نئی دہلی: بھارتیہ جنتا پارٹی (بی جے پی) کے قومی صدر نتن نوین نے جمعرات کو وزیر اعظم نریندر مودی کی تعریف کرتے ہوئے کہا کہ وہ دیوالی کے موقع پر ملک کی مسلح افواج اور سیکورٹی اہلکاروں سے ملاقات کرنے اور ان کے ساتھ تہوار منانے کی روایت برقرار رکھے ہوئے ہیں۔ انہوں نے کہا کہ وزیر اعظم ہر سال سرحدوں پر تعینات جوانوں کے ساتھ دیوالی مناتے ہیں، جبکہ ملک کے دیگر لوگ اپنے گھروں میں اہل خانہ کے ساتھ یہ تہوار مناتے ہیں۔ نتن نوین نئی دہلی میں بی جے پی کے مرکزی دفتر میں منعقدہ دیپاولی ملن تقریب سے خطاب کر رہے تھے۔ اس موقع پر وزیر اعظم نریندر مودی بھی موجود تھے۔

بی جے پی صدر نے سیکورٹی اہلکاروں کے تئیں وزیر اعظم کے جذبے کو سراہتے ہوئے کہا کہ وہ آئی این ایس وکرانت سے لے کر برف سے ڈھکی سرحدوں تک تعینات فوجیوں کے درمیان پہنچ کر دیوالی مناتے ہیں۔ انہوں نے کہا، ’’وزیر اعظم نریندر مودی دیوالی کے موقع پر ملک کے جوانوں کے ساتھ دیپاولی ملن پروگرام منعقد کرتے رہے ہیں۔ آئی این ایس وکرانت پر جوانوں سے ملاقات ہو یا برف سے ڈھکی سرحدوں پر تعینات فوجیوں کے درمیان پہنچنا، وزیر اعظم دیوالی کے دن ان لوگوں سے ملتے ہیں، جبکہ ہم اپنے گھروں میں اہل خانہ کے ساتھ یہ تہوار مناتے ہیں۔‘‘

بی جے پی صدر نے کہا کہ وزیر اعظم ان جوانوں کے ساتھ دیوالی مناتے ہیں جو سرحدوں کی حفاظت کرتے ہوئے اس بات کو یقینی بناتے ہیں کہ ملک کے شہری سکون اور خوشی کے ساتھ اپنا تہوار منا سکیں۔ انہوں نے مزید کہا، ’’وزیر اعظم ان لوگوں کے ساتھ دیپاولی ملن مناتے ہیں جو سرحدوں کی حفاظت کرتے ہوئے اس فکر میں رہتے ہیں کہ ہماری دیوالی اچھی گزرے۔ اسی طرح اس سال نکسلزم کے خاتمے کے بعد وزیر اعظم نے ان فوجیوں اور جوانوں کے ساتھ بھی دیوالی منائی۔‘‘ نتن نوین نے ہندوستان کے تہواروں، روایات اور ثقافتی ورثے کو عالمی سطح پر ملنے والی بڑھتی ہوئی شناخت کا بھی ذکر کیا۔

انہوں نے اس کا سہرا وزیر اعظم مودی کی کوششوں کو دیتے ہوئے کہا کہ دیوالی اب صرف ہندوستان تک محدود نہیں رہی بلکہ دنیا بھر میں اس کی مقبولیت بڑھ رہی ہے۔ انہوں نے کہا، ’’ہم ہر سال ملک بھر میں دیوالی کا تہوار مناتے ہیں، لیکن وزیر اعظم کی کوششوں سے اب یہ تہوار عالمی سطح پر بھی ہندوستان کی شناخت بن رہا ہے۔ آپ نے ہندوستانی تہواروں، روایات اور ثقافت کو عالمی سطح پر متعارف کرایا ہے، جس کی وجہ سے پوری دنیا میں ہندوستانی تہواروں کے تئیں کشش بڑھی ہے۔‘‘ بی جے پی صدر نے یوگا کی عالمی مقبولیت کا حوالہ دیتے ہوئے کہا کہ جس طرح وزیر اعظم مودی نے یوگا کو بین الاقوامی سطح پر شناخت دلائی، اسی طرح اب ہندوستان کے تہوار بھی دنیا بھر میں شہرت حاصل کر رہے ہیں اور عالمی سطح پر اپنی جگہ بنا رہے ہیں۔