کے لیے ایک دیا جلائیں گے۔" جمعرات کو مودی کی 76ویں سالگرہ کے موقع پر ملک بھر میں خدمت کے مختلف پروگرام اور عوامی تقریبات منعقد کی جارہی ہیں۔ بی جے پی اس موقع کو ’سیوا دیوس‘ کے طور پر منا رہی ہے، جبکہ ایک ماہ تک چلنے والی رابطہ مہم کے تحت ’سیوا سنکلپ ابھیان‘ شروع کیا گیا ہے۔

’آشیرواد کا دیا‘ مہم کے تحت ملک بھر میں 500 سے زیادہ اہم مقامات پر اجتماعی طور پر دیے جلانے کی تقریبات منعقد کی جائیں گی۔ بی جے پی کے صدر نتن نابین نے بھی لوگوں سے اپیل کی ہے کہ وہ مودی کی سالگرہ کے موقع پر اپنے گھروں میں دیا جلائیں اور ان کی لمبی عمر، اچھی صحت اور مسلسل کامیابی کے لیے دعا کریں۔