نئی دہلی۔وزارت خارجہ نے بدھ کے روز ہندوستانی شہریوں کو روسی مسلح افواج میں شامل ہونے کے خلاف خبردار کیا ہے۔ وزارت نے اس حوالے سے خطرات سے آگاہ کرتے ہوئے شہریوں کو مشورہ دیا ہے کہ وہ بیرون ملک ملازمت کے غیر مصدقہ مواقع کے جھانسے میں نہ آئیں۔یہ ایڈوائزری ایسے وقت میں جاری کی گئی ہے جب ہندوستانی شہریوں کو روسی مسلح افواج میں بھرتی کیے جانے کی اطلاعات مسلسل سامنے آ رہی ہیں۔ وزارت خارجہ نے کہا کہ حکومت گزشتہ 2 سال سے اس طرح کے اقدامات سے وابستہ خطرات کے بارے میں بار بار آگاہ کرتی رہی ہے۔

وزارت نے کہا کہ حکومت نے گزشتہ 2 سال کے دوران کئی مواقع پر اس راستے میں موجود خطرات سے ہندوستانی شہریوں کو آگاہ کیا ہے۔ حکومت نے شہریوں کو بیرون ملک ملازمت کے مواقع تلاش کرتے وقت محتاط رہنے اور غیر مصدقہ افراد کی جانب سے دی جانے والی ملازمت کی پیشکشوں کے جھانسے میں نہ آنے کا مشورہ دیا ہے۔وزارت خارجہ کے مطابق ایسے کئی معاملات سامنے آئے ہیں جن میں افراد نے مالی فوائد حاصل کرنے کی امید میں رضاکارانہ طور پر روسی مسلح افواج میں شامل ہونے کی پیشکش قبول کی۔ بعد میں انہوں نے ہندوستانی حکومت سے اپنی رہائی کے لیے مدد طلب کی۔

وزارت نے کہا کہ یہ ایک خطرناک راستہ ہے اور حکومت اس کی سختی سے حوصلہ شکنی کرتی ہے۔

وزارت خارجہ نے یہ بھی بتایا کہ ایسے معاملات بھی سامنے آئے ہیں جن میں افراد نے ہندوستانی حکام سے رابطہ کرکے رضاکارانہ طور پر ہندوستانی شہریت چھوڑنے اور روسی پاسپورٹ حاصل کرنے کی خواہش ظاہر کی تاکہ روسی مسلح افواج میں بھرتی ہو سکیں۔وزارت نے مزید کہا کہ غیر سرکاری اداروں اور رضاکار گروپوں سمیت مختلف غیر سرکاری ذرائع کی جانب سے غیر ملکی شہریوں کو روسی مسلح افواج میں بھرتی کیا جا رہا ہے۔

وزارت کے مطابق کچھ افراد ہندوستانی حکام سے مشورہ کیے بغیر ایسا قدم پہلے ہی اٹھا چکے ہیں اور عارضی مالی فوائد کے لالچ میں آ گئے ہیں۔ حکومت نے افراد کو مشورہ دیا ہے کہ وہ ایسے اقدامات کی سنگینی کو سمجھیں اور ان سے وابستہ جان لیوا خطرات کا ادراک کریں۔وزارت خارجہ نے کہا کہ ہندوستانی شہری ایسے اقدامات سے گریز کریں۔

وزارت نے مزید کہا کہ حکومت ہند روسی حکام کے ساتھ مسلسل رابطے میں ہے تاکہ روسی مسلح افواج میں خدمات انجام دینے والے تمام ہندوستانی شہریوں کی سلامتی اور فلاح و بہبود یقینی بنائی جا سکے اور انہیں جلد از جلد رہا کرایا جا سکے۔وزارت خارجہ نے ہندوستانی شہریوں کو مشورہ دیا ہے کہ وہ ایسے ایجنٹوں سے ملازمت کی پیشکش قبول کرنے سے پہلے مکمل جانچ پڑتال کریں جو وزارت خارجہ کے ساتھ رجسٹرڈ نہیں ہیں۔