نئی دہلی: دہلی پولیس نے ہفتے کے روز قومی دارالحکومت میں مجوزہ احتجاج سے پہلے مختلف مقامات سے گروپوں کی شکل میں پہنچنے والے تقریباً 500 افراد کو حراست میں لے لیا۔ پولیس حکام کے مطابق، احتیاطی اقدامات کے تحت مجرمانہ پس منظر رکھنے والے تقریباً 50 افراد کو بھی پکڑا گیا ہے۔

دہلی پولیس نے بتایا، ’’مختلف مقامات سے الگ الگ گروپوں میں آنے والے تقریباً 500 افراد کو حراست میں لیا گیا ہے۔ اس کے علاوہ، تقریباً 50 ایسے سماج دشمن عناصر کو بھی پکڑا گیا ہے جن کا مجرمانہ پس منظر ہے، تاکہ وہ ماحول خراب نہ کریں اور کسی طرح کی گڑبڑی نہ پھیلائیں۔‘‘ پولیس کے مطابق، سکیورٹی انتظامات کے تحت نئی دہلی ضلع کو 20 انتظامی زون میں تقسیم کیا گیا ہے اور ہر زون کے لیے الگ حراستی مرکز قائم کیا گیا ہے۔ اس کے علاوہ، قومی دارالحکومت کے کئی اسٹیڈیموں کو بھی عارضی حراستی مراکز میں تبدیل کر دیا گیا ہے۔

سخت حفاظتی انتظامات اور جگہ جگہ رکاوٹیں لگائے جانے کے درمیان جنتر منتر اور سنسد مارگ پر جمع ہونے والے کئی مظاہرین کو بھی حراست میں لیا گیا۔ کاکروچ جنتا پارٹی (سی جے پی) کے کارکن الیکشن کمیشن کے خلاف احتجاج کرنے کے اپنے اعلان پر قائم ہیں، جس کے پیش نظر شہر کے مختلف مقامات پر پولیس اور سکیورٹی اہلکار تعینات کیے گئے ہیں۔ دہلی میں داخل ہونے والے راستوں پر بھی سکیورٹی بڑھا دی گئی ہے۔ فراہم کردہ تفصیلات کے مطابق، میٹرو کے 46 اسٹیشن اب بھی بند ہیں۔

پولیس نے احتجاج کے دوران کسی ناخوش گوار واقعے کو روکنے اور 20 جولائی کے احتجاج جیسے حالات دوبارہ پیدا ہونے سے بچنے کے لیے یہ اقدامات کیے ہیں۔ انڈیا اتحاد کے احتجاج کے دوران کیے گئے انتظامات کے برعکس، اس بار پولیس ٹیموں کو لاٹھیاں اور ڈنڈے لے جانے کی اجازت دی گئی ہے۔ پولیس اہلکاروں کی منفی تصویر پیش کرنے کے لیے ویڈیوز ریکارڈ کرکے پھیلانے کی مبینہ کوششوں کے پیش نظر اہلکاروں کو مظاہرین کے ساتھ زبانی تکرار سے بچنے کی ہدایت بھی دی گئی ہے۔ حراست میں لیے گئے افراد کو چھ مقررہ مراکز میں منتقل کیا جانا ہے۔ ان میں چھترسال اسٹیڈیم، راجیو گاندھی اسٹیڈیم، یمنا اسپورٹس کمپلیکس، سورج مل اسٹیڈیم، دولت پور کا کمیونٹی سینٹر اور پندراوال کا کمیونٹی سینٹر شامل ہیں۔