نئی دہلی: دہلی کی راؤز ایونیو عدالت نے بدھ کے روز نیٹ یو جی 2026 کے سوالیہ پرچے کے مبینہ افشا کے معاملے میں تین مضمون کے ماہرین سمیت 14 ملزمان کے خلاف فردِ جرم عائد کرنے کی ہدایت دی ہے۔ اس کیس کی تحقیقات مرکزی تحقیقاتی بیورو (سی بی آئی) کر رہا ہے۔ عدالت نے کاپی رائٹ ایکٹ کے تحت بھی الزامات عائد کرنے کی ہدایت دی ہے۔ ملزمان کے خلاف باضابطہ طور پر فردِ جرم 21 نومبر کو عائد کی جائے گی۔ خصوصی سی بی آئی جج اجے گپتا نے حکم دیا کہ تمام 14 ملزمان کو ہفتہ، 21 نومبر کو عدالت میں ذاتی طور پر پیش کیا جائے تاکہ فردِ جرم عائد کرنے کی کارروائی مکمل کی جاسکے۔
عدالت نے مزید ہدایت دی کہ استغاثہ کے شواہد ریکارڈ کرنے کا عمل 25 نومبر سے شروع کیا جائے اور روزانہ کی بنیاد پر جاری رکھا جائے۔ اس مقدمے میں نامزد 14 ملزمان میں منگی لال بیوال، دنیش بیوال، وکاس بیوال، منیشا واگھمارے، منیش مانڈھارے، منیشا ہاولدار، پی وی کلکرنی، رگھوناتھ موٹیگاونکر، منوج شریورے، شبھم کھیرنار، شیش راؤ بجرنگ سوریہ ونشی، یش یادو، دھننجے لوکھنڈے اور تیجس ہرشد کمار شاہ شامل ہیں۔ سی بی آئی نے نیٹ یو جی 2026 کے امتحانی سوالیہ پرچے کے مبینہ افشا کی تحقیقات کے لیے مئی 2026 میں مقدمہ درج کیا تھا۔
تحقیقاتی ایجنسی نے جولائی میں 13 ملزمان کے خلاف مرکزی چارج شیٹ داخل کی، جبکہ 14ویں ملزم شیش راؤ بجرنگ سوریہ ونشی کے خلاف 2 ستمبر کو ضمنی چارج شیٹ داخل کی گئی۔ عدالت نے 12 اگست 2026 کو مرکزی چارج شیٹ کا نوٹس لیا تھا۔ اس موقع پر خصوصی جج اجے گپتا نے مشاہدہ کیا تھا کہ ملزمان نے مبینہ طور پر ایک دوسرے کے ساتھ سازش کرکے امتحانی سوالیہ پرچوں کی ترسیل اور تقسیم میں فعال کردار ادا کیا۔ خصوصی جج نے کہا تھا کہ بادی النظر میں یہ واضح ہے کہ تمام 13 ملزمان نے مبینہ جرائم ایک دوسرے کی ملی بھگت سے کیے، اس کے علاوہ متعلقہ قوانین کے تحت دیگر جرائم کا بھی ارتکاب کیا۔
عدالت نے مزید کہا تھا کہ بظاہر ملزمان ایک ایسے گروہ کا حصہ تھے جو امتحان کے تینوں مضامین کے سوالیہ پرچوں کو پھیلانے اور مختلف افراد تک پہنچانے میں ملوث تھا۔ سی بی آئی کی چارج شیٹ میں بھارتیہ نیائے سنہتا (بی این ایس) کی مجرمانہ سازش، دھوکہ دہی، امانت میں خیانت اور شواہد ضائع کرنے سے متعلق دفعات شامل کی گئی ہیں۔ اس کے علاوہ انسدادِ بدعنوانی ایکٹ 1988 اور عوامی امتحانات (غیر منصفانہ ذرائع کی روک تھام) ایکٹ 2024 کی دفعات بھی لگائی گئی ہیں۔ عدالت نے نیٹ یو جی 2026 کے سوالیہ پرچوں کے ترجمے کے لیے تعینات کیے گئے مضمون کے ماہرین کے مبینہ کردار کا بھی جائزہ لیا تھا۔
ملزم پی وی کلکرنی کا ذکر کرتے ہوئے عدالت نے مشاہدہ کیا تھا کہ اسے مبینہ طور پر اس بات کا علم تھا کہ مخصوص مقام پر مضمون کے ماہرین کی تلاشی نہیں لی جاتی۔ اس نے اس صورت حال کا فائدہ اٹھاتے ہوئے ترجمے کے دوران تیار کیے گئے تحریری پرچوں اور مختصر نوٹس کو خفیہ طور پر اپنے ساتھ لے جانے کا مبینہ اقدام کیا۔ عدالت نے مزید کہا تھا کہ تینوں مضمون کے ماہرین نے اپنی ذمہ داریاں سنبھالنے سے پہلے تحریری یقین دہانی کرائی تھی کہ وہ امتحان سے متعلق کوئی بھی مواد کسی دوسرے شخص کے ساتھ شیئر نہیں کریں گے۔
عدالت کے مطابق ریکارڈ سے واضح ہوتا ہے کہ تینوں ماہرین نے کام پر مامور ہونے سے قبل تحریری طور پر یقین دہانی کرائی تھی کہ وہ نیٹ یو جی 2026 کے امتحان سے متعلق کسی بھی مواد کو کسی بھی طریقے سے کسی کے ساتھ شیئر نہیں کریں گے۔ عدالت نے کہا تھا کہ بادی النظر میں ان کے مبینہ اقدامات نیشنل ٹیسٹنگ ایجنسی (این ٹی اے) کے ساتھ مجرمانہ خیانت کے زمرے میں آتے ہیں، جس نے انہیں متعلقہ مضامین کے سوالیہ پرچوں کا ترجمہ کرنے کی ذمہ داری سونپی تھی۔ عدالت نے مزید مشاہدہ کیا تھا کہ مضمون کے ماہرین منیشا مانڈھارے، پی وی کلکرنی اور منیشا سنجے ہاولدار نے مبینہ طور پر دیگر ملزمان کے ساتھ مل کر غیر قانونی مالی فوائد حاصل کرنے کی غرض سے سازش کی۔ الزام ہے کہ انہوں نے اپنے اپنے مضامین سے متعلق امتحانی مواد، بشمول افشا شدہ سوالات، شریک ملزمان اور متعدد امیدواروں کو فروخت کیے۔ یہ کام مبینہ طور پر کوچنگ فراہم کرنے کے نام پر کیا گیا۔
عدالت نے شواہد ضائع کرنے سے متعلق الزامات کا بھی نوٹس لیا تھا۔ اس کے مطابق بعض ملزمان نے مبینہ طور پر افشا شدہ امتحانی مواد کو ٹھکانے لگایا اور متعلقہ معلومات رکھنے والے الیکٹرانک آلات کو بھی تباہ کردیا۔ عدالت نے قرار دیا تھا کہ مبینہ اقدامات عوامی امتحانات (غیر منصفانہ ذرائع کی روک تھام) ایکٹ 2024 کی دفعات 3، 4 اور 5 کے تحت آتے ہیں، جن کے لیے اسی قانون کی دفعات 10 اور 11 میں سزاؤں کا تعین کیا گیا ہے۔ واضح رہے کہ عدالت کی جانب سے فردِ جرم عائد کرنے کی ہدایت الزامات کے عدالتی مرحلے کا حصہ ہے، اسے ملزمان کا جرم ثابت ہونا نہیں سمجھا جائے گا۔