چنئی:، مدراس ہائی کورٹ نے جمعہ کے روز راشٹریہ سویم سیوک سنگھ (آر ایس ایس) کو تمل ناڈو میں 25 اکتوبر اور یکم نومبر کو 128 مقامات پر جلوس نکالنے کی اجازت دے دی۔ عدالت نے اس دوران ریاستی پولیس پر تنقید کرتے ہوئے کہا کہ وہ ان بنیادوں پر بار بار اجازت دینے سے انکار کر رہی ہے جنہیں عدالت پہلے ہی مسترد کر چکی ہے۔ جسٹس وی لکشمی نارائنن نے یہ تبصرہ آر ایس ایس کی شمالی تمل ناڈو شاخ کے سکریٹری وی جی جگدیشن کی درخواست پر سماعت کرتے ہوئے کیا۔ درخواست میں تنظیم کے سالانہ وجے دشمی پروگرام کے تحت جلوس اور عوامی جلسے منعقد کرنے کی اجازت نہ دینے کے پولیس کے فیصلوں کو چیلنج کیا گیا تھا۔

آر ایس ایس نے جلوس نکالنے کے لیے 18 اکتوبر، 25 اکتوبر اور یکم نومبر کی متبادل تاریخوں پر اجازت مانگی تھی۔ تاہم، ریاستی پولیس نے درخواستیں مسترد کرتے ہوئے دلیل دی کہ مجوزہ راستوں پر دیگر برادریوں کی عبادت گاہیں اور عقلیت پسند رہنماؤں کے مجسمے موجود ہیں۔ اس کے علاوہ ٹریفک کی بھیڑ، لاؤڈ اسپیکر کے استعمال اور امن و قانون کی صورت حال خراب ہونے کے خدشات کا حوالہ دیا گیا تھا۔ ہائی کورٹ نے کہا کہ ان وجوہات پر پہلے بھی غور کیا جا چکا ہے اور سابقہ عدالتی کارروائیوں میں انہیں قابل قبول نہیں مانا گیا تھا۔ عدالت نے یہ بھی کہا کہ آر ایس ایس 2022 سے جلوس نکالنے کی اجازت کے لیے عدالت سے رجوع کرتی رہی ہے۔

اس سلسلے میں سابقہ فیصلوں کا حوالہ دیتے ہوئے عدالت نے تنظیم کے جلوس نکالنے کے حق کو تسلیم کیا، تاہم واضح کیا کہ اس حق پر قانون کے مطابق پابندیاں عائد کی جا سکتی ہیں۔ ہائی کورٹ نے اپنے ایک بنچ کے 2023 کے فیصلے کا بھی حوالہ دیا، جس میں کہا گیا تھا کہ عوامی سڑکیں سیکولر مقامات ہیں اور مذہب، ذات یا عقیدے سے قطع نظر ہر شخص کو ان کے استعمال کا حق حاصل ہے۔

دریں اثنا، مدراس ہائی کورٹ نے منگل کے روز تمل ناڈو اسمبلی کے اسپیکر جے سی ڈی پربھاکر کے اس فیصلے کو برقرار رکھا تھا، جس کے تحت آل انڈیا انا دراوڑ منیترا کژگم (اے آئی اے ڈی ایم کے) کے چھ ارکان اسمبلی کے استعفے منظور کیے گئے تھے۔ ان ارکان نے پارٹی چھوڑ کر تملگا ویٹری کژگم (ٹی وی کے) میں شمولیت اختیار کی تھی۔

استعفیٰ دینے والے ارکان میں مراگاتم کماراول، ستیہ بابا، ایساکی سبرایا، جے کمار، ایم آر وجے بھاسکر اور سی وجے بھاسکر شامل ہیں۔ چیف جسٹس سشرت اروِند دھرمادھیکاری اور جسٹس جی ارول مروگن پر مشتمل دو رکنی بنچ نے اے آئی اے ڈی ایم کے کے وہپ ایگری ایس ایس کرشن مورتی کی جانب سے دائر متعدد درخواستوں پر جزوی طور پر منظوری دی تھی۔ ان درخواستوں میں اسپیکر کے فیصلے کو چیلنج کیا گیا تھا۔ ان چھ ارکان کے استعفے 26 مئی سے 29 جون کے درمیان منظور کیے گئے تھے۔