ممبئی: ممبئی میں کئی اہم مقامات پر بم دھماکے کرنے کی دھمکی آمیز ای میل موصول ہونے کے بعد سلامتی کے اداروں کو ہائی الرٹ کر دیا گیا ہے۔ دھمکی میں میئر کے دفتر، بینکوں، ایک عدالت، اداکار امیتابھ بچن کے بنگلے، مہالکشمی ریس کورس اور چھترپتی شیواجی مہاراج بین الاقوامی ہوائی اڈے سمیت شہر کے کئی اہم مقامات کو نشانہ بنانے کی بات کہی گئی ہے۔ ذرائع کے مطابق، 12 نومبر کو صبح 10 بج کر 52 منٹ پر موصول ہونے والی اس ای میل نے ممبئی میں سلامتی سے متعلق تشویش پیدا کر دی ہے۔

یہ ای میل [email protected] نامی ای میل پتے سے بھیجی گئی تھی اور اس کے وصول کنندگان میں پنجاب نیشنل بینک (پی این بی) کے ممبئی زونل دفتر، لوکل کرائم برانچ (ایل سی بی) ممبئی کے کَف پریڈ دفتر اور زیوری بازار برانچ کے حکام شامل تھے۔ ای میل میں شہر کے مختلف حصوں میں متعدد بم دھماکوں اور حملوں کی دھمکی دی گئی ہے۔ ذرائع کے مطابق، اس دھمکی آمیز ای میل میں میونسپل کارپوریشن کا بھی ذکر کیا گیا ہے، جس کے بعد وہاں کے حفاظتی نظام کو بھی چوکس کر دیا گیا۔ ای میل کے آخر میں ’’خالصتان نیشنل آرمی‘‘ کا نام درج ہے اور اس پر انجینئر گورنانک سنگھ، رکن شاہ والا اور ڈاکٹر گرنرویر سنگھ خان راجادہ کے نام لکھے گئے ہیں۔

اس پیغام میں کئی مقامات پر مخصوص اوقات میں دھماکے کرنے کی دھمکیاں دی گئی ہیں۔ ای میل میں ممبئی میں پنجاب نیشنل بینک کی ایک شاخ میں دوپہر 1 بج کر 11 منٹ پر بم دھماکے کی دھمکی دی گئی ہے۔ اس کے علاوہ چھترپتی شیواجی ہوائی اڈے پر رات 9 بج کر 11 منٹ پر دھماکے کی بات کہی گئی ہے۔ مہالکشمی اسٹیڈیم میں گلوکار دلجیت دوسانجھ کے نام سے منسوب آئی فون بم دھماکے کی دھمکی بھی دی گئی ہے۔ ای میل میں اداکار امیتابھ بچن کے بنگلے ’جلسہ‘ پر کار بم حملے کی دھمکی دیتے ہوئے لوگوں کو خبردار کیا گیا ہے۔ گلوکار دلجیت دوسانجھ کے آئندہ پروگراموں میں شرکت کرنے والوں کو بھی نشانہ بنانے کی بات کہی گئی ہے۔

اس کے علاوہ ایک عدالت میں دوپہر 2 بج کر 11 منٹ پر اور میئر کے دفتر میں 3 بج کر 11 منٹ پر دھماکے کرنے کی دھمکی دی گئی ہے۔ ای میل کے آخر میں یہ اطلاع بھی درج تھی کہ پی این بی کا کارپوریٹ ای میل ڈومین pnb.co.in سے تبدیل کرکے pnbbank.in کر دیا گیا ہے۔ پولیس اور سلامتی کے دیگر ادارے اب اس ای میل کے ماخذ اور اس میں دی گئی دھمکیوں کی حقیقت کا پتہ لگانے میں مصروف ہیں۔ دھمکی ملنے کے بعد ای میل میں مذکور تمام مقامات پر حفاظتی جانچ اور تلاشی کی کارروائی کی گئی، تاہم ذرائع کے مطابق کسی بھی مقام سے کوئی مشتبہ چیز یا سرگرمی سامنے نہیں آئی ہے۔

اس معاملے میں مزید تفصیلات کا انتظار ہے۔ یہ تازہ دھمکی ایسے وقت میں سامنے آئی ہے جب چند روز قبل امیتابھ بچن کی جوہو واقع رہائش گاہ ’جلسہ‘ کے باہر بھی اضافی حفاظتی انتظامات کیے گئے تھے۔ یکم نومبر کو امیتابھ بچن اپنے معمول کے مطابق اتوار کے روز مداحوں سے ملاقات کے لیے گھر سے باہر آئے تھے۔ اس موقع پر وہ ایک شفاف حفاظتی حصار کے اندر کھڑے ہو کر مداحوں سے ملے تھے۔ بتایا جاتا ہے کہ یہ حصار اضافی سلامتی کے انتظام کے طور پر نصب کیا گیا تھا۔ اس موقع پر ان کے بیٹے اور اداکار ابھیشیک بچن بھی موجود تھے، جبکہ وہاں بڑی تعداد میں حفاظتی اہلکار تعینات کیے گئے تھے۔