جموں:جموں و کشمیر کے رام بن قصبے میں ٹریفک کے دباؤ کو کم کرنے اور عوام کی حفاظت یقینی بنانے کے لیے ضلع مجسٹریٹ محمد الیاس خان نے تجارتی مسافر گاڑیوں اور مال بردار گاڑیوں کے لیے یک طرفہ ٹریفک نظام نافذ کردیا ہے۔ جمعرات کو جاری کیے گئے حکم کے مطابق رام بن قصبے میں داخل ہونے یا وہاں سے باہر جانے والی تمام مال بردار اور تجارتی مسافر گاڑیوں، جن میں سومو، بسیں، منی بسیں اور ایکو گاڑیاں شامل ہیں، کو یک طرفہ ٹریفک کے مقررہ راستے پر چلنا ہوگا۔

حکم بھارتیہ ناگرک سرکشا سنہتا (بی این ایس ایس) 2023 کی متعلقہ دفعہ کے تحت جاری کیا گیا ہے۔ یہ پابندیاں 2 ماہ تک یا اگلے حکم تک، جو بھی پہلے ہو، نافذ رہیں گی۔ حکم کے مطابق یہ گاڑیاں شان پیلس ناکہ سے قصبے میں داخل ہوں گی اور بولی بازار، ٹی چوک، بس اسٹینڈ اور کیفے ٹیریا چوک سے ہوتے ہوئے آگے جائیں گی۔ کیفے ٹیریا چوک کی جانب سے تجارتی گاڑیوں کو بس اسٹینڈ میں داخل ہونے کی اجازت نہیں ہوگی۔ اس راستے کو ایسی گاڑیوں کے لیے صرف باہر نکلنے کے راستے کے طور پر استعمال کیا جائے گا۔

نوٹیفائی کیے گئے راستوں پر صبح 8 بجے سے رات 8 بجے تک مال بردار گاڑیوں سے سامان لادنے اور اتارنے پر مکمل پابندی ہوگی۔ حکم کا مقصد ٹریفک کی آمدورفت کو منظم کرنا اور خاص طور پر بس اسٹینڈ، ٹی چوک، بولی بازار اور اس سے ملحقہ علاقوں میں ٹریفک جام کی صورتحال کو روکنا ہے۔ سینئر سپرنٹنڈنٹ آف پولیس، سینئر سپرنٹنڈنٹ آف پولیس ٹریفک (این ایچ ڈبلیو) اور اسسٹنٹ ریجنل ٹرانسپورٹ آفیسر کو حکم پر سختی سے عمل درآمد یقینی بنانے کی ہدایت دی گئی ہے۔ یہ حکم فوری طور پر نافذ العمل ہوگیا ہے اور عام لوگوں کی اطلاع کے لیے اسے پرنٹ، الیکٹرانک اور سوشل میڈیا کے ذریعے تشہیر کی جائے گی۔